رومیأن 16 - کتاب مقدس به زبان گیلکی - گویش رشت و غرب گیلان

سلام و درود

¹ اَمی خاخور فیبی سفارشَ شمرأ کونم. اون جه كِنخْريه شارِ کلیسا خیدمتکاران ایسه.

² اونَ خُداوند درون، اوجور کی مقدّسین لایق ایسه، قُبیل بُکونید و هر کمکی کی شیمی جا بخواسته مضاقا نُکونید، چونکی اون خَیلیانَ، حتی خودِ مَره، خَیلی کمک بُکوده دَره.

³ می همکاران مسیحْ عیسی درون، پْريسكيلا و آكيلا یَ، سلام فارسانید.

⁴ اوشان، خوشانِ جانَ می واسی خطر درون تَودَئید، و نه فقط من، بلکی تمان غیر یهودیان کلیسائانم اوشانِ جا تشکر کونیدی.

⁵ هَطویَم، به اُ کلیسایی کی اوشانِ خانه درون همدیگر اَمرا جما بیدی، سلام فارسانید. می عزیز رفق اِپینِتوسَ سلام فارسانید، اون اولین کسی بو کی آسیا درون مسیحَ ایمان باورد.

⁶ مریمَ کی شیمی واسی خَیلی زحمت بکشه، سلام فارسانید.

⁷ می فامیلان، آندْرونیکوس و یونیاَ کی می اَمرا خولتانک درون ایسابید، سلام فارسانید. اوشان رسولان میان، سرشناس ایسید کی پیشتر جه من مسیحَ ایمان دَشتیدی.

⁸ می عزیز رفق خُداوند درون آمپْلیاتوسَ سلام فارسانید.

⁹ اَمی همکاران مسیحِ درون، اوربانوس، و می عزیز رفق اِستاخيسَ، سلام فارسانید.

¹⁰ آپلیسَ کی خو امتحانَ مسیح درون پس فَده دَره، سلام فارسانید. آریستوبولُسِ خانواده ی سلام فارسانید.

¹¹ می خویش و قوم هیرودیون و نارکیسوسِ خانواده ی کی خُداوند درون ایسائید سلام فارسانید.

¹² تْريفينا و تْريفوسا، خیدمتکارانیَ کی خُداوندِ خیدمتِ درون زحمت کشیدی سلام فارسانید و پرسیسَم کی می اویتا عزیز رفقِ کی خُداوند درون خَیلی زحمت کشه، سلام فارسانید.

¹³ روفُسَ کی خُداوند درون انتخاب بُبوسته و اونِ مار کی در حقِّ منم ماری بُکوده دَره، سلام فارسانید.

¹⁴ آسینکْریتوس، فْلِگون، هِرماس، پاتْروباس و هِرمس و بقیه ی برارانی کی اَشانِ اَمرا ایسائیدَ، سلام فارسانید.

¹⁵ فيلولوگوس، يوليا، نيرياس و اونِ خاخور، و اوليمپاس و تمانِ مُقّدسینی کی اوشانِ اَمرا ایسائیدَ، سلام فارسانید.

¹⁶ همدیگره ایتا مقّدس ماچی اَمرا سلام بیگید. تمانِ مسیحِ کلیسائان شمرأ سلام فارسانیدی.

آخرتا سفارش

¹⁷ ای براران، خوائم کی شیمی جا خواهش بُکونَم اوشان مراقب بیبید کی سیوایی باعث ایسید و شیمی راه درون سَد نیئیدی و اُ تعلیمی کی شُمان یاد بیگیفتیدِ اَمرا مخالفت کونیدی، اوشانِ جا دوری بُکونید،

¹⁸ چونکی اَجور آدمان اَمی خُداوند مسیحَ خیدمت نُکونیدی، بلکی خوشانِ شِکمِ فکر ایسید و قشنگ گبان و خاش والیسی اَمرا، ساده آدمانَ گُول زنیدی.

¹⁹ شیمی اطاعت کودَنِ آوازه همه کسِ میان دکَفته؛ و شیمی واسی خَیلی ذوق کونم. ولی شیمی جا خوائم کی، اونچی جُلُو که خُبِ، دانا و اونچی جُلُو کی بَدِ، ساده بیبید.

²⁰ صلح و سلامتی خُدا خَیلی زو شیطانَ شیمی لنگانِ جیر له کونه. اَمی خُداوند عیسی فیض شیمی اَمرا بِبه.

²¹ می همکار تیموتائوس شمرأ سلام فارسانه. می خویش و قوم لوکیوس، یاسون و سوسیپاتِر ئم شمرأ سلام فارسانیدی.

²² من، تِرتیوس، کی اَ نامه یَ بینیویشتم، خُداوند درون شمرأ سلام کونم.

²³ گایوس کی من و تمان اوشانِ جا کی اَیا کلیسا درون ایساییدِ جا مِیمانداری بُکود، شمرأ سلام فارسانه. اِراستوس که شار خزانه‌ دار ایسه، و اَمی برار کوآرتوس شمرأ سلام فارسانیدی.

²⁴ «اَمی خُداوند عیسی مسیح فیض شُمان همتان اَمرا بِبه. آمین».

²⁵ هسّا جلال اونَ کی، تانه عین می انجیل و عیسی مسیحِ پیغامِ موعظه شمرأ تقویت بُکونه- یعنی عین ایتا راز واشکافتن کی خَیلی زمات جیگا بُخورده بمانسته بو،

²⁶ ولی الان بنا به پیغمبران بینیویشته ئان و ابدی خُدا حُکمِ اَمرا تمانِ ملتّانِ ره آشکار بُبوست، تا اوشان ایمان باورید و اطاعت بُکونید-

²⁷ اونَ کی تنها خُدای دانا ایسه، بواسطه ی عیسی مسیح تا ابد جلال بِبه! آمین.