متّی 14 - کتاب مقدس به زبان گیلکی - گویش رشت و غرب گیلانتعمید دَئنده یحیی کوشتن 1 اُ زماتِ درون عیسی آوازه هیرودیسِ حاکم گوش فارسه، 2 و اوشانیَ کی اونَ خیدمت کودن دیبید بگفت: «اَن تعمید دَئنده یحیی یِ کی مُرده ئانِ جا ویریشته و اَنِ واسیِ کی اَ مُعجزه ئان، اونِ جا آشکارَ بِه.» 3 چونکی هیرودیس، هیرودیا واسی کی اونِ برار، فیلیپُسِ زن بو، یحییَ بیگیفته و اونَ دوَسته و خولتانکِ درون تَوَدَه بو. 4 اَنِ واسی کی یحیی هیرودیسِ گفتی: «شرعا روا نیه تو تی برارزن مرا بیبی.» 5 هیرودیس خواستی کی یحییَ بُکوشه، ولی مردومِ جا ترسه ئی، چونکی یحییَ به پیغمبری قُبیل دَشتیدی. 6 ولی وقتی هیرودیسِ جشنِ تولدِ درون، هیرودیا کُر رقص بُکود و اونِ رقص هیرودیسِ دیلَ شادَ کود 7 قسم بُخورد هر چی بخوائه اونَ فَدِه. 8 مار خو کُرَ کوک بُکود کی بگه: «هیا، تعمید دَئنده یحیی سرَ، ایتا مَجمع درون مرا فَدَن.» 9 هیرودیسِ پادشا حال بیگیفته بُبوست، ولی خو قسمِ واسی و خو مِیمانانِ احترام ره دستور بدَه کی اونَ فَدید. 10 پس اینفرَ اوسِه کود، یحیی سرَ خولتانک درون، اون تن جا سیوا بُکود، 11 و اونَ ایتا مَجمع درون باورده، کُرَ فَدَئید و کُرَم اونَ خو مارِ ورجه ببَرد. 12 یحیی شاگردان باموئید و اونِ جنازه ی ببَردید، دفنَ کودید و بازون بُشوئید و عیسیَ خبر بدَه ئید. پنج هیزار نفرَ غذا دَئن 13 وقتی عیسی اَنه بیشتاوست لوتکایَ سوارَ بوست و جه اویا ایتا دوردکفته جیگا سو بُشو و خو مرا خلوت بُکود. ولی وقتی مردوم باخبرَ بوستید، خوشانِ شارانِ جا، پای پیاده اونِ دُمبالسر رادکفتید. 14 هَطو کی عیسی لوتکا جا پیاده بوست، ایتا پیله جمعیتَ بیده و اونِ دیل اوشانِ ره بسوخت و اوشانِ ناخوشانَ شفا بدَه. 15 غروب دَم، عیسی شاگردان اونِ ورجه باموئید و بگفتید: «اَیا ایتا دور دکفته جیگایِ و دیر وقتم ایسه، مردومَ روانه کون تا هه دوروَر دهاتان بیشید و خوشان ره غذا بیهینید.» 16 ولی عیسی اوشانَ بگفت: «لازم نیه مردوم بیشید. شُمان خودتان اَشان غذا فَدید.» 17 شاگردان بگفتید: «اَیا هیچّی جغیر پنج تا نان و دونه ماهی ناریم.» 18 عیسی بگفت: «اوشانَ می ورجه باورید.» 19 بازین مردومَ بگفت تا علفانِ سر بینیشینید. هو موقع پنج تا نان و دونه ماهیَ اوساد و آسمانَ فندرست، و برکت بدَه. هو موقع نانانَ پَلکَ کود و شاگردان فَدَه و اوشانم مردومَ فَدَئید. 20 همه بُخوردید و سئرا بوستید و زیاد باورده غذا جا، دوازده تا پُرَ کوده پیله سبد جمَ کودید. 21 غذاخوران، جغیر زناکان و کوجدانه ئان، پنج هیزار مردای بید. عیسی آبِ رو راه شه 22 عیسی درجا خو شاگردانَ مجبور بُکود تا هو موقع کی خودش مردومَ سرا دئه، لوتکای سوارَ بید و پیش جه اون اُ طرف دریا بیشید. 23 عیسی بعدِ اونکی مردومَ سرا دَه خودش تنهایی کوه سو بُشو تا خلوتی دُعا بُکونه. شب فارسه و عیسی اویا تنها بو. 24 هه وقت درون، لوتکا دریاکنار جا خَیلی دورَ بوست و کولاک درون دوبو، چونکی باد پَسا پَسا اَمون دوبو. 25 نزدیکِ چارِ صُب بو و عیسی هَطوکی آب رو راه شوئندبو اوشانَ نزدیکَ بوست. 26 وقتی شاگردانْ عیسیَ بیده ئید کی آب رو راه شئون دَره، اوشانِ دیلِ زاله بَتَرکست و بگفتید: «روحِ»، و ترسِ جا فریاد بزئید. 27 ولی عیسی درجا اوشانَ بگفت: «شیمی دیل قرص ببه. منم، نترسید!» 28 پِطرُس جواب بدَه: «آقا، اَگه تویی، مَرا بُگو تا آب رو تی ورجه بایم.» 29 عیسی بگفت: «بیا!» هوموقع پِطرُس لوتکا جا بیرون بامو و آب رو عیسی سمت رادکفت. 30 ولی وقتی بادَ بیده، بترسه و اُ موقع کی دمردَن دوبو فریاد بزه: «آقا، مَرا نیجات بدن!» 31 عیسی درجا خو دَسَ درازا کود و اونَ بیگیفت و بگفت: «اَی کم ایمان، چره شک بُکودی؟» 32 هُطوکی لوتکایَ سوارَ بوستید، باد بینیشت. 33 بازین اوشانی کی لوتکا درون بید عیسیَ پرستش بُکودید و بگفتید: «حئیقتن کی تو خُدا پسری!» ناخوشان شفا جِنیسارِت درون 34 پس وقتی اُ طرفِ دریا فارسه ئید جِنیسارِت منطقه درون بجیر باموئید. 35 اویا مردومان عیسیَ بشناختید و کسانیَ تمان اُ منطقه روانه کودید کی ناخوشانَ اونِ ورجه باورید. 36 اوشان عیسیَ منّت کودید وائاله تا فقط اونِ قبا پَره یَ دَس بزنید، و هر کَس دَس زئی، شفا گیفتی. |
@ 2024 Korpu Company