افسسیان 3 - کتاب مقدس به زبان گیلکی - گویش رشت و غرب گیلان

انجیلِ راز آشکارَ به

¹ جه اَ رو من، پولُس، شُمان غیر یهودیانِ خاطری، مسیحْ عیسی زندانی ایسم-

² بی شک شُمان اَ جریانِ باره بیشتاوستید کی خُدا فیضِ نظارت شیمی خیدمت واسی مَرا فدَه بُبوسته،

³ کی چطو اُ راز، مکاشفه اَمرا، مِره آشکارَ بوست، هُطوکی مختصر شمرأ بینیویشتم.

⁴ وقتی کی اونَ بخوانید، خوائید فهمستن کی من چطو مسیحِ رازَ بفهمستم،

⁵ اُ رازی کی قدیمِ نسلان درون، آدمانِ پسرانِ ره آشکار نُبوسته بو، اوجور کی هسّا بواسطه ی روح القدّس، اونِ مقدّس رسولان و پیغمبران ره آشکار بُبوسته.

⁶ اَ راز اَنه کی غیر یهودیانم مسیح عیسی درون و بواسطه ی انجیل، هم ارثید و هو تنِ اعضا ایسید و خُدا واده درون شریکید.

⁷ من مطابقِ خُدا فیضِ پیشکش، اَ انجیلِ خیدمتکار بُبوستم کی بواسطه ی اونِ قدرت عمل، مَرا فدَه بُبوسته.

⁸ هرچن کی من تمانِ مُقدّسین میان همه کسِ جا کم تَرینَم، اَ فیض مَرا فدَه بُبوست تا مسیحِ اَ بی حد و حساب گنج ئانَ غیر یهودیانِ ره اعلام بُکونم،

⁹ و همه کسِ ره نیشان بدَم کی خُدا نقشه چطو انجام به. خُدا کی همه چیَ خلق بُکوده، خو اَ رازَ جه قدیم، مخفی بداشته.

¹⁰ تا بواسطه ی کلیسا، خُدا جورواجورِ حکمت، آسمانی جیگائانِ رئیس ئان و قدرتان ره آشکار بِبه.

¹¹ اَن هو هدفی بو کی خُدا جه ازل داشتی، کی خُدا اونَ اَمی خُداوند میسح عیسی درون به انجام فاراسانه.

¹² امان مسیح درون بواسطه ی ایمانی کی اونَ دَریم، تانیم جرأت و اطمینانِ مَرا، خُدایَ نزدیک بیبیم.

¹³ پس شیمی جا خواهش کونم اُ رنج ئانِ خاطری کی شیمی واسی کشئندرم، دیلسرد نیبید، چره کی اوشان شیمی افتخار باعث ایسه.

دُعا، روحانی قوتِ واسی

¹⁴ جه اَ رو من، آسمانی پئرِ جُلُو زانو زَنم،

¹⁵ کی هر خانواده، آسمان درون و زمین سر، اونِ جا نام گیریدی،

¹⁶ کی بنا به خو جلالِ دولتمندی شمرأ ببخشه تا بواسطه ی خُدا روح، شیمی باطنِ درون قوی و نیرومند بیبید،

¹⁷ تا مسیح بواسطه ی ایمان، شیمی دیلان درون بمانه و محبت درون بَنه بُکونید و پابرجا بیبید،

¹⁸ تا قوت بدارید کی تمانِ مُقدّسین امرا، مسیحِ محبتِ درازا، پهنا، عُمق و بلندیَ بفهمید،

¹⁹ و مسیحِ محبتَ کی بشرِ معرفتِ جا بُجورتر ایسه، بشناسید- تا تمانِ خُدا کامِلی جا پُر بیبید.

²⁰ هسّا، جلال بِبه اُ خُدا ره کی تانه بواسطه اُ قدرت کی اَمی درون کار کونه، خَیلی ویشتر جه اونکی امان خیال بُکونیم یا بخوائیم، عمل بُکونه.

²¹ کلیسا درون و مسیحْ عیسی درون، تمانِ نسلانِ درون، تا ابد، خُدا ره جلال بِبه! آمین.