اعمالٚ رسولأن 7 - کتاب مقدس به زبان گیلکی - گویش رشت و غرب گیلاناستیفان گبان یهود شورا جُلُو 1 پیله کاهن استیفان جا واورسه: «اَ چیان راسته؟» 2 استيفان بگفت: «اَی براران و اَی پئران مرا گوش بَدید، پُر جلالِ خُدا، وقتی کی اَمی پئر ابراهیم پیغمبر، بین النهرین منطقه درون ایسأ بو اونِ ره آشکارَ بوست، اُ زمات کی هنو حَران نُشو بو 3 و ابراهیمَ بگفت: ”تی ولایت و تی خویش و قومَ وِلا کون و اُ ولایتی کی تره نیشان خوائم دئن بوشو.“ 4 «پس، ابراهیم کلدانیانِ ولایت جا رادکفت و حَرانِ درون بأسا. بعدِ اَنکی اونِ پئر بَمرد، خُدا اونَ اُ ولایتی کی ایمرو شُمان اونِ درون ایسائید کوچ بدَه. 5 با اَ حال خُدا هی ارثی ابراهیمَ فأنده حتی ایی چارَک زمین؛ ولی واده بدَه کی اُ زمینَ، ابراهیم و بعد اون، اونِ نسلَ فدِه. هر چن ابراهيم اُ موقع هنو زای ناشتی. 6 خُدا ابراهیمَ بگفت: ”تی نسل غریب ولایت درون ایتا غریبه مانستن زیندگی کونیدی و چهارصد سال اَشانَ اسیری گیریدی و اَشانَ ظولم خوائید کودن.“ 7 ”ولی من اُ ملتّیَ کی اَشان اوشانِ نوکری یَ کونیدی مجازات خوائم کودن، خُدا بازم بگفت: بازون پس، می مَردوم اُ ولایتَ ترکا کونیدی و اَیا مرا پرستش خوائید کودن.“ 8 و خُدا ختنه کودن عهدَ ابراهيمَ فدَه. پس، اسحاق ابراهیم ره بزا بُبوست و اونَ هشتم روج درون ختنه بُکود. و اسحاق یعغوب پئر بُبوست، و یعغوبم دوازده تا پاتریارخ پئر یعنی اَمی دوازده تا پیله جد بُبوست.» 9 «ولی پاتریارخ ئان حسودی جا، یوسفَ مصریانَ بُفروختید. ولی خُدا یوسف اَمرا بو 10 و اونَ تمان خو مصیبتانِ جا نجات بدَه. خُدا یوسفَ حکمت فَده، و فرعون مصر پادشاه نظر درون عزیز بُکود، اُطوکی فرعون، یوسفَ مصر فرمانروا و خو دربار پیله تر چاکود.» 11 «بازون، تمانِ مصر و کنعان درون ایتا پیله قحطی و مصیبت بامو و اَمی پئران هیچی خوردن ره نیافتید. 12 ولی وقتی اَمی جد یعقوب بیشتاوسته کی مصر درون گندم پیدا به، اَمی پئرانَ، اولتّا سفر اویا روانه کود. 13 دومّتا سفر درون، یوسف، خودشَ خو براران ره بشناسانه و فرعون، یوسفِ خانواده مرا آشنا بُبوست. 14 یوسف، اوسه کود کی خو پئر یعقوب و تمان اونِ خانواده کی سر جمع هفتاد و پنج نفر بید، مصر درون اونِ ورجه باورید. 15 یعقوب بامو مصر و هویا بمَرد. هم خودش و هم اَمی پئران؛ 16 ولی اوشانِ جنازه ئانَ شِکیم شار واگردانه ئید و اُ مقبره درون بنه ئید کی ابراهیم، نقره پول مرا حَمورِ پسران جا بیهه بو.» 17 «ولی هُطوکی، خُدا واده وقت ابراهیمِ ره نزدیکَ بوستی، اَمی مردوم تعدادَم مِصر میان زیادَ بوستن دُبو، 18 تا اَنکی ایتا دیگه پادشاه بامو کی یوسفَ نشناختی. 19 اُ پادشاه اَمی مردومِ اَمرا حیله مرا رفتار بُکود و اَمی پئرانَ خَیلی ظولم بُکود و اوشانَ مجبور بُکود کی خوشانِ قُنداقه زاکانَ بیرون وِلَا کونید تا زنده نَمانید.» 