اعمالٚ رسولأن 4 - کتاب مقدس به زبان گیلکی - گویش رشت و غرب گیلانپِطرُس و یوحنا یهود شورا ورجه 1 پِطرُس و يوحنا هنو مردوم اَمرا گب زئن دبید كی کاهنان و معبد نگهبانان فرمانده و صدّوقی فرقه عالمان فارسه ئید. 2 اوشان جه اَنکی رسولان، مردومَ تعلیم دیئیدی و اَنه واسی کی اعلام کودیدی عیسی درون مُرده ئان جا زنده بوستَن دَره، خَیلی بَرزَخ بید. 3 پس اَشانَ بیگیفتید و چونکی غروب دم بو تا فردایی اوشانَ خولتانک درون بدَشتید. 4 ولی خَیلی جه اوشان کی اُ کلام بیشتاوسته بید، ایمان باوردید، و مرداکان تعداد دوروَر پنج هزار نفر بُبوسته بو. 5 فردایی، مردوم پیله تران و ریش سفیدان و تورات آموجگاران اورشلیم شار درون جمَ بوستید. 6 اَ مجلس درون، حنّا پیله کاهن، و قیافا، و یوحنا، و اسکندر و تمان پیله کاهن خانواده ئم ایسابید. 7 اوشان پِطرُس و یوحنایَ، اُ وسط بپا بدَشتید و واورسه ئید: «شُمان به چی قدرت و نامی اَ کارَ بُکودید؟» 8 بازین پِطرُس روح القدّسِ جا پُرَ بوست و اوشانَ بگفت: «اَی مردوم پیله تران و ریش سیفیدان، 9 اَگه ایمرو اَ خُب کار واسی کی اُ شَل مرداک ره بُکودیم، اَمی جا بازخواست کودن دَرید و واورسید کی اون چُطو شفا بیگیفته، 10 پس شُمان همتان و تمان یهودِ مردوم بدانید کی عیسی مسیح ناصری نام اَمرا یِ کی اَ مردای شیمی جُلُو ساق و سالِم بپا ایسأ، به نام اُ کسی کی شُمان اونَ مصلوب بُکودید ولی خُدا اونَ مُرده ئان جا زنده بُکود. 11 اَ عیسی اُ سنگی ایسه کی شُمان بنّایان اونَ ردَّ کودید و هسّا بنا مهمترین سنگ بُبوسته. 12 جغیر اون هیکّس درون نیجات نَنه، چونکی هی نامی دِه آسمان جیر آدمیانَ فدَه نُبوسته تا اونِ اَمرا نیجات بیگیریم.» 13 وقتی کی اوشان پِطرُس و یوحنا جرأتَ بیده ئید و بفهمستید کی بیسوادید و معمولی آدمان ایسید، ماتا بوستید و بفهمستید کی اوشان عیسی اَمرا بید. 14 ولی چون اُ شَل مردای کی شفا بیگیفته بو پِطرُس و یوحنا پهلو ایسأ بو، هیچی نتانستیدی اوشانِ ضِّد بیگید. 15 ولی دستور بده ئید کی اوشان مجلس جا بیرون بشید و خودشان همدیگر مرا صلامشورت بُکودید. 16 اوشان همدیگرَ گفتیدی: «اَ دونفر اَمرا چی بُکونیم؟ چونکی تمان اورشلیم مردوم دانیدی کی ایتا مُعجزه اَشان دس مرا انجام بُبوسته و اَمان نتانیم اَنه حشا بُکونیم. 17 ولی اَنه واسی کی اَ ایتفاق ویشتر جه اَن، مردوم میان چُو دنکفه، بائید اَشانَ ایخطار بدیم کی دِه عیسی نام باره هیکّس مرا گب نَزنید.» 18 بازین اوشان ایوارده پِطرُس و یوحنایَ دوخوادید و اوشانَ قدغن بُکودید که هرگس عیسی نام امرا گب نزنید و تعلیم ندید. 19 ولی پِطرُس و یوحنا اوشانَ جواب بدَه ئید: «شُمان خودتان داوری بُکونید، کویتا خُدا دیدِ درون دُرُسته، شیمی جا فرمان بردَن یا خُدا جا فرمان بردَن؟ 