اعمالٚ رسولأن 13 - کتاب مقدس به زبان گیلکی - گویش رشت و غرب گیلانبرنابا و شائولِ سفر انجیل پیغام ره 1 اَنطاکیه کلیسا درون، پیغمبران و آموجگاران ایسابید: بَرنابا، شمعون شناس به نیجِر، لوکیوس قیرَوانی، مَنائِن کی هیرودیسِ حاکمِ ناتنی برار بو و شائول. 2 وقتی کی اوشان روزه دَشتیدی و خُداوندَ پرستش کودن دیبید، روح القدّس بگفت: «بَرنابا و شائولَ اُ کار واسی کی اَشانَ دوخوادم، مرا سیوا بُکونید.» 3 بازون اوشان، بعدِ روزه و دُعا، خوشانِ دسَ اُ دونفر سر بنائید و اَشانَ سفرِ واسی رائی بُکودید. برنابا و شائول قبرس درون 4 اَطویی، اُ دونفر کی روح القدّس جا اوسه بُبوسته بید، سِلوکیه بندر بُشوئید و جه اویا دریا راه جا فارسه ئید قبرس. 5 وقتی سَلامیس شارَ بدُرون بُشوئید، یهود عبادتگائان درون خُدا کلامَ اعلام بُکودید. اوشان ”یوحنای“ شناس به ”مَرقُس“ ئَم خوشان اَمرا بَبرده بید تا اَشانَ کمک بُکونه. 6 اوشان تمان جزیره یَ بگردستید تا فارسه ئید پافوس شار. اویا ایتا یهودی مردای کی بارْ‌یشوع نام دَشتی بیده ئید. اُ مردای جادوگر و دوروغِ پیغمبر بو. 7 اون ’سِرگیوس پولُس‘ رومی فرماندارِ رفق بو. فرماندار کی ایتا عاقل مردای بو، بَرنابا و شائولَ خو ورجه دوخواد، چونکی خواستی خُدا کلامَ بیشتاوه. 8 ولی اُ جادوگر کی اونِ نام معنی عالم بو، اوشان اَمرا مخالفت بُکود و تقّلا بُکود کی وَئلانه فرماندار ایمان باوره. 9 ولی شائول، کی اونَ پولُسَم گُفتیدی، روح القدّس جا پُرَ بوست و اُ مرداکِ چوم درون فَندرست و بگفت: 10 «تو، اَی اِبليس زای، اَی تو کی هرچی دُرُستکاری دُشمندی، اَی کی جه هرچی حیله و نیرنگ پُری، خُداوند راست رائانِ کجَ کودن جا نخوایی دس اوسانی؟ 11 اَنه بدان کی خُداوندِ دس ضد تو ایسه. هسّا کورَ بی و تا چن وقت آفتاو رنگَ نیدینی. هو دَم، همه جا اونِ ره تیره و تار بُبوست، و خو دور چرخستی و اینفر دُمبال گردستی تا اونِ دسَ بیگیره و راه ببره. 12 بازون بعد اَنکی فرماندار اَ ایتفاقَ بیده ایمان باورد، چون اُ تعلیم جا کی خُداوند باره دَئیدی ماتا بوسته بو. پولُس و بَرنابا اَنطاكيه درون 13 پولُس و اوشانی کی اونِ اَمرا بید جه دریا راه، پافوسِ شار جا پرجه بُشوئید کی پامفیلیه منطقه درون بو. ولی اویا یوحنا اَشانِ جا سیوا بُبوست و اورشلیم شار واگردست. 14 ولی اوشان پرجه جا ردّا بوستید و اَنطاکیه شار کی پیسیدیه ولایت میان بو فارسه ئید. مُقدّسِ شنبه روج، عبادتگاه درون بُشوئید، و بینیشتید. 15 بعد اَنکی تورات و پیغمبرانِ بینیویشته ئانَ بخواندید، عبادتگاه پیله تران اَشانِ ره پیغام اوسه کودید و بُگفتید: «براران، اَگه گبی دَریدی کی مردومَ تشویق کونه، بیگید.» 