اعمالٚ رسولأن 15 - کتاب مقدس به زبان گیلکی - گویش رشت و غرب گیلاناورشلیم شورا 1 ولی چن نفر یهودیه ولایت جا اَنطاکیه شار باموئید. اوشان برارانَ آموختیدی کی: «اَگه عَین موسی پیغمبر سُنّت ختنه نیبید، نتانیدی نیجات بیگیرید.» 2 بازین پولُس و بَرنابا خَیلی اوشان مرا مخالفت و بحث بُکودید، قرار بُبوست کی اُ دوتا چن تا جه ایمانداران اَمرا اورشلیم شار بیشید و اَ مسئله یَ رسولان و ریش سیفیدان اَمرا در میان بنید. 3 پس کلیسا اَشانَ راهی بُکود؛ وقتی کی اوشان فینیقیه و سامِرِه جا ردّا بوستن دیبید، اَنه باره کی چُطو غیر یهودیان ایمان باوردیدی گب بزه ئید و تمان برارانَ اَ خبر اَمرا خَیلی خوشحالَ کودید. 4 وقتی اوشان اورشلیم فارسه ئید، کلیسا و رسولان و ریش سیفیدان اَشان پیشواز باموئید. پولُس و برنابا هر اونچی کی خُدا بواسطه اوشان انجام بدَه بو، اَشان ره تعریف بُکودید. 5 ولی بعضی جه فَریسی فرقه عالمان کی ایمان باورده بید، ویریشتیدی و بگفتید: «واجبه کی غیر یهودیان ختنه بیبید و اَشانَ دستور بَدید کی موسی شریعتَ بدَرید.» 6 پس رسولان و ریش سیفیدان جمَ بوستید تا اَ مسئله ی وَرَسی بُکونید. 7 بعداَنکی خَیلی بحث بُکودید، آخربسر پِطرُس ویریشت و اَشانَ بگفت: «اَی براران، شُمان دانیدی کی اولّتا روجان درون، خُدا مَره جه شیمی میان انتخاب بُکود تا غیر یهودیان می زوان اَمرا انجیل پیغامَ بیشتاوید و ایمان باورید. 8 و خُدایی کی دیلِ جا خبر دَره، اَشان ره گُوائی بدَه و روح القدّسَ اَشان فَدَه، هُطوکی اَمرا فَدَه بو. 9 خُدا اَمی میان و اوشان میان هی فرقی ننَه، بَلکی ایمان واسی، اَشان دیلانَ پاکَ کود. 10 پس هسّا چره خُدایَ امتحان کودَن دَرید و ایتا پیشکابول شاگردان گردن نئن دریدی کی نه اَمان تانستیم اونَ فاکشیم، نه اَمی پئران؟ 11 ولی اَمان ایمان دَریم کی عیسیِ خُداوندِ فیض اَمرا ایسه کی اَمان نیجات بیگیفتیم، هُطوکی اوشانَم بیگیفتید.» 12 بازون تمان اوشانی کی اویا جمَ بوسته بید همتان تام بزه ئید و بَرنابا و پولُسِ گبَ گوش بدَه ئید. اوشان نیشانه ئان و مُعجزه ئانیَ کی خُدا بواسطه اَشان غیر یهودیانِ میان انجام بدَه بو، تعریف بُکودیدی. 13 وقتی کی اَشانِ گَبان تمانَ بوسته، یعقوب بگفت: «اَی براران، می گبَ گوش بُکونید! 14 شَمعونِ پِطرُس بگفت کی چُطو خُدا اولین مرتبه غیر یهودیانَ لوطف بُکوده و جِه اوشان میان مردومی خو نام ره انتخاب بُکوده. 15 اَن دُرُست هونیه کی عاموسِ پیغمبرِ کتابِ درون بینوشته بُبوسته: 16 «”بازین پس، واگردم و داوود خیمه یَ کی بکفته، ایوارده چاکونم؛ اونِ ویرانیَ ایوارده آبادَ کونم، و اونَ خو اولین شکل مانستن چاکونم، 17 تا اوشانی کی آدمانِ نسل جا باقی بمانستید، و تمان غیریهودیان کی می نامَ خوشانِ سر دَریدی، خُداوند دُمبال بگردید. خُداوند گه، خُداوندی کی: 18 اَ چیانَ جِه قدیم معلوم بُکوده.“ 19 «پس می حکم اَنه، اوشانَ کی غیر یهودیانِ جا خُدا سو واگردیدی، زحمت ندیم. 20 ولی بایستی ایتا نامه درون اَشان جا بخوائیم قربانی غذا بُتان ره، زنا، خفه بُبوسته حیوانات گوشت جا و خون جا، دوری بُکونید. 