سوم یوحنا 1 - کتاب مقدس به زبان گیلکی - گویش رشت و غرب گیلان

¹ ریش سفید جا، به عزیزِ گايوس کی من اونَ ’حئیقت‘ درون دوست دَرم.

² اَی عزيز، می دُعا اَنه كی همه چی خُب پیش بشه و سلامت بیبی و هَطوئم تی جان سلامتی درون بِبه.

³ چون خَيلی ذوق بُکودم، اُ موقع کی براران باموئید و گُوائی بدَئید کی ’حئیقت‘ درون زیندگی کونی و راس راسی ئَم کی حئیقت درون زیندگی کودن دری.

⁴ هیچی مَرا ویشتر جه اَن به ذوق ناواره کی بیشتاوم می زاکان ’حئیقت‘ درون زیندگی کونیدی.

⁵ ای عزیز، تو تمانِ تی کارانِ درون، براران ره تی امانت داریَ نیشان دیئی، بخصوص اوشانِ ره کی تی ورجه غریبه اید.

⁶ اَشانم کلیسا درون تی محبت ره گُوائی بدَئید؛ پس خُبِ کار کونی اگه اَشانَ اوجور کی در شأن خُدا بِبه، سفر ره راهی بُکونی.

⁷ چونكی اَشان اُ نامِ واسی سفر بُکوده اید و غیر یهودیانِ جا هی کمکی فینگیفتید.

⁸ پس اَمان بایستی اَجور آدمان مانستنَ کمک بُکونیم تا بتانیم اوشانِ امرا حئیقت واسی همکار بیبیم.

⁹ من ایچی كليسا ره بينیويشتم، ولی ديوتْرِفيس كی دوست دَره خورَه اوّل بَنه، اَمی اقتدارَ اهمیت نَدِه.

¹⁰ پس اَگه من بایم، کارانیَ كی اون کونه وارسی خوائم کودن، چره کی غَرَضِ امرا اَمی ضِد گب زِنه و به اَنم قانع نیبه، اَمی برارانم قُبیل نُکونه؛ و برارانیَم کی خوائیدی اَشانَ قُبیل بُکونیدِ جُلُویَ گیره، و کلیسا جا بیرون تَوَده.

¹¹ ای عزیز، بَدیَ تی سر مشق نُکون، بلکی خُبی جا سرمشق بیگیر؛ اونکی خُبِ کار کونه خُدا جا ایسه، اونکی بَدِ کار کونه خُدایَ بیده ناره.

¹² همتان، دیمیتریوسِ باره خُبِ گُوائی دیئیدی، حَتّی خودِ حیئقت. اَمانم هُطو گُوائی دیئیم و دَنی کی اَمی گُوائی راست ایسه.

آخربسر

¹³ خَيلی چیان دَشتیم کی تَره بینیویسم، ولی نخوائم کی قلم و مرکب امرا بِبه.

¹⁴ امید دَرم خَیلی زو، تَره بیدینم و رو دَر رو گب بزنيم.

¹⁵ سلامت بیبی! رفِقان تَره سلام فارسانیدی. تک به تک رفقانَ بـه نام سلام فارسان.