20 چونکی اَمان نتانیم اونچی کی بیده ئیم و بیشتاوسته ئیم، واگویا نُکونیم.» 21 شورا آدمان بعد اَنکی یوحنا و پِطرُس ره ویشتر پاتَرس بنه ئید اوشانَ وِلا کودید، چونکی هی رائی اوشانِ مجازات کودن ره نیافتید. چره کی مردوم اونچی واسی کی ایتفاق دکفته بو، همتان خُدایَ ستایش کودید. 22 چون اُ شل مردای کی مُعجزه اَمرا شفا بیگیفته بو چهل سال، ویشتر دَشتی. ایمانداران پِطرُس و یوحنا ره دُعا کونیدی 23 پِطرُس و یوحنا بعد اَنکی آزادَ بُوستید خوشان رفقان ورجه وگردستید و اونچی کی کاهنان سران و ریش سیفیدان اوشانَ بگفته بید، تعریف بُکودید. 24 ایمانداران هَطوکی اَنه بیشتاوستید، ایصدایی خُدا حضور میان دُعا بُکودید و بگفتید: «اَی خُداوند کی همه چی سر حاکمی، اَی خُدایی کی آسمان و زمین و دریا و هرچیَ کی اوشانِ دُرونِ خلق بُکودی، 25 تو خودت بواسطه ی روح القدّس، اَمی پئرِ زوان جا داوود پادشاه، کی تی خادمَ، بگفتی: «”چی واسی مِلتّان شورش کونیدی و مردومان هچین توطئه کونیدی؟ 26 زمینِ پادشائان همدس بیدی و حاکمان جمَ بیدی، خُداوند ضدّ و اونِ مسیحِ ضدّ.“ 27 راس راسی کی هه شار درون، هیرودیس حاکم و پُنتیوس پیلاتُس، غیر یهودیان و یهودیانِ اَمرا، ضِّد تی مُقدّسِ خادم عیسی کی تو اونَ مسح بُکودی همدس بُبوستید، 28 تا اونچی کی تی دس و تی خواسته پیشتر تعیین بُکوده بو، انجام بدید. 29 هسّا، اَی خُداوند، اَشانِ تهدیدانَ فندر و تی خیدمتکارانَ لوطف بُکون تا تمانِ جرأت اَمرا تی کلامَ بیگید، 30 و تی دستَم شفا دئن ره درازَ کون و تی مُقدّس خادم عیسی نام اَمرا، نیشانه ئان و مُعجزه ئان انجام بدَن.» 31 بعدِ اوشانِ دُعا کودن، اُ جیگایی کی اونِ درون جَم بوسته بید، بَلرزسته و همتان روح القدّس جا پُرَ بوستید و خُدا کلامَ جرأت اَمرا گفتیدی. ایمانداران خوشان مال و منال درون شریک بید 32 تمان ایمانداران یکدیل و یکجان بید و هیکّس هیچی جه خو مال منالَ فقط خودشه ره نانستی، بلکی همه چی درون همدیگر اَمرا شریک بید. 33 رسولان پیله قوّت اَمرا عیسیِ خُداوند زنده بوستن ره گُوائی دَئیدی و خُدا پیله فیض همتانِ سر قرار بیگیفته بو. 34 اوشان میان هیکّس مُحتاج نُبو، چونکی هرکس زمین یا خانه ای دَشتی، فُروختی و اونِ پولَ 35 رسولانِ ورجه نَئی تا هرکسِ احتیاج اَندر همتانِ میان سام ببه. 36 یوسفَم کی لاوی قبیله جا و قبرس شین بو و رسولان اونَ برنابا یعنی ’تشویقِ پسر‘ لقب بدَه بید، 37 زمینیَ کی دَشتی، بُفروخت و اونِ پولَ باورده و رسولان جُلُو بَنه. |
@ 2024 Korpu Company