21 چون موسی جه قدیم هر شار درون کَسانیَ دَشتی کی اونِ ره موعظه بُکونید، هُطوکی هر مُقدّسِ شنبه درون اونِ بینیویشته ئانَ یهود عبادتگا درون خواندید.» شورا نامه غیریهودی ایمانداران ره 22 پس رسولان و ریش سیفیدان تمان کلیسا اَمرا تصمیم بگیفتید کی خوشان میان، مَرداکانی انتخاب بُکونید و اوشانَ پولُس و بَرنابا اَمرا اَنطاکیه شار روانه کونید. پس یهودا شناس به بَرسابا و سیلاسَ کی براران میان رهبر بو، انتخاب بُکودید. 23 بازین نامه ئی اَشان ره روانه کودید، کی اونِ درون بینیویشته بو: اَمان رسولان و ریش سیفیدانِ جا کی شیمی براران ایسیم، به غیریهودی براران کی اَنطاکیه و سوریه و کیلیکیه درون ایسائید، سلام به شُمان! 24 جه اویا کی بیشتاوستیم کسانی جه اَمی میان، بی اونکی اَمی جا دستوری بدَشته بید، باموئید و شمرأ خوشان گَبان اَمرا ناراحتَ کودید، و باعث بُبوستید کی شیمی فیکر پَریشان ببه. 25 هنه واسی اَمان یکدیل اَطو صلاح بیده ئیم کی مرداکانیَ انتخاب بُکونیم و اوشانَ اَمی عزیزان اَمرا، بَرنابا و پولُس شیمی ورجه اوسه کونیم، 26 اَ مرداکان اَمرا کی اَمی خُداوند عیسی مسیح نامِ خاطری، خوشان جانَ خوشان دسِ تان بنه ئید. 27 پس یهودا و سیلاسَ شیمی ور اوسه کودیم تا خوشان گب اَمرا شمرأ اَ کارانَ جا واخُب بُکونید. 28 اَمان و روح‌القدّس اَطو صلاح بیده ئیم کی هی باری شیمی کول سر ننیم، جغیر اَشان کی واجبید: 29 قربانی غذا بُتان ره، خون و خفه بُبوسته حیوانات گوشت و زِنا جا دوری بُکونید. اَگه اَشانِ جا دوری بُکونید، کار خُبی کونیدی. سلامت بیبید.» 30 پس اَشان رادکفتید، اَنطاکیه شار بُشوئید و اویا کلیسا آدمانَ جمَ کودید، و نامه یَ فارسانه ئید. 31 هَطوکی اوشان نامه یَ بخواندید، اُ پیغامِ جا کی باعث دیلگرمی بو، شادَ بوستید. 32 یهودا و سیلاسَم کی پیغمبر بید، خَیلی گَبان مرا، برارانَ تشویق کودیدی و قوّت دَئید. 33 یهودا و سیلاس چن وقتی اویا بأسائید، و بازون پس برارانْ اَشانَ سلامتی اَمرا روانَه کودید تا اوشان ورجه کی اَشانَ اوسه کوده بید واگردید. 34 ولی پولُس و بَرنابا اَنطاکیه درون بأسائید. 35 اوشان خَیلی دیگر ایماندارانِ اَمرا خُداوندِ کلامَ تعلیم دیئیدی و اعلام کودیدی. پولُس و بَرنابا میان اختلاف دکفه 36 چن وقت بازون پولُس، بَرنابایَ بگفت: «اُ شارانی کی خُداوند کلامَ اوشان میان اعلام بُکودیم، واگَردیم و برارانَ بیدینیم تا بدانیم کی اوشان وضع و اوضاع چُطویه.» 37 بَرنابا خواستی کی یوحَنای شناس به مَرقُسَم اَشان اَمرا بشه، 38 ولی پولُس صلاح نیده کَسی کی پامفیلیه درون اَشانَ تنها بَنَه و خو همکاریَ ادامه نده، خودش اَمرا ببره. 39 بَرنابا و پولُس میان اَنقَد اختلاف زیادَ بوست کی همدیگر جا سیوا بُبوستید. بَرنابا، مَرقُسَ اوساد و دریا راه جا قبرس سمت بُشو؛ 40 ولی پولُس، سیلاسَ اوساد و براران اونَ خُداوند فیض اَمرا راهی بُکودید. 41 پولُس وقتی کی سوریه و کیلیکیه جا ردّا بوستن دوبو، کلیسائانَ قوّت دئی. |
@ 2024 Korpu Company