رومیأن 9 - کتاب مقدس به زبان گیلکی - گویش رشت و غرب گیلانخُدا انتخاب بُبوسته مردوم 1 من مسیحِ درون راست گَم، دوروغ نگم، و می وجدان بواسطه ی روح القدّس مَره گُوائی دئه کی، 2 می دیلِ درون ایتا پیله غم دَرم و دائم غُرصه دَرم. 3 چون کاشکی من می برارانِ راه درون یعنی اوشانی کی می همنژاد ایسید، لعنت ببم و مسیحِ جا سیوا بَبم. 4 اوشان اسرائیلی ایسید و فرزند خواندگی، جلال، عهدئان و شریعت اوشانَ فدَه بُبوسته، پرستش و واده ئان، تمانِ اَشان اوشان شینه، 5 و پیله پئرانَم اَشانِ شین ایسید، و مسیح مطابق جسم اَشانِ نسلِ جا ایسه، خُدایی کی همتانِ جا بُجورتر ایسه، اونَ تا به ابد سپاس. آمین. 6 ولی، منظور اَن نیئه کی خُدا کلام به انجام فائنرسه، چونکی تمان اوشانی کی اسرائیلِ مردومِ جا ایسید، راس راسی اسرائیلی نیئید؛ 7 و تمانِ اوشانیَم کی ابراهیمِ نسل جا ایسید، اونِ زاکان بحساب نَئیدی. بلکی توراتِ درون بینیویشته بُبوسته کی: «تی نسل اسحاقِ جا دوخواده خوائه بوستن.» 8 یعنی، زاکانی کی مطابق جسم بوجود باموئید خُدا زاکان نیئیدی، بلکی ابراهیمِ نسل، واده زاکان بحساب اَئیدی. 9 چون اونچی کی اُ واده بگفت، اَن بو کی: «سال دیگه هه موقع وَگردم و سارا ایتا پسرِ صاحاب به.» 10 نه فقط اَن، بلکی ربکا زاکانم اینفر جا، یعنی اَمی جد اسحاق بید. 11 هرچن پیش جه اَنکی اوشان بدُنیا بائید، و بَد یا خُبِ کار بُکونید- اَنه واسی کی خُدا هدف خو انتخاب درون پابرجا بمانه، نه کارانِ واسی، بلکی بواسطه ی اونکی دوخوانه- 12 ربکایَ بُگُفته بُبوسته کی «پیله تر کوجه تره خیدمت خوائه کودن.» 13 هُطوکی ملاکی پیغمبر کتاب درون بینیویشته بُبوسته: «یعقوبَ دوست داشتم، ولی عیسو جا خفت.» 14 پس امان چی بیگیم؟ بیگیم خُدا بی انصافه؟ هرگس! 15 چونکی موسیَ گه: «هرکسَ کی بخوام رحم بُکونم، رحم خوائم کودن، و دیلسوجی کونم هرکسَ کی می دیل اونِ ره سوجه.» 16 پس ربطی به آدمی خواسته یا اونِ تقّلا کودن ناره؛ بلکی به خُدایی ربط دَره کی رحم کونه. 17 چونکی توراتِ درون، خُدا فرعونَ گه: «من، اَ هدفِ واسی، تَره به قدرت فارسانِم تا می قدرتَ تی درون نمایان بُکونم و تا می نام، زمینِ سرتاسر اعلام بِبه.» 18 پس خُدا هرکسَ کی بخوائه رحم کونه و هرکسَ کی بخوائه سنگدل کونه. 19 بازین مَره خوائی گُفتن: «پس دِه چره اَمرا سرزنش کونه؟ چون کیسه کی بتانه خُدا اراده جُلُو بئسه؟» 20 ولی اَی آدم تو کیسی کی خُدا مرا توکو بِرا کونی؟ «مگه بساخته بُبوسته تانه خو سازنده یَ بگه چره مَره اَطو بساختی؟» 21 مگه کوزه گر اختیار ناره ایتا گِل گوده اَمرا، ایتا ظرف، مهمِ کاران واسی و ایتا دِه ظرف اُ کاران ره کی مهم نیئه بسازه؟ 22 چی شه گُفتن اَگه خُدا با اَنکی خوائه خو غَضّب نیشان بدِه و خو قوتِ بشناسانه، ظرفانی کی اوشان سر غَضّب بُکوده یَ کی هلاکت ره حاضیر بُبوستید صبر زیاد اَمرا تحمل بُکونه، 23 تا خو پیله جلالَ اُ ظرفانِ سر کی اوشان رحم بُکوده نمایان بُکونه، ظرفانیَ کی پیشتر جلالِ ره حاضیرَ کوده- 24 حتی امانم کی اونِ جا دوخواده بُبوسته ایم، دَربر گیره نه فقط یهودیانَ، بلکی غیر یهودیانم هَطو. 25 هُطوکی هوشع پیغمبر گه: «اوشانَ کی می مردوم نیبید ’می مردوم‘ خوائم دوخوادَن، و اُ کَس کی می عزیز نُبویَ، ’می عزیز‘ دوخوانَم.» 26 «و اُ جایی کی اَشانَ بُگفته بُبوست: ”شُمان می مردوم نیئید“، هو جا کی ’خُدای زنده پسران‘ دوخواده خوائید بوستن.» 27 و اِشعیای پیغمبر اسرائیل مردوم باره گه کی: «حتّی اَگه اسرائیل مردوم دریا فورش اَندر بِبه، فقط ایبچه جه اوشان نجات خوائید گیفتن. 28 چونکی خُداوند خو کلامَ تمان و کمال و بی معطلی زمین سر انجام دِئه.» 29 و هُطوکی اشعیای پیغمبر پیشگویی بُکود: «اَگه خُداوندِ لشگران امرا نسلی نَنه بو، سُدوم وعَمورَه شار مانستن بوستیم.» اسرائیل مردوم بی‌ایمانی 30 پس چی بیگیم؟ غير يهوديانی کی صالحی دُمبال نیبید، اونَ بدَس باوردید، يعنی اُ صالحی كی ايمانِ جا بدَس اَيه؛ 31 ولی اسرائیل مردوم کی اُ شریعت دُمبال بید کی اوشانَ به صالحی فارسانه ئی، اونَ بدَس ناوردید. 32 چره؟ چونکی نه ایمان امرا، بلكی اعمال اَمرا اونِ دُمبال بید. اُ ’سنگی کی تاش دِئه‘ باعث بُبوسته کی اوشان تاش بُخورید. 33 هُطوکی اشعیای پیغمبر کتاب درون بینیویشته بُبوسته: «بیدین، صَهیونِ درون سنگی نَئم کی تاش خوردَنِ باعث به، و صَخره‌ای کی کفتنِ باعث به؛ هرکس کی، اونَ ایمان باوره، شرمنده نیبه.» |
@ 2024 Korpu Company