اعمالٚ رسولأن 3 - کتاب مقدس به زبان گیلکی - گویش رشت و غرب گیلانایتا ایفلیجِ مادرزاد شفا 1 ایتا روج ساعت سه بعدظهر کی دُعا وقت بو، پِطرُس و یوحنا معبد سمت شئون دیبید. 2 هو موقع، چن نفر، ایتا مرداکَ کی مادرزادی ایفلیج بو، اَوردن دبید. اوشان اونَ هر روج معبد دروازه کنار کی ’قشنگ دروازه‘ نام دَشتی نئیدی تا مردوم جا کی معبد بدُرون شئون دیرید، صدقه فیگیره. 3 وقتی اَ ایفلیج مردای پِطرُس و یوحنایَ بیده کی خوائید معبد بدُرون بیشید، اوشانِ جا بخواسته اونَ صدقه فدید. 4 پِطرُس و يوحنا اُ ایفلیج مرداکَ چوم بُدوختید؛ پِطرُس اُ مرداکَ بگفت: «امَره فندر!» 5 اُ ایفلیج مردای اَشانَ فندرست و رافا بو کی ایچی اونَ فدید. 6 ولی پِطرُس اونَ بگفت: «من نه زر دَرم، نه نقره ولی جه اونچی کی دَرم تره فدم! بنام عیسی مسیح ناصری ویریز و راه بوشو!» 7 بازین پِطرُس اُ ایفلیج مرداکِ راست دسَ بیگیفت و اونَ ویریزانه. هو دم اونِ لنگ و اونِ زانوئان قوّت بیگیفت 8 و خو جا سر ویریشت و خو پا سر بأسأ و راه دکفت. بازین هُطوکی واز وَلنگ کودی خُدای شُکر کونان، اَشان مرا معبد بدُرون بُشو. 9 تمان مردوم اونَ هُطوکی راه شئون دوبو و خُدایَ شُکر کودی، بیده ئید 10 و بفهمستید اَن، هو ایفلیج مرداکِ کی پیشتر صدقه فیگیفتن ره ’قشنگ دروازه‘ معبد کنار نیشتی؛ و جه اونچی کی اونِ سر بامو بو، مات و حَیران بُبوسته بید. پِطرُس گبان سلیمان ایوان درون 11 هو موقع کی اُ مردای پِطرُس و یوحنا مرا شئون دوبو و اَشانِ جا سیوا نُبوستی، تمان خلق کی مات بزه ’سلیمان ایوان‘ سر ایسأبید اوشان سمت بُدوبستید. 12 وقتی پِطرُس اَنه بیده، رو به اُ خلق بُکود و بگفت: «ای یهودِ مرداکان، چره اَ کار واسی اَنقد ماتَ بوستید؟ چره اَمرا زُل بزه ئید، انگار کی اَمان، اَمی قوت و دینداری مرا کاری بُکودیم کی اَ مردای راه بُشو؟ 13 ابراهیم خُدا و اسحاق خُدا و یعقوب خُدا، اَمی پئرانِ خُدا، خو خیدمتگزار عیسیَ جلال بدَه، هون کی شُمان اونَ تسلیم بُکودید و فرماندار پیلاتُس جُلُو اونَ حَشا بُکودید، هرچن کی پیلاتُسِ تصمیم اَن بو کی اونَ آزادَ کونه. 14 ولی شُمان اُ قدّوس و صالحَ حَشا بُکودید و بخواستیدی ایتا قاتل بجای اون شمرأ آزادَ به. 15 شُمان اونیَ کی زیندگی سرچشمه بو، بُکوشتید ولی خُدا اونَ جه مُرده ئانِ میان زنده بُکود و اَمان اَ چیانِ شاهِدان ایسم، 16 و عیسی نام و ایمان به اونِ نام اَمرا ایسه کی اَ مردای قوت بیگیفته، اَ مردای کی اونَ دینیدی و ایشناسیدی. ایمانی کی بواسطه ی اونِ نام، اَ مرداکَ شیمی همتان جُلُو کامِلا شفا بدَه. 17 «و هسّا ای براران، دانم کی شُمان و شیمی مردوم پیله ترانِ کار، نادانی جا بو. 18 ولی خُدا اَ کار مرا اونچی کی تمانِ پیغمبرانِ زوان مرا پیشگویی بُکوده بو به انجام فاراسانه کی: اونِ مسیح عذاب خوائه کشئن. 19 پس توبه بُکونید و خُدا سمت واگردید تا شیمی گُنائان پاکَ به، 20 تا اُ زمات فارسه کی خُداوند حضورِ جا شمرأ تازگی بایه و تا خُدا، مسیحِ موعودَ کی پیشتر شمرأ انتخاب بُبوسته بو، اوسه کونه، یعنی هو عيسیَ. 21 کی آسمان بایستی اونَ قُبیل بُکوده بی تا اُ روجانی کی همه چی بنا به اونچی کی خُدا جه قدیم، تمان خو مُقدّسِ پیغمبران زوان مرا بگفته، به انجام فارسه. 22 موسی پیغمبر بگفته: ” خُداوندْ خُدا، جه شیمی براران میان، ایتا پیغمبر می مانستن، شمرأ روانه کونه؛ و اونچیَ کی شمرأ گه، بایستی گوش بُکونید. 23 هرکس کی اُ پیغمبر گبَ گوش فانده، جه مردوم میان هلاکَ به.“ 24 «تمان پیغمبرانم کی بعد سموئیل باموئید، همتان ایصدا اَ روجان باره پیشگویی بُکودید. 25 و شُمان پیغمبرانِ زاکانید و وارث اُ عهدی ایسید کی خُدا شیمی پئران مرا دَوَست. اُ زمات کی ابراهیمَ بگفت: ”بواسطه ی تی نسل، تمانِ مردومان کی زمین سر ایسائید برکت خوائید گیفتن“. 26 اُ زمات کی خُدا خو خیدمتگزار عیسیَ انتخاب بُکود، اول اونَ شیمی ورجه اوسه کود تا شُمان همتانَ برکت بده، و اَ کار مرا شمرأ شیمی شُرورِ رائان جا واگردانه.» |
@ 2024 Korpu Company