اعمالٚ رسولأن 5 - کتاب مقدس به زبان گیلکی - گویش رشت و غرب گیلانحَنانیا و سَفیره 1 ولی ایتا مردای کی اون نام حَنانیا بو خو زنانه مرا سَفیره، ایتا تیکه زمینَ بُفروخته. 2 حَنانیا ایپچه زمینِ پول جا، کی اونِ زنای خوَر داشتی قایمَ کود و الباقیَ باوَرد و رسولانِ جُلوُ بَنه. 3 ولی پِطرُس اونَ بگفت: «اَی حَنانیا، چره وَئَشتی شیطان تی دیلَ اوجور پُرَ کونه کی روح القدّسَ دوروغ بگی و ایپچه اُ زمین پولِ جا تِرِه بدَری؟ 4 مگه قبل اَنکی بُفروشی، تی شین نُبو؟ مگه بعداَنکی بفُروختی ئم اونِ پول تی ورجه ننَه بو؟ چی باعث بُبوست کی تی دیلِ درون اَ فیکرَ بُکونی؟ تو نه آدَمی یَ، بَلکی خُدایَ دوروغ بگفتی!» 5 هَطوکی حَنانیا اَ گبانَ بیشتاوَست، زمین سر بکَفت و خو آخرتا نفسَ بکشه! و تمان اوشانیَ کی اَ گبانَ بیشتاوستید خَیلی ترس اوساد. 6 بازین جوانان جُلُو باموئید و حَنانیایَ کَفن درون واپختید و بیرون ببَردید و دفنَ کودید. 7 بعد سه ساعت، اونِ زنانه کی اَ ایتفاق جا خبر ناشتی، بامو. 8 پِطرُس اونِ جا واورسه: «مرا بُگو کی اَ زمینَ، هه قیمت بُفروختیدی؟» سَفيره جواب بدَه: «بله، هه قيمت.» 9 پِطرُس اونَ بگفت: «چره همدیگر اَمرا ساخت و پاخت بُکودیدی تا خُداوندِ روحَ امتحان بُکونید؟ اوشانی کی تی مرداکَ دفنَ کودید هه الان درِ ورجه ایسائید و تره ئم بیرون خوائید بَردَن.» 10 درجا، سَفيره ئَم پِطرُس پائان جیر بکفت و جان بدَه. وقتی کی جوانان باموئید، بیده ئید اونَم بمرده. پس سَفیره ئَم بیرون ببردید و اونِ مرداکِ پهلو دفنَ کودید. 11 بازین ایتا پیله ترس تمان کلیسا و تمان اوشانیَ کی اَ چیانَ بیشتاوستید، اوساد. رسولانِ نیشانه ئان و مُعجزه ئان 12 رسولان همیشک نیشانه ئان و مُعجزه ئان زیادی مردوم میان انجام دیئیدی و ایمانداران، همتان یکدیل سلیمان ایوان درون جمَ بوستید. 13 ولی الباقی مردوم هیکّس جرأت نُکودی اَشانِ جمع درون اضافه ببه. هرچن مردوم همتان اَشان احترامَ دَشتید. 14 خَیلی جه زناکان و مرداکان، خُداوندَ ایمان باوردید و اَشانِ جمِ درون اضافه بوستیدی، 15 تا اویا کی حتی ناخوشانَ، شار میدان سر اَوردیدی و اوشانِ، دوشَکان و تختان سر خوسانه ئید تا وقتی پِطرُس جه اویا ردّا بِه، لااقل اونِ سایه بعضی جه اَشانِ سر بکفه و شفا بیگیرید. 16 مردومَم اورشلیمِ دور و اطرافِ شارانِ جا دسته دسته اَموئیدی و ناخوشان و اوشانی کی پلید ارواحِ گرفتار بیدَ، اَوردید و همتان شفا گیفتیدی. رسولان زندانی بُبوستید و بازین آزادَ بوستید 17 ولی پیله کاهن و تمانِ اوشانی کی اونِ اَمرا بید، یعنی صدوقی فرقه عالمان، حسودی جا دس بکار بُبوستید و 18 رسولانَ بیگیفتید، و اُ زندان درون کی همه جور آدم اونِ درون ایسا بو، تَوَدَه ئید. 19 ولی شبِ درون، ایتا جه خُداوند فیریشته زندان دَرانَ وازَ کود و اَشانَ بیرون باوَرد 20 و بگفت: «بیشید و معبد درون بأسید و تمان اَ پیغامیَ کی زیندگی بخشه، مردومِ ره بیگید.» 