متّی 28 - کتاب مقدس به زبان گیلکی - گویش رشت و غرب گیلانعیسی زنده بوستن 1 بعد مُقدّسِ شنبه، صوب دَم هفته اوّلتا روج، مریم مَجدَلیّه و اویتا مریم مقبره دِئن ره بُشوئید. 2 ناخبر ایتا پیله زمین لرزه ایتفاق دکفت، چونکی خُداوندِ ایتا فیریشته آسمان جا بجیر بامو و مقبره سو بُشو و سنگَ جه اونِ جُلُو ایتا گوشه گیل بدَه و اونِ سر بینیشت. 3 اُ فیریشته دیم آسمان بَرخِ مانستن سو زئی و اونِ رخت وَرف مانستن، سیفید بو. 4 مأمورانی کی اویا پاستن دیبید اونِ دِئن مرا، ترسِ جا بپرکستید و مُرده ئان مانستن بُبوستید! 5 هو موقع فیریشته زناکانَ بگفت: «هراسان نیبید! دانم کی عیسیَ واموجیدی کی اونَ مَصلوب بُکوده بید. 6 اون اَیا نئسا، چون هُطو کی بگفته بو، زنده بُبوست! بائید و اویا کی اونَ بنه بیدَ بیدینید، 7 بازین درجا بیشید و اونِ شاگردانَ بیگید کی ”اون مُرده ئان جا زنده بُبوست و پیشتر جه شُمان جلیلِ سو شه. اویا اونَ خوائید دِئن.“ بیدینید، شمرأ بگفتم!» 8 پس زناکان کی بترسه بید و خیلئَم ذوق دَشتید، درجا مقبره جا بُشوئید و شاگردانِ سمت بُدوبستید تا اَ ایتفاقَ اوشان ره خبر ببرید. 9 ناخبر عیسی اَشانِ مرا چوم به چوم بُبو و بگفت: «سلام بر شُمان!» زناکان جُلُو باموئید و عیسی لنگان جیر بکفتید و اونَ پرستش بُکودید. 10 بازون عیسی اَشانِ بگفت: «نترسید! بیشید و می برارانَ بیگید کی جلیل ولایت سو بیشید. اویا مَرا خوائید دِئن.» مأمورانی کی مقبره یَ پاستیدی 11 اُ وقت کی زناکان راه میان دیبید، دسته ئی جه مأمورانی کی مقبره یَ پاستیدی شار سمت بُشوئید، همه ی اَ ایتفاقاتَ کاهنانِ سرانِ ره خبر ببردید. 12 اوشانم بعدِ ریش سیفیدان دِئن و مشورت اوشان مرا، سربازانَ خَیلی پول فَدَئید، 13 اوشانَ بگفتید: «مردوم بیگید، اونِ شاگردان شبانه باموئید و اُ زمات کی اَمان خوفته بیم، اونِ جنازه یَ بدوزانه ئید.“ 14 و اَگه اَ خبر فرماندار گوشَ فارسه، اَمان خودمان اونَ راضی کونیم تا شمرأ مشکلی پیش نایه.» 15 پس اوشان پولَ فیگیفتید و عَین اونچی کی اوشانَ بگفته بُبوسته بو عمل بُکودید و اَ نَقل تا به ایمرو یهودیان میان چو دکفته دَره. پیله مأموریت 16 بازون اُ یازده تا شاگرد جلیل سمت، اُ کوهی کی عیسی اَشانِ بگفته بو، بُشوئید. 17 هَطو کی اویا عیسیَ بیده ئید، اونَ پرستش بُکودید. ولی بعضیان شک بُکودید. 18 بازون عیسی جُلُو بامو و اَشانَ بگفت: «تمان قدرت آسمان درون و زمینِ سر مَرا واسپارده بُبوسته. 19 پس بیشید و تمان مردومانَ شاگرد چاکونید و اَشانَ پئر و پسر و روح‌القدّسِ نام مرا غُسل تعمید بَدید 20 و اوشانَ باموجید کی هر اونچی شمرأ دستور بدَم، انجام بَدید. بدانید کی من هر روج تا آخرِ زمات شیمی مرا ایسام!» |
@ 2024 Korpu Company