رومیأن 15 - کتاب مقدس به زبان گیلکی - گویش رشت و غرب گیلان1 امان كی قوی ایسیم، بایستی اوشانیَ کی ضعیف ایسید، تحمل بُکونیم و اَمی خوشحال کودَنِ دُمبال نيبيم. 2 هرتا جه امان بایستی هر خُبِ چی کی خو همساده درون دینه، هونه باره اونَ خوشحالَ کونه، تا اونِ ایمانَ تقویت بُکونه. 3 چونکی مسیح خو خوشحال کودنِ دُمبال نُبو، بلکی هُطوکی داوود مزمورِ درون بینیویشته بُبوسته: «اوشانِ سرکوفت، کی تَره سرکوفت بزئید، می سر بَکفت.» 4 چون هرچی کی قدیم روجان بینیویشته بُبوسته، اَمی تعلیمِ واسی بو تا مُقاومتِ اَمرا و اُ دیلگرمی کی مُقدّس بینیویشته ئان اَمرا فدا، اُميد بداريم. 5 بِبه کی، خُدایی کی مُقاومت و دیلگرمی دِئه، شمرأ عطا بُکونه تا اوجور کی مسیحْ عیسی خواسته اَمرا جور ایسه همدیگر مرا مُدارا بُکونید، 6 تا همدیگرِ اَمرا یکدیل و یک زوان، اَمی خُداوند عیسی مسیحِ پئر، یعنی خُدایَ پرستش بُکونید. 7 پس هُطوكی مسيح شمرأ گرمی مرا قُبیل بُكود، شُمانم همديگرَ گرمی اَمرا قُبیل بُكونيد، تا خُدا جلال بیگیره. 8 چونکی شمرأ گَم كی مسيح، ختنه بُبوسته ئانِ خیدمتکار بُبوست، تا خُدا راستیَ نیشان بدِه، تا اُ واده ئانَ کی خُدا اَمی اجدادَ فَدَه بو، تصدیق بُکونه، 9 و تا غيريهودیان، خُدایَ اونِ رحمت واسی جلال بدید. هُطوكی مقدس بينويشته ئانِ درون بینیویشته بُبوسته: «پس من تَره غیرِ یهودیان میان ستایش خوائم کودن، و تی نامِ درون آواز خوانَم.» 10 ایوار دِه گه: «ای غیر یهودیان، اونِ مردومِ اَمرا شادی بُکونید!» 11 و بازم مزمور کتابِ درون گه: «ای تمانِ غیر یهودیان، خُداوندَ ستایش بُکونید! بِبه کی تمانِ مردومان، اونَ جلال بدید!» 12 و ایوارده اِشعیا پیغمبر ئم گه: «یَسا بَنه، خوائه آمون، کسی کی ویریشته تا غیر یهودیانِ سر حُکمرانی بُکونه؛ غیر یهودیان اونِ سر اُمید خوائید داشتن.» 13 بِبه، خُدايی کی اُميد فَدِه شمرأ تمانِ شادی و صلح و سلامتی کی ایمانِ درونِ، پُر بُکونه، اوجور کی روح القدّسِ قوتِ مَرا اُمید جا لبالب پُر بیبید. پولُسِ خیدمت غير يهوديانِ ره 14 ای می براران، من خودم شیمی جا خاطر جمع ایسَم کی شُمان خودتان خُبی جا پُر ایسید و دانایی جا کاملا پُر ایسید و تانیدی همدیگرَ تعلیم بدید. 15 ولی چن تا جریانِ باره خَیلی جسارت بُكودم، شمرأ بینیویشتم تا اوشانَ شیمی یاد باورم، چون خُدا اَ فیضَ مَره فَدَه، 16 کی غیر یهودیانِ ره مسیحْ عیسی، نوکر بَبم و خُدا انجیلِ خیدمت کودنِ ره کاهنی بُکونم، تا غیر یهودیان، خُدا حضور درون ایتا قابیل قُبیلِ پیشکش بیبید کی بواسطه ی روح القدّس تقدیس بُبوسته دَره. 17 پس من مسیحْ عیسی درون اَ خیدمتی کی خُدا واسی کودن دَرَمِ ره دلیل دَرَم کی افتخار بُكونم. 18 چونکی جرأت نُکونَم هیچی بگم، اِلا اونچی کی مسيح بواسطه ی من به انجام فارسانه، تا غير يهوديانَ ایمانِ مطیع بُکونَم، بواسطه ی می گبان و می کاران، 19 اون نیشانه ئان و مُعجزاتِ نیرو اَمرا، يعنی خُدا روحِ نيرو اَمرا- اَنه انجام بدَه، هُطوکی اورشلیمِ جا تا ایلیریکوم بُشوم، مسیحِ انجیلِ خیدمتَ تمامن، انجام بدَم. 20 می آرزو همیشک اَن بو کی اُ جائی انجیلَ موعظه بُکونم کی مسیحِ نامَ نیشناوسته بید، تا نَبه کی من اینفر دیگرِ پی سَر بنائی چاکونَم، 21 هُطوکی اشعیای پیغمبر کتاب درون بینیویشته بُبوسته: «اوشانی کی اونِ جا بی خبر بید، دینیدی، و اوشانی کی نیشتاوسته بید، فهمیدی.» 22 اَنه واسی ایسه کی، چن وار خواستیم بایَم شیمی وَرجا و نُبوسته. 23 ولی هسّا، چونکی اَ منطقه درون، دِه مِره کاری نمانسته کی بُکونم، و جه اویا کی خَیلی ساله ذوق دَرم شیمی ورجه بایم، 24 اُمید دَرم کی وقتی اسپانیا شئون دَرَم می راه سَر شمرأ بیدینَم، تا بعد اونکی ایپچه شمرأ بیدِم، مَره اُ سفرِ واسی کی اویا شئون دَرَم یاری بدید. 25 ولی الان، خوائم اورشلیمِ شار بَشم تا اویا مُقّدسینِ ره کمک مالی ببرَم. 26 چونکی مُقدونیه و اَخائیه کلیسائان خوائیدی اورشلیمِ مقّدسینِ ناداران ره کمک مالی جما کونید. 27 اوشان خودشان خواستیدی اَ کار بُکونید؛ و راس راسی اوشان اورشلیم ایماندارانِ مَدیون بید. چون اَگه غیر یهودیان، روحانی برکاتِ درون یهودیان اَمرا شریک بُبوستید، یهودیانَم بایستی برکات مالی درون اوشانَ خیدمت بُکونید. 28 پس وختی اَ کارَ تمانَ کودم و اونچیَ کی جمعَ بوسته اوشانِ دَس فارسانَم، شیمی راه جا اسپانیا سمت شَم. 29 دانم وختی کی شیمی ورجه بایم، مسیحِ برکتِ اَمرا کی فراوان ایسه، اَیم. 30 ای براران، اَمی خُداوند عیسی مسیح واسی و محبتی کی روح القدّس درون نَئه، شیمی جا خواهش کونم کی همیشک خُدا حضور میان مِره دُعا بُکونید و اَ کار اَمرا می خیدمت درون شریک بیبید. 31 تا یهودیه بی ایمانانِ دَسِ جا، جان سالم به دَر بَبرم و می خیدمت، اورشلیم واسی، مُقدّسین ره قُبیل ببه. 32 بازین، خُدا بخوائه ذوق مرا شیمی ورجه بایم و شیمی اَمرا ایتا تازه جان بیگیرم. 33 صلح و سلامتی خُدا شیمی همتانِ اَمرا ببه. آمین. |
@ 2024 Korpu Company