افسسیان 6 - کتاب مقدس به زبان گیلکی - گویش رشت و غرب گیلان

پئر و مار و زاکان

¹ ای زاکان، خُداوند درون شیمی پئر و مار جا اطاعت بُکونید، چونکی دُرُستِ کار اَنه.

² «تی پئر و مارِ احترامَ بدَر»کی اَن اولتّا حُکمِ واده مَرا:

³ «تا خوشبخت بیبی و زمین سر درازِ عمر بدَری.»

⁴ ای پئران، شیمی زاکانَ برزخ نُکونید، بلکی اوشانَ خُداوند تربیت و تعلیم مرا پیله کونید.

نوکران و اربابان

⁵ ای نوکران، شیمی زمینی اربانانَ ترس و لرز مرا، و دیل و جانِ امرا اطاعت بُکونید، هُطوکی انگار مسیحِ جا اطاعت کونیدی،

⁶ و اَنم، نه فقط زماتی کی شمرأ نیگا کودَن دَریدی، اوشانِ مانستن کی اَنه دُمبالید کی آدمانَ راضی بُکونید، بلکی مسیحِ نوکران مانستن، کی خُدا اراده یَ دیل و جان امرا انجام دیئیدی.

⁷ خُبِ نیت مَرا خیدمت بُکونید، هُطوکی انگار خُداوندَ خیدمت کونیدی نه آدمَ،

⁸ دانیدی کی هرکس کی خُب کار بُکونه، اونِ جوابَ خُداوند جا فیگیره، چی نوکر بِبه، چی آزاد.

⁹ ای اربابان، شیمی نوکران مَرا هَطو رفتار بُکونید، و اوشانِ تهدید کودن جا دَس اوسانید، چون دانیدی اونکی هم اَشانِ اربابِ و هم شیمی اربابِ، آسمان درون ایسا و اون هیکّسِ میان فرق نَنِه.

خُدا تمان و کمال اسلحه

¹⁰ آخرسر خُداوند درون، و اُ قوت درون کی اونِ قدرت جا آیه قوی بیبید.

¹¹ خُدا اسحله یَ تمان و کمال دُکونید تا بتانید ابلیسِ حقه ئانِ جُلُو بأسید.

¹² چونکی اَمی جنگ، جسم و خون مَرا، یعنی آدمی امرا نیئه، بلکی اَمان رئیس ئانِ ضد، قدرتانِ ضد، و اُ تاریکی نیروئانِ ضد کی اَ دُنیا سر حاکمید، شریر روحانِ لشگرانِ ضد کی آسمانی جیگائان درونید، جنگ کودن دَریم.

¹³ پس خُدا اسحله یَ تمان و کمال دُکونید، تا شرِ روجِ درون بتانید قائم بأسید، و بتانید بعد انکی همه چی انجام بُبوست، پابرجا بأسید.

¹⁴ پس قائم بأسید، اوجور کی حئیقتِ کمربندَ دَوَستید و شیمی صالحی زره یَ دُکوده اید،

¹⁵ صلح و سلامتی انجیلَ ایتا چاروغ مانستن دُکونید اوجور کی انگار اونِ اعلام واسی، آماده اید.

¹⁶ هر وضعِ درون، ایمانِ سپرَ اُسانید، تا اونِ امرا بتانید تمانِ اُ شریرِ، آتشی تیرئانَ دُکوشانید.

¹⁷ نجاتِ کلاهخودَ سر بَنید و روحِ شمشیر کی هو خُدا کلام ایسه، بِدَس بگیرید.

¹⁸ و همیشک، هر جور دُعا و خواهش امرا، خُدا روحِ درون دُعا بُکونید. هنه واسی بیدار و واخُب بیبید و مقاومتِ امرا همیشک تمان مقّدسین ره دُعا بُکونید.

¹⁹ و مِره ئَم دُعا بُکونید، تا هر وقت می دهنَ گب زئن ره وازه کونم، اُ قدرتِ کلام مَرا فدَه بِبه، تا انجیل رازَ، دیل و جرأت مَرا اعلام بُکونم،

²⁰ هو انجیل کی اونِ سفیرم، هرچن زنجیل درون! دُعا بُکونید کی اونَ جرأت مرا اوجور کی اونِ شأنِ، اعلام بُکونم.

آخربسر

²¹ اَنه واسی کی می احوال جا واخب بیبید و بدانید چی کودَن دَرم، تیخیکوس کی عزیز برار و وفادار خیدمتکار خُداوند درونِ، شمرأ همه چیَ خوائه گُفتن.

²² من اونَ اَ قصد مَرا شیمی ورجه اوسه کودَم تا اَمی احوالِ جا واخبر بیبید، و تا اون، شمرأ دیلگرم بُکونه.

²³ خُدای پئر طرفِ جا و خُداوند عیسی مسیح طرف جا، براران ره صلح و سلامتی و محبت ایمان مرا بِبه.

²⁴ اونِ فیض تمان اوشانِ امرا کی اَمی خُداوند عیسی مسیحَ اُ محبتِ مَرا کی از بین نشه، دوست دَریدی.