کولسیان 4 - کتاب مقدس به زبان گیلکی - گویش رشت و غرب گیلان

¹ ای اربابان، شیمی نوکرانِ اَمرا عدل و انصاف مرا رفتار بُکونید، چونکی دَنیدی کی شُمانم ایتا ارباب آسمان درون دَریدی.

² همیشک دعا درون استوار بیبید، شُکر کودَن اَمرا، دعا درون واخُب بیبید.

³ همزمان اَمَرَئَم دُعا بُکونید تا خُدا، کلام واسی ایتا دَر اَمرا وازه کونه، تا بتانیم مسیحِ رازَ اعلام بُکونیم. اُ رازی کی اونِ واسی زندان درونَم.

⁴ تا بتانم اونَ هُطوکی خُب ایسه، واضح اعلام بُکونم.

⁵ اُ مردومانِ امرا کی بیرون جه کلیسا ایسائید، حکمتِ امرا رفتار بُکونید و هر فرصتِ جا بِخُبی استفاده بُکونید.

⁶ شیمی گبان همیشک فیضِ جا پُر و سنجیده بِبه، تا بدانید هرکسَ چُطو جواب بدید.

آخرتا سلام ئان

⁷ تیخیکوس شمرأ کامل می حال جا واخبر کونه. اون، عزیزِ برار و وفادار خیدمتکار و خُداوند درون، می امرا هم خیدمت ایسه.

⁸ اونَ شیمی ورجه اوسه کونم تا اَمی حالِ جا وا خبر بیبید، تا شمرأ دیلگرم بُکونه.

⁹ اون، اونیسیموسِ اَمرا، اَمی وفادار و عزیزِ برار کی ایتا جه خودتان ایسه، شیمی ورجه آیه. اَشان شمرأ جه هر چی کی اَیا اتفاق دَکفتَن دَره، واخبر کونیدی.

¹⁰ آریستارخوس کی می اَمرا زندان دورن ایسا، شمرأ سلام فاراسانه، هَطوئَم مَرقُس، برنابا عمو پسر، شمرأ سلام فاراسانه. پیشتر اونِ باره شمرأ سفارش بُکوده بوم کی هر وقت شیمی ورجه بایه، گرمی مرا اون قُبیل بُکونید.

¹¹ و عیسی کی اونَ یوستوسَم گیدی، شمرأ سلام فاراسانه. می همکارانِ میان خُدا پادشایی کار واسی فقط اَشان ختنه بُبوسته مَرداکانید و می تسلی باعث بید.

¹² اِپافْراس، کی ایتا جه شُمان و مسیحْ عیسی نوکر ایسه، شمرأ سلام فاراسانه. اون همیشک دُعا درون خُدا جا خوائه کی شُمان پیله و خاطر جمع آدمان مانستن پابرجا بمانید و خُدا اراده جا کاملا اطاعت بُکونید.

¹³ من شاهدم کی، اون شیمی واسی و اوشانِ ره کی لائودیکیه و هیراپولیس درون ایسایدی، سخت زحمت بکشه.

¹⁴ عزیزِ طبیب لوقا و دیماس شمرأ سلام فاراسانیدی.

¹⁵ اَمی براران و خاخوران لائودیکیه درون و هَمچنین نیمفا و کلیسایی کی هه بانو خانه میان برپا به، سلام فاراسانید.

¹⁶ و هَطوکی اَ نامه شیمی میان بخوانده بُبوست، لائودیکیه کلیسا درونَم بخوانده بِبه؛ و شُمانم می نامه یَ کی لائودیکیه ره بینیویشتم، بخوانید.

¹⁷ و آرخیپوسَ بیگید: «تی حواس بمانه، تا خیدمتیَ کی خُداوند درون تَره واسپارده بُبوسته، کامل انجام بدی».

¹⁸ من، پولُس، اَ سلامَ می دَس امرا نیویسم. می زنجیلانَ اَ زندانِ درون به یاد باوَرید. فیض شیمی امرا بِبه.