16 پولُس بأسا و خو دس اَمرا ایشاره بُکود و بگفت: «اَی یهود مرداکان و شُمان اَی خُداترسان، گوش فَديد! 17 یهودِ مردومِ خُدا، اَمی پئرانَ انتخاب بُکود و اَمی مردومَ زماتی کی مصر میان غُربت درون ایسابید اوشانَ سربُلند بُکود و قدرت اَمرا اوشانَ جه اُ ولایت بیرون باورد، 18 و چهل سالِ دوروَر ویاوان درون اَشانِ رفتار جا تاب باورد. 19 اون بعد اَنکی هَفتا ملّتَ کی کنعان درون ایسابید، نابودَ کود، اوشانِ ولایتَ خو مردوم ره به ارث بنه.» 20 اَشان همه دُوروَر چهارصد و پنجاه سال طول بکشه. «بعدِ اون خُدا، تا سموئیل پیغمبر زمات، داوران اَشانَ فدَه. 21 بازون اوشان ایتا پادشاه بخواستید و خُدا، قِیس پسر، شائولَ بنیامینِ قبیله جا اَشانَ فدَه، کی چهل سال حکومت بُکود. 22 بعد اَنکی شائول حکومت جا اوساده بُبوست، داوودَ انتخاب بُکود تا اَشان پادشاه ببه، و اونِ باره گُوائی بدَه و بگفت: ” من داوود، یَسا پسرَ ایتا مردای بیدم کی می دیل درون خَیلی بینیشته؛ اون تمان می خواسته یَ بجا اَوره.“» 23 «خُدا عین خو واده، هه مرداکِ نسل جا، یهود مردومِ ره ایتا نیجات دَهنده يعنی عيسیَ روانه کود. 24 پیش جه اَنکی عیسی بایه، یحیی تمان یهود مردوم ره غسل تعمید گیفتنَ توبه واسی اعلام کودی. 25 وقتی کی یحیی خو خیدمتَ تمانَ کودن دبو، بگفت: ” فکر کونیدی من کیسَم؟ من اون نیئَم؛ بلکی اون بعد من اَیه و من حتی قابیل نیئَم اون چاروغ بندَ وازا کونم.“ 26 «اَی براران، اَی ابراهيم نسل زاکان، و اَی خُدا ترسانی کی اَیا ایسائید! اَ نیجاتِ پیغام، اَمرا اوسه بُبوسته. 27 چونکی اورشلیم مردوم و اوشانِ پیله تران عيسیَ نشناختيد و پیغمبران گبانَ کی هر مُقدّسِ شنبه درون بخوانده به، نفهمستیدی و اوشان عیسی محکوم کودن اَمرا، پیغمبرانِ گبانَ به حئیقت فارسانه ئید. 28 با اَنکی هی تقصیری اونِ کوشتن ره پیدا نکودید، پیلاتُس جا بخواستید اونَ بُکوشه. 29 و وقتی تمان اونچی کی اونِ باره بینیویشته بُبوسته بو، انجام بده ئید، اونَ صلیب جا بجیر باوردید، و مقبره درون بنائید. 30 ولی خُدا عیسیَ مُرده ئان جا زنده بُکود. 31 خَیلی روجان عیسی خورَه اوشان ره کی اون اَمرا جلیل جا اورشلیم سو بامو بید ظاهرَ کودی. الانَم اوشان اَمی مردوم ره، اونِ شاهدان ایسید. 32 «هسّا اَمان شمرأ خُب خبر دیئیم کی خُدا اونچی کی اَمی پئرانَ واده بده بو، 33 عیسی زنده کودن اَمرا، امرا کی اوشانِ زاکانیم وفا بُکود. هُطوکی دومّتا مزمور درون بینیویشته بُبوسته: «”تو می پسر ایسی؛ ایمرو، من تره مولود بُکودم.