مَرقُس 7 - کتاب مقدس به زبان گیلکی - گویش رشت و غرب گیلانرسم و رسوم و حکمان 1 وقتی کی فَریسی فرقه عالمان، بعضی جه تورات آموجگاران اَمرا کی اورشلیم جا باموبید بید، عیسی دور جَم بُبوسته بید، 2 بیده ئید بعضی جه عیسی شاگردان نجست دَسان مرا، یعنی نُشوسته دس مرا، غذا خوریدی. 3 چونکی فَریسیان و تمان یهودیانم، اَنه واسی کی ریش سیفیدان سُنّتَ بدَرید، تا خوشان دَسانَ خُب نُشورید، غذا نُخوریدی. 4 وقتی بازار جا اَئیدی، تا بُشور واشور نُکونید، هیچّی نُخوریدی. خَیلی رسم و رسوم دیگه ئم دَشتیدی کی بجا آوریدی، پیاله ئان، تیانان، مِرسی کاسه بوشقاب و میزئان شوستنِ مانستن. 5 فَریسیان و تورات آموجگاران عیسی جا واورَسه ئید: «چره تی شاگردان عین ریش سیفیدان رسم و رسوم رفتار نُکونیدی، و نجست دَسان مرا غذا خوردیدی؟» 6 عیسی اوشان جواب بدَه: «اِشَعیای پیغمبر شُمان ریاکاران باره چنقد خُب پیشگویی بُکوده! هُطو کی بینیویشته بُبوسته، «”اَ مردوم خوشانِ زوان اَمرا، مَرا احترام نئیدی، ولی اوشانِ دیلان می جا دوره. 7 اوشان هَچین مَرا پرستش کونید، و اَشانِ تعلیم هیچی جغیر آدمی حُکمان نیه.“ 8 شُمان خُدا حُکمَ وِلا کودید و آدمی رسم و رسومات بچسبستیدی.» 9 و دُمباله بدَه: «شُمان زرنگی مرا خُدا حُکمَ رَدَ کونیدی تا شیمی رسم و رسومَ بجا باورید! 10 چونکی موسی پیغمبر بگفت،”تی پئر و مار احترامَ بدَر،“ و ”هر کی خو پئر یا مارَ فاش بده، بایسی اونَ بُکوشید.“ 11 ولی شُمان گیدی: اَگه اینفر خو پئر و مارَ بگه ”هرچیَ کی بایسی کمک ره شمرأ فدَه بیم، خُدا شینِ و خُدا ره وقف بُکودم“ 12 اَطویی وئنلانیدی هی کاری خو پئر یا مار ره بُکونه. 13 هَطوئم شُمان شیمی رسم و رسومِ مرا، کی دیگرانَم یاد دیئیدی، خُدا کلامَ نیده بو گیریدی و خَیلی ده اَجور کارانم کونیدی.» چی آدمیَ نجستَ کونه 14 عیسی ایوار دِه مردومَ خو ورجه دوخواد و بگفت: «شُمان همه مَرا گوش فَدید و اَنه بفهمید: 15 هیچّی بیرون جه آدمی ننَه کی وقتی اون وجود درون بشه اونَ نجست بُکونه، بَلکی اونچی کی آدمی وجود جا بیرون اَیه، اونَ نجستَ کونه. 16 هر کی گوش ایشتاوستن ره دَره، بیشتاوه! 17 عیسی بعد اونکی جمعیتَ تَرکا کود و بخانه بُشو، اونِ شاگردان اُ نقل معنیَ اونِ جا واورسه ئید. 18 عیسی اوشانَ بگفت: «شُمانم نفهمیدی؟ مگه نانیدی کی اونچی کی جه بیرون آدمی وجود درون شه، نتانه اونَ نجستَ کونه؟ 19 چونکی اونِ دیل درون نیشه، بَلکی اونِ شکم درون شه و بازین دفع به.» عیسی اَ گب مرا، تمان غذائان پاک اعلام بُکود. 20 عیسی دُمباله بدَه: «اونچی کی آدمی درون جا بیرون اَیه، اونِ کی ،آدمیَ نجست کونه. 21 چونکی آدمی وجود و دیل جائه کی: پلید فیکران، شهوت، دوزی، قتل، زینا، 22 طمع، شرارت، حیله، هَرزگی، حسودی، ایفترا، غرور و نادانی بیرون آیه. 23 تمان اَ بَدِ چیانِ کی آدمی وجود جا بیرون اَیه و اونَ نجستَ کونه.» فینیقیه زنایِ ایمان 24 عیسی اویا تَرکا کود و صور و صِیدون منطقه بُشو. ایتا خانه بدرون بُشو؛ و نخواستی هیکّس خبردار ببه. با اَن همه نتانستی خوره جیگا بده. 25 ایتا زنای کی اونِ کوجی کُر پلید روح دَشتی، وقتی کی عیسی باره بیشتاوست، درجا بامو و عیسی لنگان جیر بکفت. 26 اُ زنای جغیر یهودی و فینیقیه سوریه شین بو. اون عیسیَ منّت بُکود دیوَ اونِ کُرِ جا بیرونَ کونه. 27 عیسی اُ زنایَ بگفت: «وائال اول زاکان سئرَ بید، چونکی زاکانِ نانَ فیگیفتن و سَگانِ جُلُو تَوَدَن دُرست نیه.» 28 اُ زنای عیسیَ جواب بدَه: «بله آقا، با اَ حال حتی سَگانم، خُرده نانانی کی زاکانِ سفره جا فیوه خوریدی.» 29 عیسی اُ زناکَ بگفت: «تی اَ گب واسی، بوشو کی دیو تی کُر جا بیرون بامو!» 30 اُ زنای بخانه فارسه، و بیده کی اونِ زای جیگا سر دراز بکشِه و دیو اونِ جا بیرون بامو دَره. عیسی ایتا کَرِ مرداک شفا دئه 31 بازون عیسی صور منطقه جا واگردَست، و صِیدون راه جا جلیل دریا سو بُشو. اون دِکاپولیسِ منطقه جا دَوارستی. 32 اویا ایتا مرداکَ عیسی ورجه باوردید کی هم کَر بو و هم جودکی دَشتی. اوشان عیسی جا بخواستید خو دَسَ اُ مرداک سر بَنه. 33 عیسی اُ مرداکَ جه خلق میان بیرون باورد، ایتا گوشه ببَرد و خو انگوشتانَ اونِ دوتا گوش میان بنه. بازون فیلّی فکود و اُ مرداک زوانِ سر بِمالست. 34 هو موقع عیسی آسمانِ فندرست، ایتا آه بکشِه و اُ مرداکَ بگفت: «اِفاتاح!» یعنی «وازا بو!» 35 هو دَم اُ مرداکِ گوش وازا بو و اونِ جودکی خُبَ بو و بتانسته کی راحت گب بزنه. 36 عیسی اوشانَ قدغن بُکود کی اَ جریانَ هیکّس ره نگد. ولی هر چی ویشتر اوشانَ قدغن کودی، ویشتر اَ جریان جا گب زئیدی. 37 مردوم کی خَیلی ماتا بوسته بید، گفتیدی: «هر کاری بُکوده، خُبه؛ اون حتی کاری کونه کی کران ایشتاویدی و لالان گب زنیدی!» |
@ 2024 Korpu Company