لوقا 24 - کتاب مقدس به زبان گیلکی - گویش رشت و غرب گیلانعیسی زنده بوستن 1 هفته اوّلتا روج کی یکشنبه بو، صوب دَم، زناکان حنوطی کی چاکوده بیدَ خوشان مرا اوسادید و مقبره بُشوئید. 2 بیده ئید سنگی کی مقبره جُلُو نئَه، ایتا کنار گیل بُخورده دَره. 3 ولی وقتی مقبره بدرون بُشوئید، عیسی خُداوندِ جنازه یَ نیافتید. 4 اَ ایتفاقِ جا غاغا بوستید کی ناخبر دو تا مردای نورانی رختانِ مرا اوشان پهلو بأسائید. 5 زناکان ترسِ جا خوشان سرانَ بجیر توَدَه ئید؛ ولی اُ دو تا مردای اوشانَ بگفتید: «چره زنده یَ مُرده ئان میان وامُجید؟ 6 اون اَیا نئسا، بلکی زنده بُبوست! به یاد باورید موقعی کی جلیل درون ایسا بو، شمرأ چی بگفت. 7 بگفت کی انسان پسر بایسی گُناکاران دَسِ مرا تسلیم ببه، مصلوبَ به و سیوم روج زنده ببه.» 8 هو موقع زناکان اون گبانَ به یاد باوردید. 9 وقتی مَقبره جا واگردستید، اَ جریانَ اُ یازده رسول و دیگران ره واگویا بُکودید. 10 زناکانی کی اَ خبرَ رسولان فدَه ئید، مریمِ مَجْدَلیّه، یوآنّا، مریم یعقوب مار و زناکانی ئم اَشان همرأ بید. 11 ولی رسولان خیال بُکودید کی زناکان هَپَرا گفتن دَرید و اوشان گبان واور نُکودید. 12 با اَن همه پِطرُس ویرشت و مَقبره سو بُدُوست و فچمست و فندرست، ولی جُز کَفن هیچّی نیده. پس جه اونچی کی بیده بو حَیرانَ بوست و به خانه واگردست. عِمائوسِ راه میان 13 هو روج، دوتا جه اوشان «عِمائوس» آبادیَ شئون دیبید کی دوروَر ده کیلومتر جه اورشلیم فاصله دَشتی. 14 اوشان جه تمان جریاناتی کی ایتفاق دکفته بو همدیگر مرا گب زئیدی. 15 هَطوکی گرم گب زئن بید، عیسی، خودش، اوشان ورجه بامو و اَشان مرا همرأ بُبوست. 16 ولی اوشان واکوده کور بُبوستید کی عیسیَ نشناسید. 17 عیسی اوشان جا واورسه: «راه میان، همدیگر مرا چی باره گب زنیدی؟» هُطو کی اوشانِ قیافه جا غم وارِستی ساکت بأسائید. 18 بازون ایتا جه اوشان کی کْلِئوپاس نام دَشتی، عیسی جواب درون بگفت: «مگه تو تنها غریبه ئی ایسی کی اورشلیم درون جه اونچی کی اَ روجان میان ایتفاق دکفته بی خبری؟» 19 عیسی واورسه: «چی ایتفاقاتی؟» اوشان بگفتید: «اونچی کی عیسی ناصری سر بامو. اون پیغمبری بو کی خُدا دید درون و تمان مردوم ورجه، کلام و کاران پُر قُوائی دَشتی. 20 و چُطو کاهنان سران و اَمی پیله تران اونَ فَدَه ئید تا مَردنَ ره محکوم ببه و اون مصلوبَ کودید. 21 ولی اَمان امید دَشتیم کی اون هونی ببه کی بایسی اسرائیلَ نیجات بِده. بعلاوه اَن، جه اُ جریان تا الان سیوم روج درون ایسائیم. 22 بعضی جه زناکانم کی اَمی میان ایسائید، امرا ماتا کودید. اوشان ایمرو صُب دَم مَقبره بُشوئید 23 ولی اون جنازه یَ نیده ئید. هو موقع واگردستید، امرا بگفتید رؤیا درون فیریشته ئانیَ بیده ئید کی اَشان بگفتید عیسی زنده ئه. 24 بعضی جه اَمی رفقان مَقبره بُشوئید و جریانَ هُطو کی زناکان نَقل بُکوده بید، بیده ئید، ولی عیسیَ نیده ئید.» 25 هو موقع عیسی اَشان بگفت: «چنقد شُمان نادانید! چره اَنقد شمرأ سخته کی پیغمبران گبانَ واور بُکونید! 