متّی 12 - کتاب مقدس به زبان گیلکی - گویش رشت و غرب گیلانعیسی مُقدّسِ شنبه روجِ صاحاب 1 اُ موقع، عیسی مُقدّسِ شنبه درون گندم کَله جا دَوارستَندبو. اونِ شاگردان ویشتائی واسی، بنا به گندمِ غوشه ئان چِئِن بُکودید و بُخوردید. 2 فَریسی فرقه عالمان هَطو کی اَنه بیده ئید عیسی یَ بُگفتید: «بیدین، تی شاگردان کاری کودن دَرید کی مُقدّسِ شنبه درون نبایسی کودن.» 3 عیسی جواب بدَه: «مگه نخواندیدی کی داوود چی بُکود، هو موقع کی خودِش و اونِ یاران ویشتا بید؟ 4 چُطو داوود خُدا خانه بدرون بُشو و خودش و اونِ یاران مُقدّسِ نانَ بُخوردید کی اونِ خوردن داوود و اون یارانِ ره روا نُبو و فقط کاهنان اجازه دَشتید بُخورید؟ 5 مگه توراتِ بینیویشته ئانَ نخواندید کی، شنبه ئانِ درون، کاهنان، معبدِ میان، شنبه حُرمتَ ناریدی ولی با اَن همه تخصیرکار بحساب نَئیدی؟ 6 شمرأ گَم اینفر اَیا ایسا کی پیله تر جه معبده! 7 اَگه اَ گفتارِ معنیَ فهمستیدی کی ”رحمتَ خوائم، نه قربانیَ،“ دِه تخصیرکارانَ محکوم نُکودیدی. 8 چونکی انسانِ پسر مُقدّسِ شنبه روجِ صاحابه.» لامِ مرداکِ شفای 9 بازون عیسی، جه اویا بُشو و اَشانِ عبادتگا بدرون بامو. 10 عبادتگا درون ایتا مردای ایسا بو کی اونِ ایتا دَس، لامَ بوسته بو. عیسی جا واورسه ئید: «شفا دَئن، مُقدّسِ شنبه درون روایه؟» اَنه بُگفتید تا ایتا گزَک اونِ بُهتان زئنِ ره بیاوید. 11 عیسی اوشانَ بگفت: «اَگه اینفر جه شُمان گوسفندی بدَره و اُ گوسفند شنبه درون، چاهِ میان دکَفه، نِشه اونَ بيگيره و چاهِ جا بيرون باوره؟ 12 هسّا، آدمی گوسفندِ جا چَندر با ارزشتره! پس خُبی کودن مُقدّسِ شنبه درون روا ایسه.» 13 بازین عیسی اُ مرداکَ بگفت: «تی دسَ درازا کون!» اون خو دسَ درازا کود و اونِ دس، اونِ اویتا دسِ مانستن خُب بُبوست. 14 ولی فَریسیان بیرون بُشوئید و همدیگرِ مرا کوکلا دیچه ئید کی چُطو عیسیَ بُکوشید. خُدا انتخاب بُبوسته خیدمتکار 15 وقتی عیسی جه اَ جریان باخبر ببوست اویا تَرکا کود. خَیلیان اونِ دُمبال بُشوئید و عیسی، تمانِ اوشانَ شفا بدَه 16 و اَشانَ دستور بدَه کی اونِ باره هیکّسِ مرا گب نزنید. 17 اَ ایتفاق دکفت تا اِشعیای پیغمبرِ بُگفته به انجام فارسه کی: 18 «اَنِه می خیدمتکار کی اونَ انتخاب بُکودم، اون می عزیزِ کی می جان اونِ جا راضیِ. من می روحَ اون سر نئم و اونْ عیدالتَ مردومانِ ره اعلام کونه. 19 دعوا نُکونه و داد نخوائه زئِن؛ و هیکّس اونِ صدایَ کوچه ئانِ درون نیشتاوه. 20 دوچولکسته لُولِه یَ نشکنه و نیمسوج فتیله یَ دئونکوشانِه، تا عیدالتَ، به پیروزی فارسانه. 21 و مردومان به اونِ نام امید دَریدی.» عیسی و بِعِلزِبول 22 بازون ایتا دیو بزه مرداکَ کی کور و لال بو اونِ ورجه باوردید و عیسی اونَ شفا بدَه، اوطو کی تانستی بیدینه و گب بزنه. 23 اُ خلق همه تا ماتا بوستبید و بگفتید: «به کی اَ مَردای هو مسیحِ موعود ببه کی قراره داوودِ نسل جا بایه؟» 24 ولی وقتی فَریسیان اَنه بیشتاوستید، بگفتید: «اون بِعِلزِبولِ یاری مرا کی دیوانِ سردسته ی، دیوانَ بیرونَ کونه!» 25 عیسی اوشانِ فیکرانَ بَفهمست و اَشانَ بگفت: «هر مملکتی کی ضدّ خودش دسته دسته ببه، سر به نیست خوائه بوستن، و هر شار یا خانه ئی کی ضدّ خودش دسته دسته ببه، خوائه فُگوردستن. 26 اَگه شیطان، شیطانَ بیرونَ کونه، ضدّ خودش دسته دسته بِه؛ پس اونِ حکومت چُطو بجا مانه؟ 