رومیأن 11 - کتاب مقدس به زبان گیلکی - گویش رشت و غرب گیلاناسرائیلِ باقیمانده ئان 1 پس واورسم: مگه خُدا خو مردومَ رّدَ کوده؟ هرگس! چونکی من خودم اسرائيلِ شینَم، ابراهيمِ نسل جا و بنيامينِ طایفه. 2 خُدا خو مردومَ كی پيشتر سیوا بُکوده بو، رّدَ نُكوده. مگه نانیدی مُقّدس بینیویشته ئان ایلیا پیغمبر باره چی گه؟ کی اون چُطو اسرائيلِ مردومِ ضد، خُدا ورجه گیلگی بُکود و بُگفت؟ 3 «خُداوندا، اَشان تی پیغمبرانَ بُكوشتيد و تی قربانگائانَ ویرانَ کودید. فقط من بمانستم و هسّا خوائیدی مَرَم بُكوشيد.» 4 ولی خُدا اونَ چی جواب بدَه؟ اَنکی «من مَره هفت هیزار نفرَ کنار بَنم کی بَعَلِ بُتِ جُلُو زانو نِزِه ئید.» 5 جه اَ رو، هه الانم الباقی ئانی ایسائید کی خُدا فیض راه جا انتخاب بُبوستید. 6 ولی اَگه فیضِ راه جا بِبه، دِه اعمالِ واسی نیئه؛ وگرنه فیض دِه فیض نیئه. ولی اَگه اعمالِ راه جا بِبه، دِه فیضِ واسی نیئه؛ وگرنه عمل دِه عمل نیئه. 7 بعد چی؟ اَنكی، اونچیَ کی اسرائيلِ مردوم ذوق و شوق اَمرا، اونِ گیفتنِ دُمبال بید، بدَس ناوردید، انتخاب بُبوسته ئان بدَس باوردید، ولی الباقی به سخت ديلی دُچارَ بوستید، 8 هُطوکی مُقدّس کتابانِ درون بینیویشته بُبوسته: «تا ایمرو خُدا سُستِ روح اوشانَ فدَه و چومانی کی نتانید بیدینید و گوشانی کی نتانید بیشتاوید.» 9 و داوود پادشاه گه: «اَشانِ سفره اَشانِ ره دام و تله ببه، سنگی کی اوشانَ زمین زنه و اَشانِ ره مکافات ببه؛ 10 اَشانِ چومان تار ببه تا نتانید بیدینید، و اَشانِ کَمران همیشک فچمسته بمانه.» 11 پس واورسم: یعنی اوشان تاش بُخوردَد تا همیشک بکَفد؟ هرگس! بلکی اوشانِ نافرمانی اَمرا، غیر یهودیان نجاتَ بیگیفتید، تا اسرائيلِ مردومِ میان غیرت بوجود بایه. 12 ولی اَگه اوشانِ تقصیرات دُنیایَ ثروتمند بُکود و اَشانِ دَباختن غیر یهودیانَ ثروتمند بُکود، پس وقتی کی یهودِ مردوم کاملا نجات بیابید چنقد ویشتر فراوانی باعث به! 13 هسّا، شُمان غیر یهودیانِ اَمرا گب زِئن درم. جه اویا کی من غیر یهودیانِ رسول ایسم، می خیدمت ره خَیلی افتخار کونم، 14 اَ اُميد اَمرا كی می هم نژادانَ غیرتی بُکونم و بعضی جه اوشانَ نجات بدم. 15 چونکی اَگه، اَشانِ رّدَ بوستنِ معنی، خُدا آشتی، دُنیا امرا ایسه، اَشانِ قُبیل بوستن چی معنی خوائه داشتن، جغیر مُرده ئانِ جا زنده بوستن؟ 16 اَگه ایی پَلک خمیرِ جا کی نوبری واسی خُدا ره پیشکش به، مُقّدس ببه، پس اَطویی تمانِ اُ خمیر مُقّدس ایسه؛ و اَگه بَنه مُقّدس ببه، پس خالانَم مُقّدس ایسید. 