متّی 16 - کتاب مقدس به زبان گیلکی - گویش رشت و غرب گیلانایتا آسمانی نیشانه خواستن 1 بازون فَریسی فرقه عالمان و صَدّوقی فرقه عالمان عیسی ورجه باموئید تا اونَ امتحان بُکونید. اَنِ واسی اونِ جا بخواستید تا ایتا آسمانی نیشانه اوشان ره باوره. 2 عیسی جواب بدَه: «غروب دَم گیدی ”هوا خُبه چونکی آسمان سُرخِ.“ 3 و صوبِ دَمان گیدی ”ایمرو هوا خرابه چونکی آسمان سُرخ و بیگیفتیه“. شُمان خُب دانیدی کی چُطو آسمانِ ظاهیرَ تعبیر بُکونید، ولی نتانید زماتِ نیشانه ئانِ تعبیرَ بفهمید! 4 اَ شُرور و زیناکارِ نسل ایتا نیشانه خوائیدی، ولی نیشانه ئی اوشانَ فَدَه نخوائه بوستن جغیر یونس پیغمبرِ نیشانه». پس عیسی اوشانِ جا سیوا بُبوست و خُو رایَ بُشو. فَریسیان و صَدّوقیانِ خمیر مایه 5 وقتی اُ طرف دریا بُشوئید، شاگردانَ خاطرَ شو خوشانِ مرا نان اوسانید. 6 عیسی اَشانِ بگفت: «واخُب بأسائید و فَریسیان و صدّوقیانِ خمیر مایه جا دوری بُکونید.» 7 پس اَشان، خوشانِ میان بُگو مگو بُکودید و بگفتید: «اَمی مرا نان ناوردیم.» 8 عیسی اَنه بفهمست و اَشانَ بگفت: «اَی سُست ایمانان، چره اَنِ واسی کی نان ناریدی همدیگرِ مرا بُگو مگو کودن دَرید؟ 9 هنو شمرأ حالی نیبه؟ بخاطر ناورید کی اُ پنج تا نان و پنج هیزار نفر و اَنکی چن تا پیله سبد خورده نانان جا جمَ کودید؟ 10 یا اُ هفتا نان و چارهزار نفر و اَنکی چند تا زیبیل خورده نانانَ جا جمَ کودید؟ 11 پس چره شمرأ حالی نیبه کی شیمی مرا نانِ باره گب نزِم؟ فَریسیان و صَدّوقیانِ خمیر مایه جا دوری بُکونید.» 12 هو موقع بفهمستید کی اَشانَ فَریسیان و صَدّوقیانِ تعلیمِ باره هُشدار دئه، نه نانِ خمیر مایه جا. پِطرُس اعتراف کونه کی عیسی، مسیحِ موعوده 13 وقتی عیسی فیلیپی قیصریه سامانسر فارسه، خو شاگردانِ جا واورسه: «مردوم گیدی انسانِ پسر کیسه؟» 14 اوشان جواب بدَه ئید: «بعضیان گیدی تعمید دَئنده یحیی یه. و بعضی دیگه ئم گیدی ایلیای پیغمبره، و دسته ئیَم گیدی اِرمیا یا ایتا جه پیغمبرانه.» 15 عیسی واورسه: «ولی شُمان چی گیدی؟ شُمان فیکر کونیدی من کیسم؟» 16 شَمعونِ پِطرُس جواب بدَه: «تو مسیحِ موعودی، خُدای زنده پسر!» 17 عیسی بگفت: «خوشا به حال تو، اَی شَمعون، یونا پسر! چونکی اَ حئیقت، آدمی جا تره آشکارَ نُبوست بلکی می پئرِ جا کی آسمانِ درونه. 18 منم گَم کی توئی پِطرُس، یعنی سنگ. و من اَ سنگِ رو می کلیسای چاکونم، و جهندمِ قدرت هرگس نتانه اونَ حریف ببه. 19 آسمانِ پادشائی کیلیدانَ تره فَدَم. اونچی زمین سر دَوَدی، آسمان درون دوَسته بِه و اونچی کی زمینِ رو وازَ کونی، آسمانِ درون واز خوائه بوستن.» 20 بازون خوشاگردانَ قدغن بُکود کی هیکّسِ ره نیگید اون مسیحه. عیسی خو مَردن و زنده بوستنَ پیشگوئی کونه 21 بازون پس عیسی اَ حئیقتَ خو شاگردان ره واشکافانه کی بایسی اورشلیم بشه و اویا ریش سیفیدان و کاهنانِ سران و توراتِ آموجگارانِ جا خَیلی آزار بیدینه و اونَ بُکوشید و سیوم روج درون زنده ببه. 22 ولی پِطرُس، عیسیَ ایتا گوشه ببرد و تُندی مرا بگفت: «تی جا دور ببه، آقا! نَبه کی اَطوچی هرگس تره ایتفاق دکفه.» 23 عیسی وگردست و پِطرُسَ بگفت: «می جا دورَ بو، اَی شیطان! تو می راه جُلُو یَ گیفتن دری، چونکی تی فیکران آدمِ شینه نه خُدا شین.» 24 بازین عیسی وگردست و خو شاگردانَ بگفت: «اَگه اینفر بخوائه می دُمبال بایه، بایسی خورِه حَشا بُکونه، خو صلیبَ اوسانه و می دُمبال بایه. 25 چون هر کی بخوائه خو جانَ نیجات بَده، اونَ جه دَس دِئه ولی هر کی می واسی خو جانَ جه دَس بَده، اونَ ایوارده بدَس اَوره. 26 آدم ره چی فایده دَره کی تمان دُنیایَ بِدَره، ولی خو جانَ دَبازه؟ آدمی چی تانه فدِه تا خو جانَ ایوارده بدَس باوره؟» 27 «چونکی انسان پسر، خو پئرِ جلالِ درون فیریشته ئانِ مرا خوائه اَمون و هر کَسَ اونِ کارانِ ره، عَوَض خوائه فَدَن. 28 حئیقتن، شمرأ گَم، بعضیان کی اَیا ایسائید، تا انسانِ پسرَ نیدینید کی خو پادشائی درون اَیه، مَردنِ مزه یَ نخوائید چیشتن.» |
@ 2024 Korpu Company