27 و اَگه من بِعِلزِبول یاری مرا دیوانَ بیرونَ کونم، شیمی شاگردان کی یاری مرا اوشانَ بیرونَ کونید؟ پس اَشان خودشانْ، شیمی داوران خوائید بوستن. 28 ولی اَگه من بواسطه خُدا روح دیوانَ بیرونَ کونم، پس خُدا پادشائی شیمی ره بامو دَره. 29 چُطو اینفر تانه ایتا قوی مرداکِ خانه بشه و اونِ مال و منالَ بدوزه، مگه اونکی، اول اُ مرداکَ دَوَده. بازین تانه اونِ خانه یَ غارت بُکونه. 30 هر کی می اَمرا نیه، می ضّدِ، و هر کی می اَمرا جمَ نُکونه، پاشانه. 31 پس شمرأ گَم، هر گُنائی کی آدم بُکونه و هر کُفری کی بگه، ببَخشه بِه، ولی هر کی روح القدسِ کُفر بگه ببَخشه نخوائه بوستن. 32 هر کی گبی ضدّ انسان پسر بزنه، ببَخشه بِه، ولی هر کی ضدّ روح القدس گب بزنه، نه اَ دُنیا و نه اُ دُنیا درون، ببَخشه نخوائه بوستن. 33 اَگه خُبِ بار خوائیدی، شیمی دار بایسی خُب ببه، چونکی بدِ دار، بدِ بار اَوره. دارَ اونِ بارِ جا شه شناختن. 34 اَی افعی بزاسته ئان، چُطو تَانیدی خُبِ گب بزنید، وقتی کی خودتان بَد ایسید؟ چونکی زوان جه اونچی کی دیل، اونِ جا پُره گب زنه. 35 خُرم آدم، خو خُبِ صوندوقِ دیلِ جا خُرم چیان به بار اَوره و بدِ آدم خو بدِ صوندوقِ دیلِ جا بدِ چیان. 36 شمرأ گَم کی مردوم هر مُفتِ گَبیَ کی به زوان باورید، داوری روجِ درون، حساب پس دیئیدی. 37 چونکی شیمی گبانِ مرا، ببَخشه خوائید بوستن و شیمی گبانِ مرا محکوم خوائید بوستن.» نیشانه ئی عیسی جا خواستن 38 بازون دسته ئی جه تورات آموجگاران و فَریسیان اونَ بُگفتید: «اوستاد، خوائیم ایتا نیشانه تی جا بیدینیم.» 39 عیسی جواب بدَه: «نسلِ شرور و زناکار نیشانه خوائیدی، ولی نیشانه ئی اَشانَ فَدَه نخوائه بوستن جغیر یونسِ پیغمبرِ نیشانه. 40 چون هُطو کی یونس سه شبنده روج ایتا پیله ماهی شکم درون بأسا، انسان پسرم سه شبنده روج زمینِ دیلِ درون مانه. 41 نینوا مردوم داوری روجِ درون اَ نَسلِ مرا خوائید ویریشتن و اَشانَ محکوم کونیدی، چونکی اوشان یونسِ موعظه واسی توبه بُکودید، و هسّا اینفر پیله تر جه یونس اَیا ایسا. 42 جنوبِ ملکه داوری روجِ درون اَ نسلِ مرا خوائه ویریشتن و اَشانَ محکوم خوائه کودن، چونکی اون جه اُ سر دُنیا بامو تا سلیمانِ حیکمَتَ بیشتاوه، و هسّا اینفر پیله تر جه سلیمان اَیا ایسا.» 43 «زماتی کی پلیدِ روح اینفرِ جا بیرون اَیه، خُشک و بی آبِ جیگائانِ سو شه تا ایتا جا خو استراحت ره بیابه. ولی پیدا نُکونه. 44 پس گه: ”اُ خانه ئیَ کی اونِ جا باموم واگردَم.“ ولی هَطوکی اویا فارسه و خانه یَ خالی و جارو بکشه و ترتمیز دینه، 45 شه و هفت تا روح جه خودش بدترم اَورِه، و همه بدرون شیدی و اویا ایسیدی. آخر بسر اُ آدمِ عاقیبت بدتر جه اونِ اولی حال بِه. اَ نسلِ شرور عاقیبتم اَطو خوائه بوستن.» عیسی مار و براران 46 هو موقع کی عیسی مردومِ مرا گب زئی، اونِ مار و براران بیرون ایسابید و خواستید اونِ مرا گب بزنید. 47 پس اینفر اونَ خبر بدَه کی: «تی مار و براران بیرون ایسائید و خوائید تی مرا گب بزنید.» 48 عیسی جواب بدَه: «می مار کیسه؟ و می براران کیسید؟» 49 عیسی بازین خو دسِ مرا خو شاگردانَ ایشاره بُکود و بگفت: « می مار و براران اَشانید! 50 چون هر کی می پئرِ خواسته یَ کی آسمان درونِ بجا باوره، می برار و خاخور و می مار ایسه.» |
@ 2024 Korpu Company