رومیأن 13 - کتاب مقدس به زبان گیلکی - گویش رشت و غرب گیلان

اطاعت کودن صاب مَنصبانِ جا

¹ هرکس بایستی صاب مَنصبانِ جا فرمان بِبره. چونکی هی صاب مَنصبی نئسا، جغیر خُدا طرف. صاب مَنصبانی هم کی ایسائید، خُدا طرف جا مُعین بُبوستید.

² پس هرکسی کی صاب مَنصبانِ ضد ویریزه، ضد اونچی کی خُدا معین بُکوده ویریشته، و اوشانی کی اَطو کونیدی، داوری بیدی.

³ چون اوشانی کی دُرُست رفتار کونیدی حاکمانِ جا ترس ناریدی، ولی خلافکاران اوشانِ جا ترسیدی. خوائی صاب مَنصبانِ جا نترسی؟ پس، اونچیَ کی دُرُسته انجام بدَن کی تَره تحسین خوائه کودن،

⁴ چونکی اون تی خیرِ واسی خُدا خیدمتکار ایسه. ولی اَگه کار خلاف بُکونی، بترس، چونکی هَچین شمیشیرَ خو کمر دَنوَسته. اون خُدا خیدمتکارِ و کسی ایسه کی خُدا واسی انتقام گیره و خُدا غَضبَ خلافکارِ سر آوره.

⁵ پس آدم بایسی نه فقط خُدا غَضبِ واسی، بلکی وجدانِ واسی هم فرمان ببره.

⁶ اَنه واسی ئَم شُمان مالیات فادیدی، چونکی صاب مَنصبان، خُدا خیدمتکاران ایسید و اَ چیانِ جا مواظبت کونیدی.

⁷ هرکسِ حقَ اونَ فادید: اَگه خراجِ، خراج فادید، اَگه مالیاتِ، مالیات فادید، اَگه احترامِ، احترام بَنید و اَگه حُرمتِ، حُرمت بَنید.

شریعت بجا آوردَن، بواسطه ی محبت

⁸ هی دِینی هیکّسِ گردن ندَرید، جغیر اَنکی همیشک همدیگرَ محبت بُکونید، چونکی هرکس اینفرَ محبت بُکونه، شریعتَ بجا باورده.

⁹ چونکی اَ حکمان، ’زینا نُکون‘، ’قتل نُکون‘، ’دوزی نُکون‘، ’طمع نُکون‘، و هر تا حُکم دیگری کی بِبه، همتان اَ کلام درون خلاصه به کی «تی همساده یَ خودت مانستن دوست بِدَر.»

¹⁰ محبت، خو همساده یَ بَدی نُکونه؛ پس محبت، شريعتَ تمان و کمال به انجام فارسانه.

¹¹ بعلاوه، شُمان دَنیدی کی چی زمات درون ایسائیدی، هسّا اونِ وقت فارسه کی خوابِ جا ویریزید. چره کی الان در مقایسه با اُ زماتی کی ایمان باورده بیم، اَمی نجات نزدیکتر بُبوسته.

¹² شب تمانَ بوستن دَره و روج نزدیکِ. پس بائید تاریکی بَدِ کارانَ، ایتا کنار توَدیم و نورِ زِره یَ دُکونیم.

¹³ بائید دُرُس رفتار بُکونیم کی، شایسته اوشانی ایسه کی روج روشنایی درون سَر کونیدی، نه عیاشی و عرق خوری درون، نه زینا و هرزِگی درون، نه دعوا مرافع و حسودی درون.

¹⁴ بلکی عیسی مسیحِ خُداوندِ شخصیتَ، ایتا رخت مانستن دُکونیدی و جسمِ هوا و هوسِ واسی تدارُک نیدینیدی تا اونِ خواسته ئانَ بجا باورید.