20 «هه دوران درون بو کی موسیَ پیغمبر بزا بُبوست. اون خُدا نظر درون قشنگ زای بو. موسی سه ماه خو پئر خانه پیله بوست. 21 وقتی موسیَ بیرون وِلا کودید، فرعونِ کُر اونَ به فَرزندی قُبیل بُکود و خو پسر مانستن اونَ پیلَه کود. 22 جه اَرو موسی تمان مصری ئان حکمتَ یاد بیگیفته و خو گُفتار و کردار درون قوی بُبوست.» 23 «وقتی موسی چهل ساله بُبوست، اَنه دیل درون دکفت کی خو براران، یعنی یعغوبِ نسلِ، وضع اوضایَ بیدینه. 24 وقتی بیده کی ایتا مصری مردای، ایتا جه اونِ برارانِ سر ظولم کودن دَره، اُ مظلوم پوشت بیرون بامو و اُ مصری مرداکَ بُکوشت و اُ مظلوم حقَّ فیگیفت. 25 موسی خیال کودی اونِ براران فهمیدی کی خُدا خوائه اونِ دس مرا اوشانَ نیجات بده، ولی اوشان نفهمستید. 26 فردایی، موسی دو نفرَ بیده کی دعوا کودن دیبید، و اَ نیّت اَمرا کی خواستی اوشان میان سلوک تَوَده، بگفت: ”اَی مرداکان، شُمان بَرارید، چره همدیگرَ بَدی کودن دریدی؟“ 27 «ولی اُ مَردای کی خو همساده سر بَدی کودن دُبو، موسیَ ایتا کنار هُل بدَ و بگفت: ” کی تره اَمی حاکم و داور بُکوده؟ 28 خوائی مَرَم بُکوشی هُطوکی دیرو هو مصری مرداکَ بُکوشتی؟“ 29 وقتی موسی اَنَه بیشتاوست، فرار بُکود و مِدیانِ ولایت درون غریب بأسا و هویا دوتا پسرِ صاحب بُبوست. 30 «چهل سال بُگُذشته. ایتا روج ویاوان درون، سینا کوهِ نزدیکی، ایتا فیریشته ایتا ول بیگیفته گومار درون موسی ره ظاهیرَ بوست. 31 وقتی موسی اَنه بیده اُ منظره جا خَیلی ماتا بوست. هُطوکی پیش بُشو تا جه نزدیک بیدینه، خُداوندِ صدا اونِ ره بامو کی: 32 ”من ایسم تی پئران خُدا، ابراهیم، اسحاق و یعقوب خُدا.“ موسی ترس جا بپرکست و جرأت نُکود نیگا بُکونه. 33 «خُداوند اونَ بگفت: ”تی چاروقَ تی پا جا بیرون باور، چون اُ جائی کی اونِ رو ایسایی مُقدّسِ زمین ایسه. 34 حتم بدان کی من می مردومِ مصیبتَ مصر درون بیدِم و اوشانِ آه و ناله یَ بیشتاوستم، و بجیر باموم تا اَشانَ نجات بدم. هسّا بیا تا تره مصر روانهَ کونم.“» 35 «هه موسی ایسه کی اَمی مردوم اونَ رّدَ کودید و ”بگفتید: کی تره اَمی حاکم و داور بُکوده؟“ خُدا اونَ ایتا حاکم و نجات دهنده مانستن روانه کود. بواسطه یِ ایتا فیریشته کی گومار درون اونِ ره ظاهیرَ بوست. 36 هه موسی بو کی چهل سال مصر درون و سُرخِ دریا وَر و ویاوان درون اوشانِ واسی مُعجزه ئان و نیشانه ئان انجام بده و اَمی مردومَ مصر جا بیرون باورد. 37 «هه موسی یعغوبِ نسلَ بگفت: ”خُدا شیمی براران میان، ایتا پیغمبر، مَره مانستن شیمی ره اوسه کونه.“ 38 اَن هو موسی ایسه کی ویاوان درون خلقِ اَمرا ایسأ بو. اون ایتا فیریشته مرا کی سینا کوهِ درون اون مرا گب بزه، هو موسی کی اَمی پئرانِ اَمرا بو؛ موسی کلامیَ کی زیندگی فدِه، فیگیفت تا اونَ اَمرا فاراسانه. 39 «ولی اَمی پئران موسی جا اِطاعَت نُکودید، اونَ کنار بزه ئید و خوشانِ دیل درون مصر واگردستید. 40 اوشان هارونَ بگفتید: ”امرا خُدایان بِساز تا جُلُوتر جه اَمان بیشید، چونکی نانیم اَ موسی سر کی امرا مصر ولایت جا بیرون باورد چی بامو دَره!