لوقا 21 - کتاب مقدس به زبان گیلکی - گویش رشت و غرب گیلاننادار ویوه زنای پیش کش 1 عیسی دُوروبرَ فندرست و دارائانیَ بیده کی خوشان پیشکشان معبد بیت المال صوندوقِ درون تَوَدَه ئید. 2 اُ میان نادار ویوه زناکیَ بیده کی دو قِران صوندوق درون تَوَدَه. 3 عیسی بگفت: «حئیقتن شمرأ گَم، اَ نادار ویوه زنای جه همه اوشان ویشتر فَدَه. 4 چونکی اوشان همه جه زیادی خوشان دارائی فَدَئید، ولی اَ زنای، خو ناداری میان تمانِ خو روزیَ فَدَه.» آخر زمات نیشانه ئان 5 وقتی بعضیان معبد باره گب زئید کی چُطو قشنگِ سنگان مرا و پیش کشانی کی وقف بُبوسته بو تزئین بُبوسته، عیسی بگفت: 6 «اُ روجانی فارسه کی اونچیَ اَیا دینیدی، دِه سنگ سنگ سر نمانه، بلکی همه فُگورده.» 7 اوشان واورسه ئید: «اوستاد، اَ ایتفاقان کِی دَکفه و اوشان نزدیکَ بوستن نیشانه چیه؟» 8 عیسی جواب بدَه: «واخُب بیبید کی گُمرا نیبید؛ چونکی خیلیان می نام مرا خوائید اَمون و خوائید گفتن: "من هونم" و "موعود موقع فارسه". اوشان دُمبالسر نیشید.» 9 «و وقتی کی خَیلی جنگ و آشوب خبران ایشتاوید، هَراس ندَرید. چونکی بایستی اول اَجور چیان ایتفاق دکَفه، ولی آخر کار هودَم فانرِسه.» 10 بازون عیسی اوشانَ بگفت: «ملّتی ضّد ایتا دیگر ملّت و مملکتی ضّد ایتا دیگر مملکت خوائید ویریشتن. 11 پیله زمین لرزه و قحطی و طاعون خَیلی جائان خوائه اَمون، و خوفناک ایتفاقاتی دکفه، و عجایب و غرائب نیشانه ئان آسمان جا ظاهیر خوائه بوستن.» 12 «ولی پیش جه اَ ایتفاقان، شمرأ گرفتارَ کوده، اذیت خوائید کودن و یهودیان عبادتگا‌ئان و خولتانک درون خوائید واسپاردَن، و می نام واسی، شمرأ پادشائان و فرمانداران ورجه خوائید بَردن 13 و اَطو مُهْلَت پیدا کونید تا گُوائی فَدید. 14 اَنه خُب به یاد واسپارید کی جُلُوتر شیمی فیکرَ نانید کی خودتانِ دیفاع ره چی بیگید. 15 چونکی من شمرأ گُفتار و حیکمَتی خوائم فَدَن کی هیتّا جه شیمی دُشمندان، یارای شیمی جُلُو ایسان و مقاومت کودنَ نخوائید داشتن! 16 حتی شیمی پئر و مار و براران، رفقان و خویش و قوم شمرأ دُشمند دَس فَدید و بعضی جه شُمانَ خوائید کوشتن. 17 مردوم همتان می نام واسی شیمی جا خَفت خوائید داشتن. 18 ولی ایتا مو جه شیمی سر اَویر نخوائه بوستن. 19 صَبر امرا، شیمی جانَ نیجات خوائید دَئن.» 20 «وقتی بیدینید اورشلیمَ، دُشمند لشکر دوره بُکوده، حتم بدانید کی اونِ ویرانی فارسن دَره. 21 هو موقع اوشانی کی یهودیه درون بأسید کوئان سمت جیویزید و اوشانی کی شار درون بأسید جه شار بیرون بیشید، و اوشانی کی دشت و صارا درون بأسید شارَ وانگردید. 22 چونکی اُ روجان، مکافات روجانه، کی هر چی کی بینیویشته بُبو به انجام فارسه. 23 وای بر شکمدار زناکان و مارانی کی خوشان زاکانِ اُ روجان درون شیر دیئیدی! چونکی ایتا پیله مصیبت اَ ولایتَ سر اَیه و خُدا غیظَ دچار خوائید بوستن. 24 شمشیرِ ضربه مَرا کَفید و دیگر مردومان میان اوشانَ اسیری ره بَرید و اورشلیم غیر یهودیانِ لقد دمج خوائه بوستن تا هو موقع کی غیر یهودیانِ دوره به انجام فارسه.» 25 «آفتاو و ماه و ستاره ئانِ جا نیشانه ئانی پیدا بِه. زمین سر، مردومان دریا کولاک جا پریشان و سراسیمه خوائید بوستن. 26 مردوم جه ترسِ اونچی کی دُنیا سر وا بایه وحشتِ مرا غَش کونیدی، چونکی آسمانانِ قُوّتان به لرزه دکَفه. 27 هو موقع انسان پسرَ خوائید دِئن کی ابر درون پیله قوّت و جلال مرا اَیه. 28 هَطوکی اَ ایتفاقان شروع ببه، راست بأسید و شیمی سرانَ بُجور بیگیرید، چونکی شیمی نیجات نزدیکه!» 29 و اَ نَقل اوشان ره باورد: «انجیل دار و اویتا دارانَ بیاد باورید. 30 هُطو کی وَلگ دیئیدی، تانید بیدینید و بفهمید کی تابستان اَمون دَره. 31 جه اَرو، هر موقع بیدینید کی اَ ایتفاقان دکفه، فهمیدی کی خُدا پادشائی نزدیکه. 32 حئیقتن، شمرأ گَم، تا همه اَ ایتفاقان دنکفه، اَ نَسل از بین نیشه. 33 آسمان و زمین از بین خوائه شئون، ولی می گبان هرگس از بین نیشه.» 34 «واخُب بیبید، نِبِه کی عیش و نوش و مستی و زندگی دیل ناگرانیان شیمی دیله سخت بُکونه و اُ روج دام مانستن ایوارکی شیمی سر بکفه. 35 چونکی اَ ایتفاقان تمان دُنیا مردوم ره خوائه دکفتن. 36 پس همیشَک بپّائید و دُعا بُکونید تا بتانید جه همه اَ ایتفاقان کی بزودی خوائه دکفتن در امان بمانید و انسان پسرِ ورجه بأسید.» 37 عیسی هر روج معبد درون مردومَ آموختی و هر شب شار جا بیرون شوئی و کوهی کی زیتون نام دَشتی شبَ به صُب فارسانه ئی. 38 صُوب دَمان مردوم اونِ گبان ایشتاوستن ره معبد درون جمَ بوستید. |
@ 2024 Korpu Company