21 پس صُوب دم، بنا به اونچی کی اَشانَ بگفته بُبوسته بو معبد درون بُشوئید و بنا به مردوم تعلیم دئن بُکودید. وقتی پیله کاهن و اوشانی کی اونِ همراه بید، باموئید، تمان شورا آدمان و تمان یهودِ مردومِ ریش سیفیدانَ دوخوادید و چن نفرَ اوسه کودید تا رسولانَ زندان جا باوَرید. 22 ولی وقتی ماموران باموئید، رسولانَ زندان درون نیافتید. پس اوشان واگردستید، و خبر ببَردید کی: 23 «اَمان زندان دَرانَ بیده ایم کی حیسابی قلف بُبوسته بو و مأمورانی ئم دَران جُلُو پاستن ره ایسابید. ولی هَطوکی دَرانَ وازَ کودیم، هیکّسِ زندان درون نیافتیم.» 24 معبد نگهبانانِ فرمانده و کاهنان سران، اَ خبر ایشتاوستن مرا غاغا بوستید و فیکر درون بُشوئید کی «اَ کار عاقبت چی خوائه بوستن؟» 25 هه میان اینفر بامو و اوشانِ ره خبر باوَرد کی: «بیدینید، اوشانی کی شُمان زندان درون تَوَده بید، هسّا معبد درون ایسائید و مردومَ تعلیم دَئن دَرید.» 26 بازین معبد نگهبانانِ فرمانده، مأموران مرا بُشوئید و رسولانَ باوَردید، ولی نه زورکی، چونکی ترسه ئید مردوم اَشانَ سنگسار بُکونید. 27 وقتی کی رسولانَ باوَردید، اَشانَ شورا ورجه بپا بدَشتید. هوموقع پیله کاهن اَشانِ جا واورسه و بگفت: 28 «اَمان شمرأ سخت قدغن بُکوده بیم کی دِه اَ نام اَمرا تعلیم نَدید، با اَ حال شُمان اورشلیم شارَ شیمی تعلیم جا پُرَ کودید و خوائیدی اَ مرداکِ خونَ اَمی گردن تَوَدید.» 29 ولی پِطرُس و بقیه رسولان جواب بدَه ئید: «اَمان بایستی خُدا جا اطاعت بُکونیم نه آدمانِ جا. 30 اَمی پئرانِ خُدا، عیسیَ مُرده ئان جا زنده بُکود، هو عیسی کی شُمان اونَ دار بزه ئید، و بُکوشتید، 31 و خُدا اونَ خو راس دس ور بُجور بَبرده، رهبر و نیجات دئنده بُکوده و فرصت بدَه تا یهود مردوم توبه بُکونید و اوشانِ گُنائان ببَخشه ببه. 32 و اَمان اَ چیانِ شاهِدیم، هُطوکی روح القدّسَم شاهدِه، هو روحی کی خُدا اوشانیَ کی اونِ جا اطاعت کونیدی، ببخشه.» 33 وقتی شورا آدمان اَ گبانَ بیشتاوستید اَنقد برزخَ بوستید کی خواستید اوشانَ بُکوشید. 34 ولی اینفر جه فریسی فرقه عالمان، گامالائیل نام، کی شریعت آموجگار بو و همه اونَ احترام نَئیدی، مجلس میان بپا بأسا و دستور بدَه رسولانَ ایپچه بیرون ببرید. 35 بازون اوشانی کی اویا ایسابیدَ بگفت: «اَی یهودیان، مواظب بیبید کی اَ مرداکان اَمرا چی خوائیدی بُکونید. 36 چونکی، چن وقت پیش، ایتا مردای تئوداس نام ویریشت کی خوره ادعا کودی کسی ایسه و حدود چارصد نفرَ خو دور جمَ کوده بو. ولی اونَ بُکوشتید و تمانِ اونِ دُمباله روئان پخشَ بوستید. 37 بعدِ اون، یهودای جلیلی، سرشماری موقع شورش بُکود و دسته ئیَ خو دُمبال فاکشه. ولی اونم از بین بُشو و اونِ دُمباله روئان پخشَ بوستید. 38 پس هه جریان واسی ئَم شمرأ گَم کی اَ آدمانِ جا دس بِکشید و اوشانَ به خوشانِ حال بَنید. چونکی اَگه اَشان قصد و نیَّت آدمی جا ببه، به جائی فأنرسه. 39 ولی اَگه خُدا جا ببه، نتانید اوشان جُلُوی بیگیرید، حتی امکان دَره کی اُ موقع خُدا مرا جنگ بُکوده بید!» 40 پس اوشان گامالائیلِ نصیحتَ گوش بُکودید و رسولانَ دوخوادید و شلاق بزه ئید و قدغن بُکودید که دِه عیسی نام اَمرا گبی نزنید، بازین وَئَشتید تا رسولان بیشید. 41 پس رسولان جه شورا آدمانِ ورجه ذوق مرا، بیرون بُشوئید، چون لایق بحساب باموئید کی عیسی نامِ خاطری بی حُرمتی بیدینید. 42 و اوشان هر روج، چی معبد درون و چی خانه ئان درون، تعلیمِ دئن جا و خُب خبر فدَنِ جا، کی عیسی هو مسیح موعود ایسه دس اونسادید. |
@ 2024 Korpu Company