موکأشفه 5 - کتاب مقدس به زبان گیلکی - گویش رشت و غرب گیلانطومار و بَرّه 1 اُ موقع اُ تخت نيشينِ راست دَسِ درون ایتا طومار بیدم كی اونِ پوشت و رو، بینیویشته بو و هَفتا مُهرِ اَمرا مُهروموم بُبوسته بو. 2 و ایتا قوی فیریشته بيدم كی بُلند صدا امرا اعلام کودی: «كيه كی قابیل ببِه طومارَ واکونه و اونِ مُهرئانَ بشکنه؟» 3 و هیکّس آسمان درون، یا زمينِ سر، یا زمينِ جیر، نتانسته طومارَ واکونه يا اونِ درونَ نيگاه بُكونه. 4 و من بنا بُکودم زار زار گريه كودَن، چونكی هیکّس پيدا نُبوسته كی قابیل بِبه تا اُ طومارَ واكونه يا اونِ درونَ نيگا بُکونه. 5 اُ موقع ايتا جه اُ پیران مَرا بگفت: «گريه نوا کودن؛ بیدین، اُ شير کی يهودا طایفه جا ایسه و داوودِ رگ و ریشه شینِ، پيروز بُبوسته، تا طومار و اونِ هَفتا مُهرَ واكونه.» 6 و تختِ وسط، اُ چارتا زنده مخلوق و پیرانِ میان ایتا بَرّه بیدِم ایسابو كی قربانی مانستن بو کی هَفتا شاخ و هَفتا چوم داشتی، كی خُدا هَفتا روح ایسید كی تمانِ زمينِ سر اوسِه بُبوستید. 7 و بَرّه بُشو و اُ تخت نیشینِ راست دَسِ جا طومارَ فيگيفت. 8 هَطوكی طومارَ فيگيفته، اُ چارتا زنده مخلوق و اُ بيست و چارتا پیر، بَرّه جُلُو بكفتيدی، هرتا جه اوشان، ایتا سازِ چنگ بدَس داشتيدی و جام ئانی طلا جا دَاشتیدی، کی بُخورِ جا پُر بو كی هو مُقدّسینِ دُعائان ایسه. 9 و اوشان تازه سرودی بخواندید، كی گفتی: «تو قابیل ایسی کی اُ طومارَ بیگیری و اونِ مُهرئانَ بشکنی، چره كی قربانی بُبوستی، و تی خونِ مَرا مردومَ جه هر طایفه و زوان و مردوم و ملّت، خُدا ره بیهئی؛ 10 و اوشانَ اَمی خُدا ره پادشاهی و كاهنان بکودی، و اوشان، زمينِ سر سلطنت خوائيد كودن.» 11 بازون نيگاه بُكودم و خَیلی فیریشته‌ئانِ صدایَ بيشتاوستم، كی اُ تخت و زنده مخلوقان و اُ پیرانَ دُورَ کوده بید. اوشانِ تعداد، دسته به دسته، هازاران هازار تا بید. 12 بُلندِ صدا مَرا گفتيدی: « اُ بَرّه کی قربانی بُبوست قابیل ایسه کی قُدرت و ثروت و حكمت و قُوت، و حُرمت و جلال و برکت اونِ ره تقدیم بِبه.» 13 بازون بيشتاوستم کی هرتا خلق بُبوسته كی آسمانِ درون و زمينِ سر و زمینِ جیر، و دريا درون دَره، و هر چی كی اوشانِ درون نَئه، گیدی: «اُ تخت نيشين ره و بَرّه ره ستایش و حُرمت، و جلال و قوت بایه، تا ابد و تا ابد.» 14 و اُ چارتا زنده مخلوق بگفتیدی: «آمين» و اُ پیران، دیمِ مَرا زمينِ سر بكفتيد و اونَ پرستش بُكوديدی. |
@ 2024 Korpu Company