متّی 21 - کتاب مقدس به زبان گیلکی - گویش رشت و غرب گیلانعیسی شئون اورشلیمِ درون 1 وقتی عیسی و اون شاگردان اورشلیمَ نزدیکَ بوستید بِیت‌ْ فاجی آبادیَ کی زیتون کو درون نئَه بو فارسه ئید، عیسی دوتا جه خو شاگردانَ اوسِه کود و 2 اوشانَ بگفت: «اُ آبادی کی شیمی راه سر نئَه، بیشید. هَطو کی بدرون بُشوئید ایتا خر، خو کُرّه مرا، دوَسته خوائید یافتن. اوشانَ وازا کونید و می ورجه باورید. 3 اَگه ایکَس گَبی شمرأ بزه، بیگید: ”خُداوند اوشانَ احتیاج دَره،“ و اون درجا اوشانَ روانه کونه.» 4 اَ ایتفاق دکفت تا اونچی کی پیغمبر بگفته بو انجام ببه کی: 5 «صَهیونِ کُر، اورشلیمَ بیگید، ” تی پادشا تی ورجه اَیه، فروتنی مرا و خَرِ سر سوار، خر کُرّه سر سواره و اَیه.» 6 اُ دو تا شاگرد بُشوئید و اونچی کی عیسی بگفته بو انجام بدئید. 7 اوشان خَر و اونِ کُرّه یَ باوردید و خوشانِ قبایَ اونِ سر بنه ئید و عیسی، قبائان سر بینیشت. 8 ایتا پیله جمعیتَم خوشانِ قبائانَ اونِ راه سر واشادید و دسته ئیَم دارانِ خالئانَ واوه ئید و راه درون نَئیدی. 9 جمعیتی کی جُلُوتر جه اون شئون دیبید و اوشانی کی اونِ پوشت سر اَمون دیبید، داد زئید و گفتید: «نیجات فَدِه داوود پسر!» «مُوارکه اون کی خُداوندِ نامِ مَرا اَیه!» «جه آسمانِ میان نیجات فَده!» 10 عیسی اورشلیمِ بدرون بُشو و تمانِ شارَ شوق و ذوق اوساد. مردوم واورسه ئید: «اَن کیسِه؟» 11 و اُ جماعت جواب بدَئید: «عیسیِ پیغمبره کی جلیلِ ناصره شینه!» عیسی معبدَ تمیزَ کونه 12 بازون عیسی خُدا معبد بدرون بُشو و اوشانیَ کی اویا خرید و فروش کودن دیبید، بیرون تَوَدَه و صرّافانِ تختان و کوترفروشانِ بساطَ فُگوردانه 13 عیسی اوشانَ بگفت: «بینیویشته بُبوسته کی، ” می خانه، عبادت خانه خوائه بوستن،“ ولی شُمان اونَ دوزدان لانه بساخته ئید.» 14 معبدِ درون، کوران و شلان اونِ ورجه باموئید و عیسی اَشانَ شفا بدَه. 15 ولی وقتی کاهنانِ سران و توراتِ آموجگاران اونِ عجایب غرایب کارانَ تماشا بُکودید و بازم بیده ئید کی کوجی زاکان معبدِ درون فریاد زنیدی: «نیجات فَدِه داوود پسر،» بَرزَخا بوستید. 16 پس عیسیَ بُگفتید: «ایشتاوی اَشان چی گیدی؟» عیسی جواب بدَه: «بله! مگه زبورِ درون نخواندیدی کی، «”کوجی زاکان و قُنداقه زاکان ئم خوشانِ زوانِ مرا پرستش کونیدی“؟» 17 هو موقع عیسی اَشانَ تَرکا کود و اُ شارِ جا بِیت‌ْعَنْیا آبادی بُشو و شبَ اویا بأسا. اَنجیل دار خُشکا به 18 فردایی صوب وقتی عیسی وَگردَستن دوبو شار، ویشتا بُبوست. 19 راه سر، ایتا اَنجیل دار بیده و اونِ سمت بُشو، ولی بیده کی جغیر وَلگ هیچّی اَن وَأنجِه. پس عیسی دارَ بگفت: «نبه کی دِه هرگس باری تی جا به عمل بایه!» هو دَم دار، خُشکَ بوست. 20 شاگردان بعد اَنکی اَجریانَ بیده ئید حَیرانَ بوستید، اونِ جا واورسه ئید: «چُطو اَنجیل دار، درجا خُشکا بوست؟» 21 عیسی اوشانِ جوابِ درون بگفت: «حئیقتن، شمرأ گَم، اَگه ایمان بدَرید و شک نُکونید، نه فقط تانید اونچی کی اَنجیل دارِ سر بامو انجام بدید، بلکی هر وقت اَ کویَ بیگید ”جه تی جا بکَنده بُبو و دریا درون دَکف،“ هَطو خوائه بوستن. 22 اَگه ایمان بدَرید، هر اونچی کی دُعا درون بخوائید، فیگیریدی.» به چه اجازه ئی اَ کارانَ کونی 23 عیسی معبد بدرون بُشو و بنا به مردومِ آموختن بُکود. هه موقع، کاهنان سران و مردومِ ریش سیفیدان، اونِ ورجه باموئید و بگفتید: «به چی اجازه ئی اَ کارانَ کونی؟ کی تره اَ قدرت و ایختیارَ فَدَه؟» 24 عیسی اوشانِ جوابِ درون بگفت: «مَنم شیمی جا ایچی واورسم. اَگه جواب بدَه ئید، منم شمرأ گَم چی قدرت و ایختیارِ مرا اَ کارانَ کونم. 25 یحییِ تعمید جه کویا بو؟ خُدا جا یا آدمی جا؟» اوشان همدیگر مرا صلامشورت بُکودید و بگفتید: «اَگه بیگیم خُدا جا بو، امرا گه، ”پس چره اونَ ایمان ناوردید؟“ 26 و اَگه بیگیم آدمی جا بو، مردومِ جا ترس دَریم چونکی همه یحییَ پیغمبر دانیدی.» 27 پس عیسیَ جواب بدَه ئید: «نانیم.» عیسی بگفت: «مَنم شمرأ نَگم چی قدرت و ایختیارِ مرا اَ کارانَ کونم.» دوتا پسرِ نقل 28 «شیمی نظر چیسه؟ ایتا مردای دو تا پسر دَشتی. اون خو پیله پسر ورجه بُشو و بگفت: ” پسر، ایمروج بوشو انگورباغِ سر و کار بُکون.“ 29 اُ پسر جواب بدَه: ”نشم.“ ولی بعد خو رَأیَ وگردانه و بُشو. 30 پئر اویتا پسرِ ورجهئَم بُشو و هو گبَم اونَ بگفت. پسر جواب بدَه: ”شم، آقا،“ ولی نُشو. 31 کویتا جه اُ دوتا پسر خو پئرِ خواسته یَ انجام بدَه؟» اوشان جواب بدَه ئید: «اوّلی.» عیسی اَشانَ بگفت: «حئیقتن، شمرأ گَم، خراجگیران و هَرزه ئان، پیش جه شُمان خُدا پادشائی درون شیدی. 32 چونکی یحیی صالحی راه اَمرا شیمی ورجه بامو ولی شُمان اونَ ایمان ناوردید، ولی خراجگیران و هرزه ئان ایمان باوردید. و شُمان با اَنکی اَنه بیده ئید شیمی رَأیَ وانگردانه ئید و اونَ ایمان ناوردید.» شرورِ باغبانانِ نقل 33 «ایتا دِه نقلَ، گوش فَدید. صاحاب باغی، انگورباغی آماده کود و اونَ دورا کود و چاچه ئی اون میان بکَند و ایتا بُرج دیدبانیَم اویا بساخت. بازین انگورباغَ چن تا باغبانَ مناسبه فدَه و خودِش ایتا دیگه مملکت سفر بُکود. 34 وقتی انگور چِئِن زمات فارسه، خو نوکرانَ باغبانانِ ورجه اوسِه کود تا اونِ سَامَ فیگیرید. 35 ولی باغبانان اونِ نوکرانَ بیگیفتید، ایتایَ بزئید و اویتایَ بُکوشتید و سیومیَ سنگسار بُکودید. 36 ایوار دِه، نوکرانِ ویشتری اوشانِ ورجه اوسِه کود، ولی باغبانان اوشانِ مرا ئم هَطو بُکودید. 37 آخربسر خو پسرَ باغبانانِ ورجه روانه کود و خو مرا بگفت: “دِه می پسرِ احترامَ خوائید داشتن.“ 38 ولی وقتی کی باغبانان پسرَ بیده ئید، همدیگرَ بگفتید: ” اَن وارثه. بائید اونَ بُکوشیم تا اونِ ارث اَمی شین ببه.“ 39 پس اونَ بیگیفتید و انگورباغ جا بیرون بگادید و بُکوشتید. 40 هسّا، وقتی صاحاب باغ بایه اَ باغبانانِ مرا چی خوائه کودن؟» 41 اوشان جواب بدَه ئید: «اون بیرحمِ آدمانَ بیرحمی مرا سر به نیست خوائه کودن و انگورباغَ دیگر باغبانانَ مناسبه خوائه فدن تا اونِ بارَ به موقع اونَ فَدید.» 42 بازون عیسی اوشانَ بگفت: «مگه تا به الان زبورِ کتابِ درون نخوانده ئید کی، ”سنگی کی بنّایان ردَّ کودید، مهمترین سنگ بُبوست. اَن خُداوندِ کاره و اَمی نظرِ درون عجایب غرایبه“؟ 43 پس شمرأ گَم کی خُدا پادشائی شیمی جا فیگیفته و مردومیَ فَدَه خوائه بوستن کی اونِ بارَ فَدید. 44 هر کی اُ سنگِ سر بکَفه، پَلکَ به، و هر وقت اُ سنگ ای کَس سر بکفه، اونَ لِه کونه.» 45 وقتی کاهنان سَران و فَریسی فرقه عالمان عیسی نقلانَ بیشتاوستید، بفهمستید کی اوشانِ باره گب زَنه. 46 و با اَنکی خواستید اونَ گرفتارَ کونید، مردومِ جا ترس دَشتید چونکی اوشان عیسیَ پیغمبر دانستید. |
@ 2024 Korpu Company