اعمالٚ رسولأن 12 - کتاب مقدس به زبان گیلکی - گویش رشت و غرب گیلانیعقوب کوشتن 1 هو زمات درون، هیرودیس پادشاه بنا بُکود، بعضی جه کلیسا آدمانَ اذیت و آزار کودن. 2 هیرودیس دستور بدَه یعقوب، یوحنا برارَ شمیشیر اَمرا بُکوشتید، 3 و وقتی بیده کی اَ جریان یهودیانَ خوش بامو، پِطرُسم دستگیر بُکود. اَ جریان یهودیانِ عید فطیر موقع ایتفاق دکفت. 4 هیرودیس بعد اَنکی پِطرُسَ گرفتارَ کود، اونَ خولتانک درون تَوَده و چار تا دسته یِ چار نفری سرباز اونِ پاستن ره بنه. اون خواستی بعد عید پسَخ، پِطرُسَ مردومِ جُلُو محاکمه بُکونه. 5 پس پِطرُسَ خولتانک درون بدَشتید، ولی کلیسا یسره پِطرُس واسی خُدا درگاه دُعا کودی. 6 ایی شب قبل اَنکی هیرودیس خواستی پِطرُسَ محاکمه بُکونه، پِطرُس دوتا زنجیل اَمرا دَوسته بو و دوتا سرباز وسط خفته بو، و مأمورانَم خولتانک دَر جُلُو کشیک دَئیدی. 7 ناخبر ایتا جه خُداوند فیریشته ظاهیرَ بوست و ایتا نور خولتانک درون فتاوست. اُ فیریشته پِطرُس تَکَ بزه و اونَ بیدارَ کود و بگفت: «زو ویریز!» هو دم، زنجیلان پِطرُسِ دسانِ جا وازا بوست و بیجیر بکفت. 8 فیریشته اونَ بگفت: «تی کمرَ دَوَد و تی چاروغ دُکون.» پِطرُسَم اَ کارَ بُكود. بازین فیریشته اونَ بگفت: «تی قبایَ تی دور واپیچ و می دُمبالسر بیا.» 9 پِطرُس اونِ دُمبالسر خولتانک جا بیرون بُشو. پِطرُس واور نُکودی کی، اونچی فیریشته انجام دِئه واقعیِه، بلکی خیال کودی رویا دِئن دَره. 10 اوشان اوّلتا و دوّمتا مأمورانِ جا بُگُذشتید و آهنی دروازه کی شار سمت وازَ بوستی فارسه ئید. دروازه خوره خوره اَشانِ ره وازَ بوست. اوشان بیرون بُشوئید و هَطوکی راه درون شئون دبید، ناخبر فیریشته غیبَ بوست. 11 بازین پِطرُس به خودش بامو و بگفت: «هسّا ده حتم درَم خُداوند خو فیریشته یَ اوسه کود و مَرا هیرودیس چنگ جا و تمان اُ اذیت و آزاری کی یهود مردوم اون رافا بید تا می سر بایه، نیجات بدَه.» 12 وقتی پِطرُس اَنه بفهمست، مریم، یوحنا شناس به مَرقُس مارِ خانه بُشو. اویا خَیلیان جمَ بوسته بید و دُعا کودیدی. 13 وقتی پِطرُس خانه دَرَ بُکوبست، ایتا کُولفت رودا نام بامو تا درَ واکونه. 14 وقتی اُ کلفت پِطرُس صدایَ بشناخت، ذوق جا، بجای اَنکی دَرَ واکونه، تند و تاکیدی خانه درون واگردست و خبر بدَه: «پِطرُس درِ سر ایسأ!» 15 اوشان اُ کولفتَ بگفتید: «تورا بوستی!» ولی وقتی اونِ اصرار کودنَ بیده ئید بگفتید: «لابد اونِ فيریشته یِ.» 16 ولی پِطرُس یسره دَر زئن دُبو. آخربسر، وقتی دَرَ وازَ کودید، اون دئن اَمرا ماتا بوستید. 17 پِطرُس خو دسِ اَمرا اَشانَ ایشاره بزه کی تام بزَنید و اَشان ره تعریف بُکود کی خُداوند چُطو اونَ خولتانک جا بیرون باورد. و بگفت: «یعقوب و بقیه برارانَ اَ جریان جا واخبرَ کونید.» بازون ایتا جا دیگه بُشو. 18 وختی صُوب بُبوست، سربازان میان غوغا بُبوست، چونکی نانستیدی چی پِطرُسِ سر بامو دَره. 19 هيروديس دستور بدَه همه جا پِطرُس دُمبال بَگرديد؛ و چونکی اونَ نیافتید، مأمورانیَ کی پطرُسَ پاستید، بازخواست بُکود و دستور بدا کی اوشانَ بُکوشید.بازین پِطرُس یهودیه ولایت جا قیصریه شار بُشو و چن وقت اویا بأسا. هيروديس مَردن 20 هیرودیس صور و صیدونِ شارانِ مردومانِ سر غیظ بُکوده بو. جه اَ رو اُ دوتا شارِ مردوم همدیگر اَمرا اونِ ورجه بُشوئید و اجازه بخواستید تا هیرودیسَ بیدینید. اوشان بْلاستوس، پادشاه خیدمتکارَ راضی بُکودید تا هیرودیس اَمرا آشتی بُکونید، چونکی اوشانِ غذا و مایحتاج، هیرودیسِ مملکت جا فراهم بوستی. 21 اُ روجِ درون کی قرار بنابید، هیرودیس خو پادشائی قبایَ دُکود، خو تخت سر بینیشت و جماعت ره سخنرانی بُکود. 22 مردوم داد زئیدی: «اَن ايتا جه خُدایان صدايه، نه ایتا آدم صدا!» 23 هو دم، ایتا جه خُداوند فیریشته هیرودیسَ بِزه، اَنه واسی کی خُدایَ جلال نَده بو. بازون کَلم ئان اونِ تنَ بُخوردید و بمرد. 24 ولی خُدا کلام ویشتر ویشتر پیش شوئی و پخشَ بوستی. 25 بَرنابا و شائول خوشان مأموریتَ به آخر فارسانه ئید و اورشلیم جا واگردستید و یوحنای شناس به مرقسَم خوشان اَمرا باوردید. |
@ 2024 Korpu Company