“ 34 «خُدا اونَ مردئان جا زنده بُکود تا دِه نپوخوسه هُطوکی، خُدا بگفته: «”من اُ مُقدّس و مطمئن برکاتَ کی داوودَ واده بدَه بُبوسته، شمرأ خوائم فدئن.“ 35 و هُطو ایتا دیگه مزمور درونم بینیویشته بُبوسته: «”تو وَئلانی اونی کی تی مُقدّس ایسه، بُپوخوسه.“ 36 «داوود بعد اَنکی عین خُداوند خواسته، خو دورانِ مردومانَ خیدمت بُکود، بَمرد و خو پئران ورجه بُشو و بُپوخوسته. 37 ولی اُ کَس کی خُدا اونَ زنده بکود، نُپوخوسه. 38 «پس، اَی براران بدانید کی بواسطه ی هه عیسی گُنائانِ آمرزش شمرأ اعلام به. 39 هرکس کی عیسیَ ایمان باوره بواسطه ی اون، آزادَ به، هر اونچی درون کی نتانستید بواسطه ی موسی شریعت، آزاد بیبید. 40 پس بپائید تا اَ پیغمبران بینیویشته شیمی سر نَیه کی گه: 41 «” فندرید، اَی شُمان کی رخشن گیریدی، حیرانَ بید و هلاکَ بید، چون شیمی روجانِ درون کاری کونم، کی هرچقد اونَ شمرأ بیگید، هرگس واور نخوائید کودن“» 42 وقتی پولُس و بَرنابا عبادتگاه جا بیرون شئون دیبید، مردوم اوشان جا خواهش کودیدی کی اَ مُقدّسِ شنبه ئم کی اَمون دَره اَجور چیان باره اَشان اَمرا گب بزنید. 43 بعد اَنکی مردوم عبادتگاه یَ ترکا کودید، خَیلی جه یهودیان و اُ خُداپرست آدمان کی یهودی بُبوسته بید، پولُس و بَرنابا دُمبالسر راه دکفتید. پولُس و بَرنابا اَشان اَمرا گب بزئید و اوشانَ تشویق بُکودید کی خُدا فیض درون ادامه بَدید. 44 اویتا مُقّدس شنبه کی بامو، تقریباً، تمان شار مردومان جمَ بوسته بید تا خُداوند کلامَ بیشتاوید. 45 ولی وقتی یهودیان، جماعتَ بیده ئید، حسودی جا پُرَ بوستید و بی احترامی اَمرا پولُس گبان مرا مخالفت بُکودید. 46 پولُس و بَرنابا جرأت اَمرا بگفتید: «لازم بو کی پیشتر جه همه، خُدا کلام شمرأ بگفته ببه، ولی چونکی اونَ ردّا کودید و خودتانَ ابدی زیندگی قابیل نانستیدی، پس هسّا اَمان غیر یهودیانِ سو واگردیم. 47 چون خُداوند اَطو اَمرا دستور بدَه کی: «”من تره غیر یهودیانِ واسی نور بساختم، تا دُنیا چهار گوشه، نیجاتَ فارسانی.“» 48 وقتی کی غیر یهودیان اَنه بیشتاوستید، خوشحال بُبوستید و خُداوند کلامِ احترامَ بدَشتید؛ و اوشانی کی ابدی زیندگی واسی مُعین بُبوسته بید، ایمان باوردید. 49 اَطویی خُداوند كلام سراسر اُ منطقه درون پخشَ بوست. 50 ولی يهوديان، مُتعصب و سر شناس زناکان و مرداکانیَم کی شار درون رهبر بیدَ تیرا کودید. اوشانم پولُس و بَرنابایَ اذیت و آزار بُکودید و اُ منطقه جا بیرون توَدَئید. 51 پولُس و بَرنابا هم اُ شار خاکَ خوشان پا جا اَشانِ ضد بِتکانه ئید و قونیه شار سمت بُشوئید. 52 شاگردان پُر جه ذوق و روح القدّس بید. |
@ 2024 Korpu Company