26 مگه نبایسی مسیح موعود اَ رنج ئان بیدینه و بازون به خو جلال فارسه؟» 27 عیسی بازین جه موسی و همۀ پیغمبران و اونچیَ کی تمان مُقدّسِ کِتابان درون اون باره بگفته بُبوسته بو، اَشان ره بنا به گب زئن بُکود. 28 وقتی اُ آبادی کی خواستید بیشیدَ فَارسن دیبید، عیسی وانُمود بُکود کی خوائه دورتر بشه. 29 اوشان بخواستید و بگفتید: «اَمی اَمرا بئس، چون هیچّی نمانسته که روج تمانَ به و شب فارسه.» پس بدرون بُشو تا اوشان مرا بئسه. 30 وقتی اَشان مرا سُفره سر نیشته بو، نانَ اوساد و شُکر بُکود، پَلکَ کود و اوشانَ فدَه. 31 هو موقع بو کی، اوشانِ چومان وازا بو و عیسیَ بشناختید، ولی هو دَم اوشان چوم جُلُو غیبَ بو. 32 اوشان همدیگر جا واورسه ئید: «مگه هو موقع کی راه میان اَمی مرا گب زئی و مُقدّسِ بینیویشته ئانَ امرا واشکافانه ئی، دیل اَمی سینه درون تاپ تاپ نُکودی؟» 33 پس تُند و تأکیدی ویریشتید و اورشلیمِ واگردستید. اویا اُ یازده رسولَ بیافتید کی خوشان رفقان مرا جمَ بوسته بید، 34 اوشان گفتید: «اَن حئیقت دَره کی خُداوند زنده بُبوسته، چونکی شَمعون ره ظاهیرَ بوسته.» 35 بازون، اُ دو نفر واگویا بوکودید کی راه درون چی ایتفاقی دکفته و چُطو عیسیَ وقتی کی نانَ پَلکَ کودن دوبو بشناختید. عیسی شاگردان ره ظاهیر به 36 هنو هُطو گب زئن دیبید کی عیسی خودِش اَشان میان بأسا و بگفت: «سلام به شُمان!» 37 ولی اوشان حَیران و هراسان، خیال کودید کی روح دِئن دَرید. 38 عیسی اوشانِ بگفت: «چره اَطو پریشانید؟ چره شک شیمی دیل درون راه دیئیدی؟ 39 می دَس و لِنگانَ فندرید. خودم ایسم! مَرا دَس بزنید و بیدینید روح گوشت و خاش ناره، ولی هَطو کی دینیدی من دَرم!» 40 اَنه بگفت و خُو دَسان و لِنگانَ اَشانَ نیشان بدَه. 41 اوشان ذوق جا ماتا بوستید و نتانستید واور بُکونید. پس عیسی اَشان بگفت: «هیچّی خوردن ره دَریدی؟» 42 ای پَلک بیبیشتَه ماهی اونَ فَدَه ئید. 43 اونَ بیگیفت و اَشان چومان جُلُو بُخورد. 44 هو موقع عیسی اوشانَ بگفت: «اَن هونیه کی وقتی شیمی مرا بوم گفتیم، اَن کی تمان اونچی موسی تورات درون و پیغمبرانِ کِتابان و مزامیر درون می باره بینیویشته بُبوسته، بایسی به انجام فارسه.» 45 بازون، اوشان فیکرَ وازا کود تا بتانید مُقدّسِ کِتاب بفهمید. 46 و عیسی اوشانَ بگفت: «بینیویشته بُبوسته کی مسیح موعود رنج خوائه کشِئن و سیوم روج مُرده ئانِ جا زنده خوائه بوستن، 47 و اونِ نام مرا توبه و گنائانِ آمرزش تمانِ مردوم ره موعظه به و اورشلیم جا بنا خوائه بوستن. 48 شُمان اَ چیان گُوائانید. 49 من می پئرِ موعودَ شمرأ اوسه کونم؛ پس شارِ درون بأسید تا هو موقع کی جه اعلی قدرت مرا پُرَ بید.» عیسی به آسمان شه 50 بازون عیسی اَشانَ شار جا بیرون تا بِیت‌ْعَنْیا نزدیکی ببَرد و اویا خو دَسان آسمانِ سمت درازا کود و اَشانَ برکت بدَه؛ 51 و هو دَم کی اَشانَ برکت دئَن دوبو اوشان جا سیوا بُبو، به آسمان ببَرده بُبوست. 52 اَشان اونَ پرستش بُکودید و پیله ذوق مرا اورشلیمَ واگردَستید. 53 اویا یسره معبد درون ایسابید و خُدایَ شُکر و سپاس گفتید. |
@ 2024 Korpu Company