فیلیمون 1 - کتاب مقدس به زبان گیلکی - گویش رشت و غرب گیلان

¹ پولُسِ جا، مسیحْ عیسی زندانی، و اَمی برار تیموتائوس، اَمی عزیز همکار فیلیمونِ ره،

² اَمی خواخور آپْفیا و اَمی هم رَزم آرخیپوس، و کلیسایی کی تی خانه درونِ:

³ فیض و صلح و سلامتی اَمی پئر، خُدا و خُداوندْ عیسی مسیحِ طرفِ جا، شمرأ بایه.

فیلیمونِ محبت و ایمان

⁴ من می دُعائانِ درون تَره یاد آورم، همیشک می خُدای شُکر کونَم،

⁵ چونکی من تی محبت و ایمانِ باره کی خُداوندْ عیسی و تمانِ مُقدّسین ره دَری ایشتاوَم،

⁶ و دعا کونَم مشارکتی کی تی ایمانِ درون دَری، کمک بُکونه و مسیحِ خاطری هر خُبِ چی باره کی اَمی درون دَره، ایتا تمان و کمالِ شناختَ ثمر باوَره.

⁷ ای برار، چونکی تی محبتِ جا خَیلی شاد بُبوستَم و تَسلی بیگیفتَم، انه واسی کی مُقدّسینِ دیلان بواسطه تو ایوارده جان بیگیفت.

پولُسِ خواهش اونیسیموس باره

⁸ جه اَ رو، هرچن مسیحِ درون اَ جرأتَ دَرم تَره حکم بُکونَم تا اونچیَ کی لازم ایسه، انجام بَدی

⁹ با اَن وجود، محبتِ واسی صلاح دَنَم کی تی جا خواهش بُکونم: من، پولُس کی ایتا پیر مَرداکم، و الانَم مسیحْ عیسی زندانی ایسَم،

¹⁰ می زای اونِسیموسِ باره کی زندان درون اونِ پئر بُبوستم، تی جا خواهش دَرم.

¹¹ اون، قدیمان تِره فایده ناشتی، ولی هسّا، هم تِره و هم مِره فایده دَره.

¹² من می جگر گوشه یَ تی ورجه اوسه کونم.

¹³ من خوشحال، بوستیم کی اونَ می ورجه بداشته بیم تا اَ زماتی کی انجیلِ واسی زندانِ درونم، بجای تو اون مَرا خیدمت بُکونه.

¹⁴ ولی صلاح بدانستَم کی بدونِ تی رضایت کاری نُکونَم، تا تی خُبی کودَن زوری نَبه بلکی تی میل امرا بِبه.

¹⁵ شاید چون، اَنه خاطری بو کی ایپچه زمات تی جا سیوا بُبوست، تا دِه همیشک ره تی ورجه واگرده،

¹⁶ ولی دِه نه نوکر مانستن، بلکی نوکرِ جا بُجورتر، ایتا عزیز برار مانستن. بخصوص مِره، ولی چنقد ویشتر تَره، هم جسم درون هم خُداوند درون.

¹⁷ پس اگر مَرا تی ریفق دانی، اونَ هُطو قُبیل بُکون کی مَرا قُبیل بُکودی.

¹⁸ اگر تَره بَدی بُکوده، یا ایچی تَره بدهکار ایسه، اونَ می حساب بَنه.

¹⁹ من، پولُس، می دَسِ مرا نیویسم: من اونَ تلافی خوائم کودن- البت لازم نیئه بگم کی تو، تی جانَم می مدیونی.

²⁰ بله ای برار، خوائَم کی خُداوندِ درون تی جا مرا منفعتی فارسه. می جانَ مسیح درون تازه بُکون.

²¹ اَنه نیویسم چونکی تی اطاعت کودَنِ جا خاطر جمع ایسَم و دانم کی حتی ویشتر جه اونچی کی گَم، خوائی کودَن.

²² ضِمنن، ایتا اتاق مِره آماده بُکون، چونکی اُمید دَرم خُدا شیمی دُعائانَ مستجاب کونه و به لوطف خودِش مَرا شیمی ورجه واگردانه.

²³ اِپافْراس، کی مسیحْ عیسی واسی می امرا زندانِ درون ایسا، تَره سلام فاراسانه،

²⁴ و هَطو می همکارانم، مَرقُس، آریستارخوس، دیماس و لوقا تَره سلام فاراسانیدی.

²⁵ خُداوندْ عیسی مسیحِ فیض شیمی روح امرا بِبه.