اعمالٚ رسولأن 24 - کتاب مقدس به زبان گیلکی - گویش رشت و غرب گیلانپولُس محاکه فِلیکْس ورجه 1 پنج روج بازین، حَنانیا پیله کاهن، چن تا جه ریش سیفیدان و ایتا وکیل تِرتولُس نام اَمرا، قیصریه شار باموئید. اوشان خوشان شکایتَ ضدّ پولُس، فرماندار وَرجا ببَردید. 2 وقتی کی فرماندار پولُسَ احضار بُکود، تِرتولُس، پولُسَ فِلیکْس ورجه اَطو متهم بُکود، و بگفت: «عالیجناب فِلیکْس، خَیلی وقته کی اَمان شیمی سایه جیر صُلح و آرامش دَریمی و شیمی بصیرت باعث ببُوسته کی اَ مردومِ وضع خُب تر ببه، 3 اَمی وظیفه دانیم کی هر جا و هر زمات، شیمی قدردان بیبیم. 4 ولی اَنه واسی کی شیمی وقتَ ویشتر نیگیریم خواهش کونیم کی اَمرا لوطف بُکونید، و ایپچه اَمی گبانَ بیشتاوید. 5 «اَمرا ثابت بُبوسته کی اَ مردای، آدمیه کی فِتنِه تَوَدِه و تمان دُنیا یهودیانِ میان آشوب بپا کونه. اَ آدم ناصری فرقه سردسته ئَم ایسه. 6 اون، حتی تقلّا بُکود کی معبدَ بی حُرمت بُکونه؛ ولی اَمان اونَ گرفتارَ کودیم و بخواستیم کی عَین اَمی شریعت، اونَ محاکمه بُکونیم. 7 ولی فرمانده لیسیاس بامو و اونَ به زور اَمی دَسِ جا بیرون باورد، 8 و اونِ شاکیانَ دستور بدَه تا شیمی ورجه بائید. هسّا، اَگه شُمان خودتان اونِ جا بازجوئی بُکونید، هر اونچی باره کی اونَ متهم کونیم، اونِ حئیقت شمرأ آشکار خوائه بوستن.» 9 یهودیانم ایصدائی تمان اَ چیانَ تأیید بُکودید. 10 وقتی فرماندار، پولُسَ ایشاره بُکود کی گب بزنه پولُس اَطو جواب بدَه: « دانم کی سالیان ساله اَ مردومَ داوری کودن دَریدی؛ پس من ذوق اَمرا می جا دفاع کونم. 11 شُمان خودتان تانیدی وررسی بُکونید و بفهمید جه اُ زمات کی مَن پرستش ره اورشلیم بُشوم تا هسّا، دوازده روج ویشتر نُبوسته، 12 و اَ زمات درون، هیکّس مرا نیده کی اینفر مرا بُگو مگو بُکونم و یا جماعت میان آشوب تَوَدَم، چی معبد میان چی یهود عبادتگائان درون و چی شار میان. 13 اوشان نَتانیدی ایفترائانی کی الان مرا زِئن دریدی ثابت بُکونید. 14 ولی اَنَه شیمی ورجه اعتراف کونم کی من اَمی پئرانِ خُدایَ عین اُ طریقت کی اوشان اونَ ایتا فرقه دانیدی، پرستش کونم و هر اونچیَ کی تورات و پیغمبرانِ کتابان درون بینیویشته بُبوسته، اعتقاد دَرم. 15 و مَنم اَ مرداکان مانستن خُدایَ امید دَرم و اعتقاد دَرم اُ روجی کی مُرده ئان زنده بیدی، خُبِ آدمان و بدِ آدمان ره ئم نئه. دُرُست اَ آدمان مانستن کی قبول دَریدی. 16 هن واسی، همیشک تَقلّا کونم تا خُدا و مردومِ ورجه، پاکِ وجدان اَمرا زیندگی بُکونم. 17 «هسّا، مَن بعد سالیان سال، اورشلیم شار سو بُشوم تا می مردوم ره صدقه ئانی فدم و پیشکشانی ببرم. 18 هَطوکی اَ کارَ کودن دُبوم، مرا اُ زماتی کی معبد درون یهودیانِ رسم پاکیَ بجا باورده بوم، پیدا بُکودید. نه مردومی ایسابید و نه وَلوا بو. 19 ولی اویا چن تا یهودی، آسیا ولایت جا ایسابید کی اوشانم بایسی اَیا شیمی ورجه بأسابید تا اَگه می ضدّ شکایتی دَریدی، بیگید. 20 یا وَئل اَشانی کی اَیا ایسائید، بیگید وقتی شورا ورجه ایسا بوم، می جا چی جُرمی بیافتید، 21 جغیر اَنکی اوشان میان بُلند صدا مرا بگفتم: ” مُرده ئان زنده بوستن واسیه کی ایمرو شیمی جُلُو محاکمه بوستن درم.“» 22 ولی، فِلیکْس کی طریقتَ خُب ایشناختی، اُ محاکمه یَ ایتا وقت دیگه بنه و بگفت: «وقتی کی فرمانده لیسیاس بایه، اُ موقع شیمی شکایت ره تصمیم گیرم.» 23 بازون اُ اَفسریَ کی مسئول بو، دستور بدَه تا پولُسَ بپّایه ولی ایپچه آزادیم فَدَه کی هیّتا جه اون رِفِق ئان جُلوُیَ نیگیره کی اونِ احتیاجاتَ برطرف بُکونید. 24 چن روج بازون، فِلیکْس خو زنانه دْروسیلا مرا کی یهودی بو، بامو و پولُس دُمبال، سرا دَه. اون، پولُسِ گبانَ کی عیسی مسیح ایمانِ باره بو، گوش بُکود. 25 وقتی کی پولُس، صالح بودن و پرهیزکاری و آیندهِ داوری جا گب بزه فِلیکْس هراسانَ بوست و بگفت: «هسّا دِه تانی بیشی. ایتا وقت دیگر بازم تره دوخوانم.» 26 با اَ حال امید دَشتی پولُس اونَ رشوه فَدِه. جه اَرو، چندین و چن وار اونَ احضار کودی و اونِ مرا گب زئی. 27 دو سال کی بُگُذشته، پورکیوس فِستوس، فِلیکْسِ جانشین بُبوست. ولی فِلیکْس، اَنه واسی کی یهودیان سر مِنت بنه، پولُسَ هُطو خولتانک درون بدَشت. |
@ 2024 Korpu Company