یوحنا 13 - کتاب مقدس به زبان گیلکی - گویش رشت و غرب گیلانعیسی خو شاگردان لنگان شوره 1 پیش جه پِسَخ عید، عیسی دَنستی کی اونِ وقت فارسن دَره تا جه اَ دُنیا پئر ورجه بشه، شاگردانی کی اَ دُنیا درون دوست دَشتیَ، تا به آخر محبت بُکود. 2 شام موقع بو. ابلیس پیشتر یهودای اَسخَریوطی، شَعمون پسر دیل درون بنه بو کی عیسیَ دُشمند دَس فَده. 3 عیسی کی دَنستی پئر همه چیَ اونِ دَس واسپارده و خُدا جا بامو و خُدا ورجه شه، 4 شام سر ویریشت و قبای تنِ جا بیرون باورد و ایتا حوله اوساد و خو کمرِ دور دَوَست. 5 بازون لَگَن درون آب دُکود و بنا به شاگردان لنگان شوستن بُکود و اُ حوله مرا کی خو کمرِ دور دَوَسته بو اوشان لنگانَ خُشکا کود. 6 وقتی کی شَمعون پطرُسَ فارسه، اون عیسیَ بگفت: «آقا، تو خوائی می لنگ بُشوری؟» 7 عیسی جواب بدَه: «الان نتانی بفهمی کی چی کودن درم، ولی دئرتر فهمی.» 8 پِطرُس عیسیَ بگفت: «می لنگانَ هرگس نخوائی شوستن!» عیسی جواب بدَه: «تا تره نُشورم هی سامی می اَمرا نخوائی داشتن.» 9 شَمعون پِطرُس بگفت: «آقا، نه فقط می لنگانَ، بلکی می سر و دَسانم بُشور!» 10 عیسی جواب بدَه: «اون کی حمام بُکوده، سرتا پا تمیزه و شوستنَ نیاز ناره، جغیر اونِ لنگان. شُمان پاکید، ولی نه همتان.» 11 چون دَنستی کیسه کی اونَ دُشمند دَس خوائه فَدَن، و اَنِ واسی بگفت: «شُمان همتان پاک نیئیدی.» 12 بعدِ اونکی عیسی اَشانِ لنگانَ بُشوست، خو قبای دوکود و ایوارده شام سفره سر بینیشت. بازون اَشانِ جا واورسه: «بفهمستید چی شمرأ بُکودم؟ 13 شُمان مَرا اوستاد و شیمی آقا دوخوانید و دُرُستم گیدی، چونکی اَطو ایسم. 14 پس اَگه من کی شیمی آقا و اوستادَم شیمی لنگانَ بُشوستم، شُمانم بایسی همدیگر لنگانَ بُشورید. 15 من اَ کار مرا، شمرأ نیشان بدم تا شُمانم هُطو رفتار بُکونید کی من شیمی اَمرا بُکودم. 16 حئیقتن، شمرأ گَم، نه نوکر خو ارباب جا پیله تره، نه اوسِه بُبوسته جه خو اوسِه کوده. 17 هسّا کی اَشانَ دانیدی، خوشا به شیمی حال اَگه اَشانَ عمل بُکونید. 18 «اونچی گَم شیمی همتان باره نیه. من اوشانیَ کی انتخاب بُکودم، ایشناسم. ولی مُقدّسِ کتابانِ اَ گَب بایسی به انجام فارسه کی: ”اونکی می نانَ بُخوره می اَمرا دُشمندی کونه.“ 19 الان پیش جه اونکی اَ ایتفاق دکفه، شمرأ گَم تا زماتی کی انجام ببه، ایمان باورید کی من هون ایسَم. 20 حئیقتن، شمرأ گَم، هر کی می اوسِه بُکوده یَ قُبیل بُکونه، مَرا قُبیل بُکوده، و هرکی مَرا قُبیل بُکون، اونی کی مَرا اوسِه بُکوده یَ قُبیل بُکوده دَره.» ایتا جه شُمان مَرا دُشمند دس فَده 21 عیسی بعد اونکی اَ گبَ بزه، روحِ میان پریشانَ بوست و آشکارا بگفت: «حئیقتن، شمرأ گَم، ایتا جه شُمان مَرا دُشمند دَس خوائه فَدَن.» 22 شاگردان همدیگرَ فندرستید، مطمئن نیبید کی اَنه کی باره گِه. 23 ایتا جه شاگردان، کی عیسی اونَ دوست دَشتی، سفره سر اونِ پهلو لم بدَه بو. 24 پس پطرُسِ شَمعون ایشاره مرا اونِ جا بخواست تا عیسی جا واورسه اونِ منظور کیسه. 25 اُ شاگرد هُطو کی لَم بدَه بو خورَه ویشتر عیسیَ نزدیکَ کود و واورسه: «آقا، اون کیسه؟» 26 عیسی جواب بدَه: «اون هونِ کی اَ لقمه نانَ بعد اَنکی کاسه درون بزنم اونَ فَدم.» هو موقع ایتا لقمه کاسه درون بزه و اونَ یهودا شَمعون اَسخَریوطی پسرَ فَدَه. 27 وقتی یهودا لقمه ی فیگیفت، هو دَم شیطان اون جلد درون بُشو. بازون عیسی اونَ بگفت: «اُ کاریَ کی خوائی انجام بدی، زودتر انجام بدن.» 28 ولی هیتّا جه اوشانی کی سفره سر نیشته بید، نفهمستید کی عیسی چره اَ گبَ یهودایَ بزه. 29 بعضیان خیال بُکودید چونکی یهودا دخل و خرج کیسه ی دَره، عیسی اونَ گِه کی اونچی عید واسی لازمه یَ بیهینه، یا اَنکی ایچی نادارانَ فدِه. 30 بعد اَنکی یهودا لقمه ی فیگیفت، درجا بیرون بُشو. و شب بو. عیسی تازه حُکم 31 بعد اونکی یهودا بیرون بُشو، عیسی بگفت: «الان انسان پسر جلال بیگیفت و خُدا اونِ درون جلال بیگیفت. 32 اَگه خُدا اونِ درون جلال بیگیفت، خُدائم اونَ خودش درون جلال خوائه دَئن و اونَ درجا جلال دئه. 33 عزیز زاکان، ایپچه ده شیمی مرا ایسام. می دُمبال گردیدی و هُطو کی یهودیان بگفتم، الانم شمرأ گَم اویا کی من شم، شُمان نتانید اَمون. 34 ایتا تازه حُکم شمرأ فدم، و اون اَنه کی همدیگرَ دوست بدَرید. هُطو کی من شمرأ دوست دَشتیم، شُمانم بایسی همدیگرَ دوست بدَرید. 35 اَگه همدیگرَ دوست بدَرید، تمان مردوم اَنه جا خوائید فهمستن کی می شاگردیدی.» 36 شَمعون پِطرُس بگفت: «آقا، کویا شی؟» عیسی جواب بدَه: «تو الان نتانی اُ جایی کی من شم می دُمبال بائی؛ ولی بعدا می دُمبال خوائی اَمون.» 37 پِطرُس بگفت: «آقا، چره الان نتانم تی دُمبال بایم؟ من می جانَ تی راهِ درون فدَم.» 38 عیسی بگفت: «تو، تی جانَ می راهِ درون فَدی؟ حئیقتن، تره گَم، پیش جه اونکی خوروس بخوانه، تو سه وار مَرا حَشا خوائی کودن.» |
@ 2024 Korpu Company