متّی 20 - کتاب مقدس به زبان گیلکی - گویش رشت و غرب گیلانانگورباغِ کارگرانِ نَقل 1 «آسمانِ پادشائی، صاحاب باغیَ مانه کی صُبِ دَم بیرون شه تا خو انگورباغِ ره چن تا روزمُزدِ کارگر بیگیره. 2 صاحاب باغ اوشانِ مرا طِی بُکود کی هر روج ایتا دینار کی ایتا روجِ کارِ دستمُزد انگورباغِ درون بو، هرتایَ فَده. بازون اَشانَ خو انگورباغ روانه کود. 3 ساعت نُه صُب ایوارده بیرون بُشو و دسته ئیَ میدان دور بیده کی بیکار ایسابید. 4 اوشانَم بگفت: ”شُمانم می انگور باغ بیشید و اونچی کی شیمی حقه، شمرأ فَدَم.“ 5 پس اوشانم بُشوئید. بازم ظهر، و ساعت سه بعدظهرم، بیرون بُشو و اَطو بُکود. 6 ساعت پنج بعدظهرم بیرون بُشو و ایوارده چندنفرَ کی بیکار ایسابید بیده و اوشانِ جا واورسه: ”چره تمانِ روج اَیا بیکار ایسائید؟“ 7 اوشان جواب بدَه ئید: ”چونکی هیکّس امرا کار فأنده.“ صاب باغ اوشانَ بگفت: ”شُمانم می انگور باغِ درون بیشید.“ 8 غروب دَم، صاب باغ خو مُباشرَ بگفت: ”کارگرانَ دوخوان و اَشانِ مُزدَ فَدَن، آخرتا جا شروع بُکون تا اوّلتا.“ 9 کارگرانی کی دوروَر ساعت پنج کارِ سر باموبید، هرتا ایتا دینار فیگیفتید. 10 وقتی نوبت، اوشانیَ فارسه کی جُلُوتر جه همه باموبید خیال بُکودید دیگرانِ جا ویشتر خوائید فیگیفتن. ولی هرتا جه اوشانم ایتا دینار فیگیفتید. 11 هَطو کی خوشان مُزدَ فیگیفتید، غُرغُرِ مرا صاحاب باغَ بگفتید: 12 ”اَشان کی آخربسر باموبید فقط یک ساعت کار بُکودید و تو اوشانَ اَمی مرا کی تمانِ روج آفتاوِ جیر بسوختیم و زحمت بکشِه ئیم، برابر دستمُزد فَدَن دری!“ 13 صاب باغ ایتا جه اوشانَ فندرست و بگفت: ”اَی رفق، من تره بَدی نُکودَم. مگه اَمی قرار ایتا دینار نُبو؟ 14 تی حقَ فیگیر و بوشو! من خوائم اَ آخریَ تی مانستن دست مُزد فَدَم. 15 مگه حق نارَم می مالِ مرا اونچی کی خوائم بُکونم؟ چوم ناری می دَس و دیل بازیَ بیدینی؟“ 16 پس، اوشانی کی آخرید، اول بیدی و اوشانی کی اوّلید، آخر!» عیسی سیومی پیشگویی خو مَردن و زنده بوستنِ باره 17 وقتی کی عیسی اورشلیم سو شئون دوبو، راه میان، خو دوازده تا شاگردَ ایتا گوشه ببَرد و اَشانَ بگفت: 18 «هسّا اورشلیم شیم. اویا انسانِ پسرَ کاهنانِ سَران و تورات آموجگارانِ دَس تسلیم خوائید کودن. اوشان اونَ مَردن ره محکوم خوائید کودن 19 و غیر یهودیانِ دَس خوائید واسپاردن تا رَخشنَ گیرید و شَلاق بُخوره و مصلوب ببه. ولی سیومی روجِ درون زنده خوائه بوستن.» ایتا مارِ خواسته 20 زِبِدی پسرانِ مار، خو دوتا پسرِ اَمرا عیسی ورجه بامو و اونِ جُلُو زانو بزه و عیسی جا بخواسته کی اونِ ناجیَ برآورده بُکونه. 21 عیسی واورسه: «تی ناجی چیسه؟» اوشان مار بگفت: «اجازه بدَن می اَ دوتا پسر تی پادشائی درون، ایتا تی راستِ وَر و اویتا تی چپِ وَر بینشینید.» 22 عیسی جواب بدَه: «شُمان نانیدی چی خوائیدی! تانیدی اُ جامِ جا کی من بایسی بُنوشَم، بُنوشید؟» اُ دوتا برار جواب بدَه ئید: «بله، تانیم.» 23 عیسی بگفت: «اُ جامِ جا کی من نوشم، نوشیدی، ولی بدانید کی می راست و چپ وَر نیشتن می ایختیار نیه تا اونَ اینفر فَدم. اَ جایگا اوشانِ شینه کی می پئر اوشان ره حاضیر بُکوده.» 24 وقتی اُ دَه تا شاگرد اَنه بیشتاوستید، اُ دوتا برارِ سر غیظ بُکودید. 25 ولی عیسی اَشانَ دوخواد و بگفت: «شُمان دانیدی کی دیگر مردومانِ حاکمان اَشانِ سر آقایی کونید و اوشانِ پیله تران اَشانَ دستور دیئیدی. 26 ولی شیمی میان اَطو نبه. هر کی خوائه شیمی میان پیله ببه، بایسی شیمی خیدمتکار ببه. 27 و هر کی خوائه شیمی میان اول ببه، بایسی شیمی نوکر ببه. 28 حتی انسانِ پسرم نامو تا اونَ خیدمت بُکونید، بلکی بامو تا خیدمت بُکونه و خو جانِ مرا خَیلیانِ رهائی بهایَ فدِه.» عیسی دو تا کورَ شفا دئه 29 اُ زمات کی عیسی و اونِ شاگردان اَریحا شارَ تَرکا کودن دیبید، خَیلیان اونِ دُمبالسَر رادکفتید. 30 راه سر، دو تا کورِ مردای نیشته بید. وقتی بیشتاوستید عیسی جه اویا ردّا بوستن دَره، فریاد بزئید: «آقا، اَی داوود پسر، امرا رحم بُکون!» 31 خلق اوشانَ تشر بزئید و بخواستید کی تام بزنید، ولی اَشان ویشتر داد بزئید کی: «آقا، اَی داوود پسر، امرا رحم بُکون!» 32 عیسی بِئسا و اُ دوتایَ دوخواد و واورسه: «چی خوائیدی شمرأ بُکونم؟» 33 اوشان جواب بدَه ئید: «آقا خوائیم اَمی چومان وازا به.» 34 عیسی دیلسوجی مرا اوشانِ چومان سر دَس فاکشه و هو دَم اوشانِ چومان بیده و اون دُمبال رادکفتید. |
@ 2024 Korpu Company