عبرأنیأن 13 - کتاب مقدس به زبان گیلکی - گویش رشت و غرب گیلان

قربانی ئانی کی خدایَ راضی کونه

¹ برارانه محبت شیمی میان برقرار بِبه.

² جه اَنکی نسبت به غریبه ئان میمان دوست بیبید، غافیل نیبید، چونکی اَ کارِ امرا، بعضیان بی اونکی بدانید، فیریشته ئانِ جا پذیرایی بکودید.

³ اوشانیَ کی زندانِ درونید به یاد بدَرید، هُطوکی انگار شمانم اوشانِ مَرا زندانِ درون ایسائید؛ و اوشانیَ کی عذاب کشیدی به یاد بدَرید، چونکی شمانم تنِ درون عذاب کشیدی.

⁴ وَئلید ازدواج همتانِ میان حرمت بدَره و زن و مَردی رابطه، پاک بِبه چونکی خُدا بی‌عفتان و زِنا کارانَ داوری کونه.

⁵ شیمی زیندگیَ پولدوستی جا دور بدَرید، و اونچیِ امرا کی دَریدی قانع بیبید، چونکی خُدا بگفته: « هرگس تَره وِلَ نُکونَم، و تَره تنها نَنَم.»

⁶ پس امان تانیم اطمینانِ امرا بیگیم: «خُداوند می یاوَر ایسه، نخوائَم ترسئن. آدمی می امرا چی تانه بُکونه؟»

⁷ شیمی رهبرانَ به یاد بدَرید، اوشان کی خُدا کلامَ شمرأ بگفتید. اوشانِ زیندگی شیوه عاقبتَ نیگا بُکونید و اوشانِ ایمانِ جا سرمشق بیگیرید.

⁸ عیسی مسیح دیروج و امروج و تا ابد هونه.

⁹ جورواجور و عجایب غرایب تعلیمانِ مَرا از راه به دَر نیبید؛ چونکی اَن خُبِ کی آدمی دیل فیضِ امرا قوت بیگیره، نه اُ خوراکی ئانِ امرا کی اوشانِ ره کی اونِ دُمبال شیدی هی نَفعی ناره.

¹⁰ اَمان ایتا قُربانگاه داریمی، کی اُ خیمه خادمان، حَقّ ناریدی اونِ جا بُخورید.

¹¹ پیله کاهن، اُ حَیواناتِ خونَ، گُناهِ قربانی واسی قُدس‌الاقداس درون بَرِه، ولی اوشانِ لاشه ئان بیرون جه اُ ردوگاه بُسوجانه بِه.

¹² هَطوئی، عیسی ئم بیرون جه شارِ دروازه عذاب بکشه تا بواسطه خو خون، مردومَ تقدّیس بُکونه.

¹³ پس بائید امانَم اَ اُردوگاهِ جا بیرون بائیم و اونِ ورجه بیشیم و اونِ نَنگ و خواری درون شریک بیبیم.

¹⁴ چونکی امان اَیا شاری ناریم کی بجا بمانه، بلکی شوقِ امرا اُ شار رافا ایسائیم کی خوائه بایه.

¹⁵ پس بائید بواسطه عیسی هَطو تَتَرَج شُکر کودنِ قُربانیَ، خُدا ره تقدیم بُکونیم. اَ قُربانی، اُ لبانِ ثمره یِ کی اونِ نامَ اعتراف کونیدی.

¹⁶ خُبی کودنِ جا و دیگرانِ شریک کودن اونچی درون کی داریدی، غافل نیبید چونکی خُدا اَجور قُربانیانِ جا راضی ایسه.

¹⁷ شیمی رهبرانِ جا اطاعت بُکونید و اوشانِ تسلیم بیبید؛ چونکی اوشان شیمی جانانِ جا حفاظت کونیدی، و بایستی حساب پس بَدید. وَئلید اوشان اَ کارَ شادی اَمرا بُکونید نه آه و ناله مرا، چونکی اَن شیمی نفع نیه.

¹⁸ امرا دعا بُکونید، چونکی اطمینان داریمی اَمی وجدان پاکِ و خوائیم جه هر طرف سربُلند بیبیم.

¹⁹ شیمی جا ویشتر و ویشتر خوایَم کی دعا بُکونید تا زودتر شیمی ورجه واگردم.

²⁰ هسّا کی صلح و سلامتی خُدا، بواسطه اُ اَبدی عهدِ خون، اَمی خُداوند عیسیَ مُرده ئانِ جا زنده بُکود یعنی گوسفندانِ پیله شبانَ،

²¹ هو خُدا شمرأ هر خُبِ چی امرا مجهز بُکونه، تا اونِ اراده یَ بجا باوَرید، تا اونچی کی خُدایَ راضی کونه بواسطه عیسی مسیح اَمی درون به عمل باوَره. هو عیسی مسیح کی تا اَبد و تا اَبد جلال اونِ امرا بِبه. آمین.

²² براران، شیمی جا خوائم می گبَ کی پند و نصیحت ایسه، تاب باوَرید چونکی مختصر شمرأ بینویشتم.

²³ بایستی بدانید کی اَمی برار تیموتائوس آزادَ بوسته. اگر اون زو بایه، اونِ امرا اَیم و شمرأ دینم.

²⁴ تمانِ شیمی رهبران و تمانِ مقدّسینَ سلام برسانید. اوشانی کی ایتالیا شینید شمرأ سلام فارسانیدی.

²⁵ فیض شیمی همتانِ امرا بِبه.