عبرأنیأن 9 - کتاب مقدس به زبان گیلکی - گویش رشت و غرب گیلان

زمینی مقدّس جا درون عبادت کودَن

¹ هسّا حتّی اُ اولتّا عهد، عبادت کودن ره قانونانی داشتی و زمین سَرَم ایتا مقدّس جا داشتی.

² چون ایتا خیمه برپا بُبوسته بو کی اولتّا قسمت درون، چراغدان، میز، و مقدّسِ نان نَئه بو. اَیا گیدی ’قُدس‘.

³ دومتا پرده پوشت، ایتا قسمت نَئه بو کی ’قُدس‌الاقداس‘ نام داشتی،

⁴ اَ قسمتِ درون، طلایی آتشدان بخورِ سوجانئن ره نَئه بو و عهدِ صُوندوق کی جه هر طرف طلا کاری بُبوسته بو، کی اونِ میان ایتا طلایی کوزه نَئه بو، کی ’مَنّا‘ یَ اونِ درون داشتیدی، هارونِ عصا کی تی تی بزه بو، و دوتا سنگی لوح کی عهدِ دَه فرمان اونِ رو بینیویشته بُبوسته بو.

⁵ صُوندوقِ بُجور کی اونَ رحمتِ تخت گفتیدی ’جلالِ‘ کروبیانِ فیریشته، سایه توَدَه بید. هسّا نتانیم اَ چیانَ بقاعده واشکافانیم.

⁶ بعد اونکی اَ چیان اَطویی آماده بوستی، کاهنان دائم اولتّا قسمتِ درون شوئیدی تا خوشانِ وظایفَ انجام بدید.

⁷ ولی فقط پیله کاهن، دومتّا قسمتِ درون شوئی و اونَم فقط سالی ایی مرتبه، و خو امرا قُربانی خونَ بَرِه تا خودشِ واسی و اُ گُنائانِ واسی کی مردوم، نادانی خاطری بُکودید تقدیم بُکونه.

⁸ و اَطویی روح القدّس نیشان دِئه تا اُ موقع کی اولتّا قسمت پابرجا ایسه، هنو اُ رائی کی قدّس الاقداسِ درون شِه بازَ نُبوسته،

⁹ کی اَن هه دورانِ ره ایتا نیشانه ایسه. مطابق اون، پیشکشان و قربانی ئانی کی فدَه به، نتانِه اُ کَسِ وجدانَ کی عبادت کونه، کاملا پاکَ کونه،

¹⁰ بلکی اوشان فقط خوراکی ئان و نوشیدنی ئان و جورواجور غُسلان و قانونانی ایسید کی بَدنَ ربط دَره، و فقط تا اُ موقع اعتبار دَره کی خُدا تازه ترتیبَ فَدِه.

رهایی بواسطه مسیحِ خون

¹¹ ولی وقتی کی مسیح، پیله کاهنِ مقامِ درون خُبِ چیانِ ره بامو کی هسّا اَمی نصیبِ بُبوسته، اون ایتا پیله تر و کاملترِ خیمه درون بامو کی دسِ مرا بساخته نُبوسته و اَ خلقتِ شین نیه.

¹² اون ایوار همیشک ره قُدس‌الاقداسِ درون بامو، نه بُزان و مانده ئانِ خونِ اَمرا، بلکی خودشِ خونِ مرا، و اَطو ابدی رهاییَ آماده بُکود.

¹³ چونکی اَگه بُزان و وَزائانِ خون، و مانده خاکسترِ فُکودن امرا اوشانِ سر کی ناپاک ایسید، اَشانَ تقدیس کونه تا جسمِ درون پاک بیبید،

¹⁴ چنقدر ویشتر مسیحِ خون، کی بواسطه اَبدی روح، خورَه بی عیب، خُدا ره تقدیم بُکود، اَمی وجدانَ بیخودی کارانِ جا پاکَ کونه تا خُدایِ زنده یَ خیدمت بُکونیم!

¹⁵ پس مسیح ایتا تازه عهدِ واسطه گر ایسه، تا اوشانی کی دعوت بُبوستید، بتانید اُ اَبدی میراثَ کی خُدا واده بدَه، بدَس باوَرید، چون ایتا مرگ اتفاق دَکفته کی اوشانَ، اُ گنائانِ جا کی اولتّا عهدِ درون انجام بُبوسته، رهائی دِئه.

¹⁶ چونکی زماتی ایتا وصیت اجرا به، کی ثابت بِبه اونکی وصیت بُکوده، بَمردیه.

¹⁷ چونکی وصیتَ، بَمرده بو پَسی شه اجرا کودن، و تا زماتی کی اونکی وصیت بُکوده زنده ایسه، اُ وصیتَ نیشه اجرا کودن.

¹⁸ جه اَ رو، حتّی اولتّا عهدَم بی خون برقرار نُبوستی.

¹⁹ چون اُ موقع کی تمانِ شریعتِ احکام، بواسطه موسی تمانِ مردوم ره اعلام بُبوست، اون، مانده ئانِ خون و بُزانِ خونَ بیگیفت و آب و سرخِ پشم و زوفا خالانِ امرا، هم طومارِ سر و هم تمانِ مردومِ سر بپاشانه.

²⁰ و بگفت: «اَنه اُ عهدِ خون کی خُدا شمرأ حکم بُکود.»

²¹ و هُطو اُ خونَ خیمه رو و هم تمانِ ظرفانِ رو کی پرستش ره به کار شوئی، بپاشانه.

²² راس راسی، عینِ شریعت تقریبا همه چی خونِ مرا پاکَ به، و بدونِ اَنکی خون فکوده بِبه، گنائانِ آمرزش وجود ناره.

²³ پس بایستی اَ چیانَ کی ایتا نمونه آسمانی چیانِ جا ایسید، اَ قربانی ئانِ امرا پاکَ بید، ولی خودِ آسمانی چیان اُ قربانی ئانِ امرا کی اَشانِ جا بختره، پاکَ بیدی.

²⁴ چونکی مسیح اُ قُدس الاقداس کی دسِ مرا بساخته بُبوسته و فقط اُ حقیقی چیانِ جا ایتا نمونه ایسه بُدرون نُشو، بلکی به خودِ آسمان بُشو تا اَمی طرفِ جا خُدا محضر میان ظاهر بِبه.

²⁵ و اَطو نیه کی اون، خورَه دائم قربانی بُکونه، ایتا پیله کاهن مانستن کی هر سال قُدس‌الاقداسِ درون شه اونَم اُ خونِ امرا کی خودشِ خون نیه.

²⁶ چونکی اَطویی، مسیح بایستی جه زماتی کی دُنیا بنا بُبوست یکسره عذاب بکشِه بی، ولی اَطو نُبوست، اون هسّا، ایوار همیشک ره آخرتا زمانانِ درون بامو تا خو قربانی کودن مرا، گنایَ جه میان اوسانه.

²⁷ هُطوکی تعیین بُبوسته انسان ایوار بیمیره و بازون پس داوری اَیه،

²⁸ پس مسیح ئم کی ایی مرتبه قربانی بُبوسته تا خَیلیانِ گنائانَ اوسانه، دومین باره ره اَیه، ولی نه گُنائانِ اوسادنِ واسی، بلکی اوشانِ نجاتِ واسی کی شوقِ امرا اونِ چوم بِراه ایسید.