اعمالٚ رسولأن 20 - کتاب مقدس به زبان گیلکی - گویش رشت و غرب گیلانپولُس مقدونیه و یونان سفر کونه 1 وقتی وَلوا تمانَ بوست پولُس، شاگردانَ خو ورجه دوخواد و بعد اَنکی اوشانَ تشویق بُکود، اَشانِ مرا خُداحافظی بُکود و مقدونیه منطقه سمت رادکفت. 2 پولُس جه اُ منطقه دَوارست و ایماندارانَ خو گبان مرا خَیلی دیلگرمی فدئی، تا اَنکی یونان فارسه. 3 پولُس سه ماه اویا بأسا. اُ موقع کی خواستی کشتی مرا سوریه بشه یهودیان اونِ ضدّ کوکلا دیچه ئید. پس تصمیم بیگیفت کی مقدونیه راهِ جا واگرده. 4 پولُس همرائان اَشان بید: سوپاتِروس، پیرروسِ پسر کی بیریه شین بو، آریستارخوس و سِکونُدوس کی تِسالونیکی شین بید، گایوس و تیموتائوس کی دِربه شین بید، تیخیکوس و تْروفیموس کی آسیا شین بید. 5 اوشان پیشتر جه اَمان بُشوئید و تْروآس شار درون اَمی رافا ایسأبید. 6 ولی اَمان بعدِ عید فَطیر، کشتی اَمرا فیلیپی شارِ جا راهی بُبوستیم و پنج روج بازون، تْروآس درون اوشان ورجه بُشوئیم و هفت روج اویا بأسائیم. یوتیخوسِ زنده بوستن 7 هفته اولتّا روج درون، نان پلکِ کودن ره جَما بُوستیم. پولُس مردومِ ره گب زئی، و چونکی خواستی فردائی جه اویا بشه، اونِ گب زئن تا نصفِ شب درازه بدَه بُبوست. 8 اُ تلارخانه درون کی جَما بوسته بیم، خَیلی گرسوز چراغ روشن بو. 9 ایتا جوان یوتیخوس نام درجیک لَبه نیشته بو، هو موقع کی پولُس هُطو خو گَبانَ دُمباله دَئن دوبو، اُ جوان یواش یواش ایتا سنگینِ خواب درون بُشو و ناخبر سُیُم طبقه جا بجیر بکفت و وقتی اونَ بیگیفتید، بیده ئید بَمرده. 10 پولُس بجیر بُشو و خورَه اُ جوان مرداک سر تَوَدَه و اونَ کشه گیفت و بگفت: «نترسید، اون هنو نمرده!» 11 بازین پولُس بُجور بُشو و نانَ پلکَ کود و بُخورد. اون تا صُب دَم اَشان مرا گب بزه و بازون جه اویا بُشو. 12 مردوم اُ جوانَ زنده بخانه ببَردید و خَیلی تسلی بیگیفتید. 13 ولی اَمان اَمی سفر درون پیش جه پولُس، ایتا کشتیَ سوارَ بوستیم و آسوسِ شار سمت راه دکفتیم تا اویا عین اُ قراری کی پولُس مرا دَشتیم اونَ کشتی درون باوریم، چون پولُس بخواسته کی تا اویا خشکی راهِ جا بشه. 14 وقتی پولُسَ آسوسِ شار درون بیده ئیم، اونَ کشتی درون باوردیم و میتیلینی شار سو بُشوئیم. 15 جه اویا کشتی اَمرا رادَکفتیم و فردایی خیوسِ جزیره جُلُو فارسه ئیم. پس فردا ساموس جزیره بُشوئیم و پسین فردا، میلیتوس شارَ فارسه ئیم. 16 پولُس تصمیم دَشتی دریا راه جا اِفِسُسِ وَر ردّا به، تا خو وقتَ آسیا درون لا نُکونه، چون عجله دَشتی کی اَگه ببه، پنتیکاست روج درون اورشلیم میان بأسا. پولُس اِفِسُس ریش سفیدان اَمرا خدافظی کونه 17 پولُس، میلیتوس جا ایتا پیغام اِفِسُسِ ره اوسِه کود و کلیسا ریش سیفیدانَ خو ورجه دوخواد. 