رومیأن 3 - کتاب مقدس به زبان گیلکی - گویش رشت و غرب گیلانخُدا وفا داره 1 پس یهودی بودنِ فایده چیسه؟ یا ختنه بوستن چی ارزشی داره؟ 2 خَیلی، جه هر نظر. اول اَنکی خُدا کلام یهودیانَ امانت واسپارده بُبوسته. 3 اَگه بعضی جه اوشان وفادار نبوسته بید، چی بوستی؟ مگه اوشانِ وفادار نُبوستن، خُدا وفاداریَ باطلَ کونه؟ 4 هرگس! حتی اَگه تمانِ آدمان دوروغگو بیبید، خُدا راستگو ایسه! هُطوکی داوودِ مزمور درون بینیویشته بُبوسته: «جه اَرو، وقتی کی گب زنی، راست گی، و اُ زمات کی داوری کونی، تی داوری دُرُسته.» 5 ولی اَگه اَمی ناراستی خُدا راستیَ آشکارَ کونه، چی بایستی بیگیم؟ مگه خُدا اُ موقع کی اَمی سر غضّب کونه ظالمه؟ آدمِ مانستن گب زِئن دَرم. 6 هرگس! چونکی اُ موقع خُدا چُطو تانستی دُنیایَ داوری بُکونه؟ 7 ولی اگه بواسطه می دوروغ خُدا حئیقت ویشتر جلال گیره، دِه من چره ایتا گُناکار مانستن محکومَ بَم؟» 8 و چره نیگیم کی: «بائید بَدی بُکونیم تا خُبی بدَست بایه»؟ هُطوکی بعضیان اَمرا ایفترا بزئید و ادعا کونیدی کی امان اَطو گُفتن دَریم؟ اَشانِ محکوم بوستن عادلانه ایسه. هیکّس صالح نیئه 9 پس چی بایسی گُفتن؟ مگه امان یهودیانِ وضع، غیر یهودیانِ جا بختره؟ نه، هرگس! چونکی پیشتر ادعا بُکودیم کی همه، یهود و جغیر یهود هر دو گُناهِ بارِ جیر ایسائید. 10 هُطوکی مُقّدسِ کتاب درون بینیویشته بُبوسته: «هیکّس صالح نیه، حتی اینفر. 11 هیّکس فهمیده نیه، هیکّس خُدا واموجستن دُمبال نیه. 12 همتان خُدا جا رو واگردانه اید، اوشان همدیگرِ امرا باطلِ راه درون بشوئید. هیکّس خُبی نُکونه، حتی اینفر.» 13 «اوشانِ گولی ایتا بازِ قبرَ مانه؛ خوشان زوانَ گول زئنِ ره به کار گیریدی.» «افعی زَهر، اَشانِ لبانِ جیر نَئه.» 14 «اَشانِ دهن زَرخی و نفرینِ جا پُره.» 15 «اَشانِ لنگان خون فُکودن ره تأدی دَره؛ 16 هرجا کی شیدی، ویرانی و بدبختی بجا نیئیدی، 17 و اوشان صلح و سلامتی رایَ نشناسیدی.» 18 «خُدا ترسی، اوشانِ چومانِ درون نَنه.» 19 هسّا دانیم اونچی کی شریعت گه، اوشانِ شین ایسه کی شریعتِ جیر ایسائید تا هر دَهنی دَوَسته ببه و تمانِ دُنیا، خُدا محضر میان جواب پس بدید. 20 چونکی هی آدمی نیه کی شریعتِ اعمالِ انجام دَئن امرا، خُدا دید درون صالح ببه، چونکی شریعت، گُنایَ اَمرا نیشان دئه. خُدا صالحی ایمان راه جا 21 ولی هسّا جدا از شریعت، اُ صالحی کی خُدا جا ایسه آشکارَ بوسته، هُطوکی شریعت و پیغمبران اونِ ره گُوائی دیئیدی. 22 اَ صالحی کی خُدا جا ایسه، عیسی مسیحِ ایمان داشتن راهِ جا، تمان اوشانِ نصیب به کی ایمان آوریدی. چون هی فرقی ننه: 23 چونکی همه گناه بکودید و خُدا جلالِ جلو کم آوریدی. 24 و خُدا فیضِ امرا کی ایتا پیشکشَ مانه و بواسطه اُ آزادی بها کی مسیحْ عیسی درون نئه، صالح بحساب اَئیدی، 25 خُدا عیسی مسیحَ، گُنائانِ کَفاره مانستن قرار بدَه، اُ کَفاره ای کی اونِ خونِ اَمرا و ایمانِ راهِ جا بدس آیه. اَن خُدا عدالتِ نیشان دئنِ واسی بو، چونکی اون خو الهی صبرِ امرا، اُ گُنائانیَ کی پیشتر ایتفاق دکَفته بو، نیده بو بیگیفت. 26 اَ کار اَنه واسی بو تا خو عدالتَ اَ دوره زمانه درون نیشان بده، تا خودش عادل ببه و تمانِ اوشانیَم کی عیسیَ ایمان دَریدی، صالح بحساب بائید. 27 پس دِه اَمی افتخار کودن چیسه؟ دِه هی جایِ افتخاری ننه! بر اساس چی؟ بر اساس اعمال شریعت؟ البت کی نه، بلکی بر اساس ایمانِ شریعت. 28 چونکی اَمان اعتقاد دَریم کی آدم بی اونکی شریعتِ اعمالَ انجام بِده، ایمانِ امرا صالح بحساب اَیه. 29 مگه خُدا فقط یهودیانِ خُدا ایسه؟ مگه غیر یهودیانِ خُدا نیئه؟ البت کی اون، غیر یهودیانِ خُدائم ایسه، 30 چونکی فقط ایتا خُدا وجود دَره، و اُ خُدا ختنه بُبوسته ئانَ بر طبق ایمان و ختنه نُبوسته ئانَم بر طبق هو ایمان، صالح بحساب آوره. 31 پس اَمان اَ ایمانِ اَمرا شریعتَ از بین بَریم؟ البت کی نه! برعکس، امان شریعتَ پابرجا کونیم. |
@ 2024 Korpu Company