موکأشفه 7 - کتاب مقدس به زبان گیلکی - گویش رشت و غرب گیلانمُهر بُبوسته ئانِ تعداد 1 بازون، چارتا فیریشته بيدِم، زمين چار گوشه ایسائیدی و زمينِ چارتا بادِ جُلُویَ گیفتیدی تا هی بادی زمینِ سر و دريا سر و هی دارِ سر نایه. 2 بازین ايتا دِه فیریشته بيدم جه اُ جایی کی آفتاب بُجور اَیه، آسمانَ بُجور بشو و خُدایِ زنده مُهر، اونِ امرا بو، و پیله اوخانِ مَرا اُ چارتا فیریشته یَ كی اوشانَ قدرت فدَه بُبوسته بو تا زمین و دريایَ ضرر بزنید، دوخواد و 3 بگفت: «تا اُ زمات کی اَمان اَمی خُدا نوکرانِ پيشانی سر مُهر نَزِئيم، زمین یا دريا یا دارانَ ضرر نزنید.» 4 و بيشتاوستم كی مُهر بُبوسته‌ئانِ تعداد صد و چهل و چار هازار نفر جه تمانِ اسرائيلِ مردومِ طایفه ئان بو. 5 يهودا طایفه جا دوازده هازار نفر مُهر بُبوستيد، رِئوبينِ طایفه جا، دوازده هازار نفر، جادِ طایفه جا، دوازده هازار نفر، 6 اَشيرِ طایفه جا، دوازده هزار نفر، نَفتالی طایفه جا، دوازده هازار نفر، مَنَسی طایفه جا، دوازده هازار نفر، 7 شمعونِ طایفه جا، دوازده هازار نفر، لاوی طایفه جا، دوازده هازار نفر، یِساکار طایفه جا، دوازده هازار نفر، 8 زِبولونِ طایفه جا، دوازده هازار نفر، يوسفِ طایفه جا، دوازده هازار نفر، و بنيامينِ طایفه جا، دوازده هازار نفر مُهر بُبوستيد. پیله جماعتی هر ملّت جا 9 بازون فندرستم و بیدین، ایتا پیله جماعت کی هیکّس نتانستی اونَ بیشماره، جه هر ملّت و هر طایفه جا و هر مردوم و زوانِ جا، همتان اُ تخت و برّه جُلُو ایسابید، سفيد قبا به تن دوكوده و نخل خالانَ بدَس داشتيد. 10 اوشان پیله اوخانِ مَرا خواندیدی: «نجات اَمی خُدا شينه، كی تختِ رو نيشته؛ و برّه شينه.» 11 و تمانِ فیریشته‌ئان، تخت دور و پیران و چارتا زنده مخلوق دور ایسابید؛ و اوشان تخت جُلُو خوشانِ دیمِ مرا زمين سر بکفتید و خُدایَ پرستش كوديدی و 12 گفتیدی: «آمین! ستایش و جلال حكمت، شُکر و حرمت و قوت و قدرت اَمی خُدا ره بِبه، تا اَبد و تا اَبد. آمين!» 13 بازین ايتا جه اُ پیران مَرا دوخواد و بگفت: «اَشان كی سفيدِ قبا دوکوده دَریدی، كیسيد و جه كويا باموئید؟» 14 من اونَ جواب بدَم: «اَی آقا، اَنَه تو دانی.» و اون مَرا بگفت: «اَشان هوشانی ایسید كی اُ پیله عذابِ جا بیرون باموئید و خوشانِ قبائانَ برّه خونِ درون بُشوستيد و سفيدَ كوديد. 15 اَنه واسیه كی: « اَشان، خُدا تختِ جُلُو ايسائید، و اونِ معبدِ درون شبنده روج اونَ خیدمت كونيدی؛ و اُ تخت نيشين، خو حضورِ امرا اوشانَ سرپناه فَدِه. 16 اوشان دِه ویشتا نیبیدی، و دِه تشنه نخوائيد بوستن، نه آفتاب اوشانِ سر فتاوه، و نه هی گرمایی کی بُسوجانه. 17 چون اُ برّه ای کی تختِ میان ایسَه، اوشانِ شبان خوائه بوستن، و اوشانَ، زیندگی آبِ چشمه‌ئانِ سو، رانمایی خوائه کودَن. و خُدا هر آرسوییَ اوشانِ چومانِ جا پاکَ كونه.» |
@ 2024 Korpu Company