18 وقتی اوشان باموئید، پولُس اَشانَ بگفت: «شُمان خودتانَم، دانید کی هو اولتّا روج کی می پایَ آسیا ولایت درون بَنَم، چُطو تمان می وقته شمرأ بَنَنم. 19 چُطو آرسو فُکودیم وتمانِ فروتنی اَمرا خُداوندَ خیدمت کودیم، و اُ سختی ئانَ کی یهودیانِ کُوکلا واسی می سر بامو تاب باوَردَم. 20 هُطو دانیدی، اونچیَ کی مُمکن بو شمرأ فایده بدَره، شیمی جا مَضاقا نُکودم، بلکی پیغامَ شمرأ اعلام بُکودم، چی جَم درون، چی خانه بِخانه شمرأ تعلیم بدَم. 21 هم یهودیان و هم یونانیانَ، شهادت بدَم کی بایسی توبه بُکونید و خُدا سو واگردید و اَمی خُداوند عیسی مسیحَ ایمان باورید. 22 «الان، خُدا روحِ هدایت مرا اورشلیم شَم و نانَم اویا چی می سر خوائه آمون؛ 23 جغیر اَنکی هر شار درون روح القدّس، مَره واخُبَ کونه کی زندان و سختی می رافا ایسأ. 24 ولی من، هم می جان و هم می زیندگیَ بی ارزش دانم. فقط اَگه بتانم می دُوره یَ تمانَ کونم و اُ خیدمتیهَ کی عیسیِ خُداوند جا فیگیفتم، تا آخر انجام بدم و خُدا فیضِ خُب خبر ره شهادت بدم. 25 «هسّا دانم هیتّا جه شُمان کی من شیمی میان بگردستم و خُدا پادشائیَ اعلام بُکودم، دِه مرا نخوائه دِئِن. 26 پس ایمرو شمرأ شهادت دئَم کی شیمی هیکّس خون می گردن نیه، 27 چونکی من در حق کسی کوتائی نُکودم بلکی خُدا پیغامَ همه ذرّه، شمرأ اعلام بُکودم. 28 مواظب خودتان بیبید. مواظب تمان گله ئی بیبید، کی روح القدّس شمرأ انتخاب بُکوده کی اوشانَ بپائید. خُدا کلیسایَ کی اونَ خو خون اَمرا بیهه، شبانی بُکونید. 29 دانَم بعد اَنکی من بشم، واشی گورگان شیمی میان خوائید اَمون و گلّه یَ رحم نخوائید کودن. 30 حتی جه شیمی میان کسانی ویریزید و حئیقتَ واگردانیدی تا شاگردانَ خوشان دُمبال فاکشید و جه راه بِدرَ کونید. 31 پس واخُب بأسید و به یاد باورید کی من سه سال تمان، شبنده روج، آرسوئان اَمرا یه لحظه هم شیمی هُشدار دَئن جا دَس نَکشِم. 32 «هسّا شمرأ، خُدا و اونِ فیض بخشِ کلامِ دَس واسپارم، کی تانه شمرأ بنا بُکونه و تمان اوشان میان کی تقدیس بُبوسته ئید، ارث فدِه. 33 می چوم هیکّس زر و نقره و یا رخت درون دُنبو. 34 شُمان خودتان دانیدی کی من می دَسان مرا، هر چی کی خودم و اوشانی کی می اَمرا بید و احتیاج دَشتید، فراهم بُکودم. 35 من همه جوره شمرأ نیشان بدَم کی بایسی اَطو سخت کار بُکونیم تا بتانیم ضعیفانِ دَسَ بیگیریم، و عیسیِ خُداوندِ گبانَ به یاد باوریم کی چُطو خودش بگفته: ”فَدَن، فیگیفتن جا بختره.“» 36 پولُس وقتی خو گب تمان کود، زانو بزه و تمان اوشان اَمرا دُعا بُکود. 37 همتان خَیلی گریه بُکودید و اون کشه گیفتید و ماچی دَئیدی. 38 اونچی کی ویشتر جه همه اوشانَ ناراحتَ کوده، پولُس اُ گب بو کی بگفت: «دِه مرا نخوائید دِئِن.» بازون تا کشتی ور اونَ راهی بُکودید. |
@ 2024 Korpu Company