اعمالٚ رسولأن 6 - کتاب مقدس به زبان گیلکی - گویش رشت و غرب گیلان

هفت نفر خیدمت ره انتخاب به

¹ اُ روجان درون کی شاگردانِ تعداد ویشترَ بوستن دوبو، یهودیانِ یونانی زوان جه یهودیانِ عبری زوان گیلِگی کودید چونکی اَشانِ ویوه زناکانَ نیده بو گیفتید و هر روزِ جیره، اَشانَ فانرسه ئی.

² اُ دوازده تا رسول، تمان شاگردانَ دوخوادید و بگفتید: «دُرُست نیه کی اَمان مردوم غذا فَدَنِ واسی، خُدا کلام موعظه کودن جا غافیل بیبیم.

³ پس اَی براران، جه شیمی میان هفت نفر خوشنام کی پُر جه خُدا روح و حکمت ببه سیوا بُکونید تا اوشانَ اَ کار سر بَنیم.

⁴ ولی اَمان، اَمرا دُعا و خُدا کلامِ خیدمت کودن ره وقف کونیم.»

⁵ اُ گبی کی رسولان بگفته بید همتان خوش بامو. اوشان استیفانَ کی ایتا مردای بو پُر جه ایمان و روح القدّس انتخاب بُکودید، و هطوئَم فیلیپُس، پْروخُروس، نیکانُور، تیمون، پارمِناس و نیکُولائوس، کی انطاکیه درون یهودی بُبوسته بویَ، انتخاب بُکودید.

⁶ اَ مرداکانَ رسولان ورجه ببردید، و رسولان دُعا بُکودید، و اَشان سر دس بنه ئید و اَ خیدمت سر بنائید.

⁷ پس خُدا کلام، پخشَ بوستن دوبو و شاگردانِ تعداد اورشلیم درون خَیلی ویشترَ بوسته و خَیلی جه کاهنانَم ایمان باوردید.

استیفانِ گرفتار بوستن

⁸ استيفان، پُر جه فیض و قوت بو و مردومِ میان پیله نیشانه ئان و مُعجزات انجام دئی.

⁹ بازون چن نفر جه ایتا عبادتگا آدمان کی شناس به ’آزاد بُبوسته ئان عبادتگا‘ بو، استیفان اَمرا بحث بُکودید. اوشان جه قیروانِ یهودیان و اسکندریه و کیلیکیه و آسیا بید.

¹⁰ ولی اوشان نتانستید اُ حکمت و خُدا روحِ جُلُو کی استیفان بواسطه ی اون گب زئی، بأسید.

¹¹ پس چن نفرَ خلوتی تیرا کودید تا بیگید: «اَمان بیشتاوستیم کی استیفان، موسیِ پیغمبر و خُدایَ کُفر گفتی.»

¹² اوشان مردوم و ریش سیفیدان و تورات آموجگارانَ، ضد استیفان پُرَ کودید و استیفانِ سر فُووستید و اونَ بیگیفتید و شورا ورجه ببرید.

¹³ اوشان چن تا دوروغ شاهدَم باوردید کی گفتیدی: «اَ آدم یکسره ضدّ اَ مُقدّسِ جیگا و شریعت گب زِئن دَره.

¹⁴ چون اَمان خودمان بیشتاوستیم کی گفتی اَ عیسی ناصری، اَ جیگایَ فگوردانه و رَسم و رسومی کی موسی اَمرا فَده، عوضَ کونه.»

¹⁵ هه موقع، تمان کسانی کی شورا درون ایسابید و استیفانَ زُل بزه بید، بیدِه ئید کی استیفانِ دیم، ایتا فیریشته دیمِ مانستن بُبوسته.