عبرأنیأن 5 - کتاب مقدس به زبان گیلکی - گویش رشت و غرب گیلان

¹ چون هر تا پیله کاهن کی مردومِ میان انتخاب به، تعیین به تا اُ کارانِ درون کی خُدایَ ربط دَره مردومِ نماینده بِبه، تا گُنائانِ واسی پیشکشان و قربانی ئانی، خُدا ره تقدیم بُکونه.

² اون تانه نادانان و گمراهانِ مرا نرمی امرا رفتار بُکونه، چونکی اون خودش ضعف دَره.

³ هنه واسی، اون بایستی خو گُنائانِ ره قُربانی فَده هُطوکی مردومِ ره فَدِه.

⁴ و هیکّس خودش، نتانه اَ کاهنی اِفتخارَه خورَ فَده، بلکی اَ افتخار فقط اُ زمات کی خُدا اونَ دوخوانه اونَ فارَسه، هُطوکی هارونَ فارَسه.

⁵ مسیح هم خودش، خورَه بجور نَبرد تا پیله کاهن بِبه، بلکی تعیین بُبوسته بواسطه اونکی اونَ بگفت: تو می پسر ایسی؛ «ایمرو، من تَره مولود بُکودم.»

⁶ هُطوکی اون ایتا جا دیگرئم گه: « تو تا اَبد کاهن ایسی، مِلْکیصِدِق رَدّه درون.»

⁷ اُ روجانی کی عیسی جسم درون ایسابو، گریه ئانِ اَمرا و آرسو ئان و بلندِ ایژگره اَمرا اونِ ورجه کی تانستی اونَ مرگ جا نجات بدِه، دُعا و التماس بُکود و خو کاملِ اطاعتِ واسی، اونِ دعا مستجاب بُبوست.

⁸ هرچن کی پسر بو، اُ عذابان واسی کی بکشه اطاعتَ یاد بیگیفت.

⁹ و اُ موقع کی کامل بُبوست، تمانِ اوشانِ ره کی اونِ جا اطاعت کونیدی، اَبدی نجاتِ سرچشمه بُبوست،

¹⁰ و خُدا طرفِ جا تعیین بُبوست کی پیله کاهن بِبه، مِلْکیصِدِق رَدّه درون.

هُشدار، وَگردَستن ایمان جا

¹¹ اَنه باره خَیلی چیان دَریم کی بیگیم، ولی اوشانِ گفتن سختِ، چره کی شیمی گوشان سنگین بُبوسته.

¹² چون هرچن کی شُمان تا هسّا بایستی آموجگار بُبوسته بید، احتیاج داریدی اینفر خُدا کلامِ ابتدایی اصولَ ایوارده شمرأ باموجه. شُمان هنو شیر خوائیدی نه سنگینِ غذا.

¹³ چونکی هرکس شیرخواره ایسه، صالحی کلامِ درون بی تجربه ایسه، چونکی طفلِ.

¹⁴ ولی سنگینِ غذا پیله آدمانِ شینه، اوشانِ ره کی خوشانِ قوه ی تشخیصَ زیادی تمرینِ اَمرا، اوجور تربیت بکودید کی بتانید بَد و خُبَ تشخیص بَدید.