“ 41 هو روجان درون بو کی ایتا بُت، مانده مانستن بساختید و اونِ ره قربانی پیشکش بُکودید و اونچی کی خوشان دَسانِ مرا بساخته بیدِ واسی، جشن و شادی بُکودید. 42 ولی خُدا خو دیمَ اوشان جا واگردانه و اَشانَ وِلا کود تا آسمانِ آفتاب و ماه و ستاره یَ بپرستید؛ هُطوکی پیغمبران کتاب درون بامو دَره: «”ای یعغوب ایل و تبار، اُ چهل سال میان ویاوان درون، مگه می واسی حیوان سِرابِئید و قربانی باوردید؟ 43 شُمان مُلوکِ بتِ خیمه و رِفانِ ستاره یَ بَرپا بُکودید. اَ بُتانَ کی شُمان پرستش ره بساختید. و من شمرأ اُ طرفِ بابل تبعید خوائم کودن.“ 44 «اَمی پئران شهادتِ خیمه یَ ویاوان درون خوشان اَمرا دَشتید، اُ خیمه کی موسی، خُدا دستور اَمرا عَین اُ نمونه ئی کی بیده بو، بساخت. 45 اَمی پئران وقتی کی یوشَع رهبر بو، کنعانِ ولایتَ اُ مردومانی جا کی خُدا اَمی پئرانِ چومان جُلُو بیرونَ کود، بیگیفتید، و شهادتِ خیمه یَ خوشانِ مرا باوردید و اُ خیمه تا داوود پادشائی موقع اویا بمانست. 46 داوود خُدا نظر درون مورد لوطف قرار بیگیفت و اون، خُدا جا بخواسته کی یعقوبِ خُدا ره ایتا جا ایسانِ ره چاکونه. 47 ولی سلیمان پادشاه بو کی خُدا ره ایتا خانه بساخت. 48 «هرچن کی خُدای متعال، اُ خانه ئان درون کی آدمانِ دس مرا بساخته ببه نئسه، هُطوکی اشعیای پیغمبر بگفته: 49 «”خُداوند گه: ’آسمان، می پادشائی تختِ و زمین، می لنگ جیر کَتلِه! مِرِه چُجور خانه ئی خوائید چاکودن، و یا می استراحتِ جیگا کویا ایسه؟ 50 مگه می دَس نُبو کی اَن همه چیَ بساخته؟ 51 «اَی سرکشِ مردوم، اَی کسانی کی شیمی دیل و شیمی گوش ختنه نُبوسته! شُمان همیشک روح القدس ضِد مُقاومت کونیدی هُطوکی شیمی پئران بُکودید شُمانم کودن دَرید. 52 کویتا جه پیغمبران ایسه کی، شیمی پئران دسِ جا آزار نیده بی؟ اوشان حتی اُ پیغمبرانیَ کی پیشگویی بُکوده بید اُ صالح اَیه، بُکوشتید؛ و هسّا شُمان اُ صالحَ تسلیم بُکودید و اونِ قاتل بُبوسته ئید، 53 شُمان کی اُ شریعتَ، کی بواسطه ی فیریشته ئان شیمی دس فارسه، فیگیفتید ولی اونِ جا اطاعت نُکودید.» استیفان سنگسار بوستن 54 شورا آدمان هَطوکی اَ گبانَ بیشتاوستید، بَرزخَ بوستید، و خوشانِ گازانَ سر به سر بسابانه ئید. 55 ولی استیفان پر جه روح القدّس آسمانَ زول بزه و خُدا جلالَ بیده و عیسیَ کی خُدا راست دس ور ایسأ. 56 استیفان بگفت: «هسّا، آسمانانَ دینَم کی وازا بوسته و انسان پسرَ کی خُدا راستِ دسِ ور ایسأ.» 57 ولی اوشان خوشان گوشانَ بیگیفتید و نَعره بکشئید و همتان استیفانِ سر فُتورکستید، 58 و اوشان اونَ فکش دکشِ اَمرا شار جا بیرون ببردید و سنگسار بُکودید. اوشانی کی گُوائی بدَه بید، خوشانِ رختانَ بکندید و ایتا جوان مرداکِ لنگانِ جُلُو کی سولُس نام دَشتی بنه ئید. 59 وقتی کی استیفانَ سنگسار کودن دیبید، اون داد مرا، بگفت: «اَی عیسیِ خُداوند، می روحَ قُبیل بُکون!» 60 بازون زانو بزه و پیله اوخانِ مرا بُگفت: «خُداوندا، اَ گُناهَ اَشان گردن تَنوَد.» اَنه بگفت و بَمرد. |
@ 2024 Korpu Company