17 ولی اَگه بعضی جه خالان واوه بُبوستید و تو کی واحشی زیتونِ خال بی، الباقی خالانِ اَمرا زیتون دارَ پیوند بُخوردی و هسّا زیتون دار بَنه شیره جا کی مقّوی خوری، 18 اُ خالانِ واسی گُلاز نُکون. اَگه اَطو کونی، تی یادِ جا نَبر کی تو نیئی کی بَنّه یَ دَری، بلکی بَنه تَره دَره. 19 شايد بیگی: «خالان واوِه بُبوستيد تا من پيوند بُخورم.» 20 راست گی. ولی اوشان، ایمان ناشتنِ واسی واوه بُبوستید و تو فقط تی ايمانِ خاطری ایسائی. پس غُرور نَوا داشتن بلکی بترس. 21 چونکی اَگه خُدا طبیعی خالانِ ره رحم نُکود، تَره هم رحم نُکونه. 22 پس خُدا سخت گیری و مهربانیَ جه خاطر نَبر: سخت گیری اوشانِ ره کی ایمانِ جا بکفتید، ولی تی امرا مهربانِ، البت به اَ شرط کی اونِ مهربانی درون ثابت بمانی؛ وگرنه تونَم واوه بی. 23 اَگه اوشانم ایمان ناشتنَ دُمباله نَدید، بازم پیوند خوائید خوردن، چونکی خُدا تانه اوشانَ ایوار دِه پیوند بزنه. 24 چونکی اَگه تو واحشی زیتون دارِ جا واوه بُبوستی و بر خلافِ تی طبیعت، زیتون دارَ کی آزاده، پیوند بُخوردی، پس چنقد ویشتر اصلی خالان تانیدی اُ زیتون داریَ کی اونِ جا واوه بُبوستید، پیوند بُخورید. اسرائیل مردوم نجاتِ راز 25 ای براران، نخوائم کی اَ رازِ جا بی خبر بیبید - نَبه کی خودتانَ دانا بدَنید: کی قسمتی جه اسرائیل مردومِ سَر، سخت دیلی حکمفرما بُبوست، تا اوشان تعداد کی قرار ایسه غیر یهودیانِ میان مسیحَ ایمان باورید، کامل ببه. 26 و اَطویی تمانِ اسرائیل مردوم نجات خوائید گیفتن. هُطوکی مُقدّس بینیویشته ئان درون بینیویشته بُبوسته: «صهیونِ جا اینفر آیه کی نجات دِئه، و بی دینیَ یعقوبِ جدِ جا خوائه گیفتن. 27 و اَن، می عهد ایسه اَشانِ اَمرا اُ زمات کی اَشانِ گُنائانَ اوسانَم.» 28 انجیل باره، یهودیان شیمی خاطری دُشمندید: ولی خُدا انتخاب باره، پئرانِ خاطری، خُدا ره عزیزید. 29 چونکی خُدا هرگس خو دعوت و هدیه ئانَ پس فانگیره. 30 دُرُست هُطوکی شُمان زماتی نسبت به خُدا نافرمانی کودیدی، ولی هسّا یهودیان نافرمانی واسی مورد رحمت خُدا قرار بیگیفتید، 31 پس الان اَشانم نافرمان بُبوستید تا خُدا رحمت واسی شمرأ، هَسّا اوشانِ ره ئَم رحم ببه. 32 چونکی خُدا همتانَ، نافرمانی گرفتار بُکوده، تا همتانِ ره رحم بُکونه. 33 وای، کی خُدا دولتمندی و حکمت و دانایی چنقده عمیقِ! اونِ داوری ئانَ نِشه واموجستن و اونِ رائانَ نِشه فهمستن. 34 «چون، کیسه کی خُداوند فیکرَ بدانه یا کی اونِ امرا مشورت بُکوده؟» 35 «کیسه کی ایچی خُدایَ بِبخشه بی تا اونَ پس فدَه بِبه؟» 36 چونکی همه چی اونِ جا ایسه، و بواسطه اون، و اونِ شین ایسه. تا ابد اون ره جلال ببه. آمین. |
@ 2024 Korpu Company