عبرأنیأن 6 - کتاب مقدس به زبان گیلکی - گویش رشت و غرب گیلان

¹ پس بائید مسیحِ ابتدایی درسانَ پوشتِ سر بَنیم و بالغ بوستنِ سمت جُلو بیشیم. امان نبایستی ایوارده بنایَ، توبه و بیخودی کاران و ایمان به خُدا ره،

² و غُسل تعمیدانِ یاد دئن ره، دَس گُذاری ئان، مُرده ئان زنده بوستن و اَبدی داوری ره بَنیم.

³ اگه خُدا اجازه فَده اَ کارَم کونیم.

⁴ چون اوشانی کی ایوار نورانی بُبوستید، اوشان کی آسمانی پیشکشِ مزه یَ بیچیشتید و روح القدّسِ درون شریک بُبوستید،

⁵ و خُدا کلامِ خُبی مزه و دوران آینده قوتانِ مزه یَ بچیشتید،

⁶ و بازون ایمانِ جا بکفید دِه نشه اَشانَ جه از سر توبه سمت آوَردن، چره کی اوشان بازم به ضرر خودشان، خُدا پسرَ صلیب سر بریدی و اونَ همه کسِ جُلو بی حرمت کونیدی.

⁷ اگر ایتا زمین وارشیَ کی خَیلی موقع اونِ سر واره به خودَش بیگیره و اوشانِ واسی کی اَشانِ ره بکاشته بُبوسته خُبِ محصول بار باوَره، خُدا جا برکت گیره.

⁸ ولی اگر توموش گومار به بار باوَره، بی ارزشِ زمینِ و دِه نزدیکِ لعنت بِبه و سرآخر بوسوجانه خوائه بوستن.

⁹ اَی عزیزان، هر چن اَطو گب زنیم، ولی شیمی باره حتم دَریم کی بختر چیان، کی نجاتِ شینه، شیمی نصیب به.

¹⁰ چونکی خُدا بی انصاف نیه کی شیمی کار و محبتیَ کی اونِ نامِ واسی مقدّسینِ خیدمتِ درون نیشان بدَه ئید جه یاد بِبره، هُطوکی هنوزَم کودَن دَرید.

¹¹ اَمی آرزو اَن بو کی، هرتا جه شُمان تا به آخر هو غیرتَ نیشان بدید تا شیمی اُمید تمان و کمال آشکار بِبه.

¹² تا تَنبل نیبید بلکی شیمی سرمشق، اُ کسانی بیبید کی ایمان و صبر اَمرا واده ئانِ وارث بیدی.

خُدا واده‌ ئان حتمی ایسه

¹³ اُ موقع کی خُدا ابراهیمَ واده بدَه، چونکی هیکّس اونِ جا پیله تر نُبو کی اونِ سر قَسم بخوره، پس خودشِ سر قَسم بخورد

¹⁴ و بُگفت: «حتم بدار کی تَره برکت دَئم و تَره زیادَ کونم.»

¹⁵ و اَطویی، ابراهیم بعدِ اونکی صبر اَمرا رافا بئسا، واده یَ بدَس باوَرده.

¹⁶ چونکی مردوم اُ کسِ سر قسم خوریدی کی اوشانِ جا پیله تَرِه، و تمانِ اوشانِ جر و بحثان درون، قَسَمی نَئه کی آخربسر اوشانِ گبانَ ثابت کونه.

¹⁷ پس، اُ موقع کی خُدا خواستی ویشتر نیشان بِده کی اونِ واده، وارثانِ ره عوضَ نیبه، اونَ، قَسمِ اَمرا ضمانت بُکود.

¹⁸ تا بواسطه دو چی کی عوضَ نیبه، و امکان ناره کی خُدا اوشانِ باره دوروغ بگه، اَمان خَیلی دیلگرم بیبیم، اَمان کی پناه آوَردنِ ره جیویشتیم، تا اُ اُمیدیَ کی اَمی جُلو قرار بدَه بُبوسته، قایم بداریم.

¹⁹ اَ اُمید اَمی جانِ ره ایتا لنگرَ مانه کی قرص و مطمئن ایسه، اُمیدی کی اُ طرفِ خیمه پرده شه، اُ درونی جیگا درون، به قُدسُ الاَقداس،

²⁰ اُ جایی کی عیسی جُلوتر جه اَمان و اَمی واسی بدرون بُشو، و تا ابد پیله کاهن بُبوست، مِلْکیصِدِق رَدّه درون.