دوم تیموتائوس 4 - کتاب مقدس به زبان گیلکی - گویش رشت و غرب گیلان

خُدا کلام اعلام کودَن

¹ من خُدا و مسیحْ عیسی جُلو کی مُرده ئان و زنده ئانَ داوری کونه، و اونِ آمون و پادشایی واسی، تَره سفارش کونَم کی،

² خُدا کلامَ اعلام بُکون، و وقت و بی وقت آماده بُبو، زیادِ صبر و کاملِ تعلیم امرا، اصلاح و تشر و تشویق بُکون.

³ چون زماتی فارسه کی مردوم دُرست تعلیمَ تاب ناوَریدی، بلکی آموجگارانیَ خوشانِ دوروَر جَمَ کونیدی تا اونچیَ بیشتاوید کی اوشانِ گوش دوست داره بیشتاوه و اوشانِ هوا هوسانِ امرا جور دَر اَیه؛

⁴ و اوشان، حئیقتِ گوش کودَنِ جا رو واگَردانیدی و داستانانِ سَمت گمراه بیدی.

⁵ ولی تو همه چی درون هوشیار بُبو؛ عذابانَ تاب باوَر، انجیلِ اعلام کودنِ کارَ انجام بدَن و تی خیدمتَ، تمان و کمال به آخر فارسان.

⁶ چونکی می خون، هه الانَم، پیشکش شراب مانستن، فُوُستن دَره و می شوئنِ وقت اَ دُنیا جا فاراسه.

⁷ من خُبِ جنگِ درون بجنگستَم، می دوره یَ تمانَ کودَم و می ایمانَ بدَاشتَم.

⁸ بعدِ اَن، اُ صالحی تاج، مِره آماده بُبوسته، تاجی کی خُداوند، اُ عادلِ داور، اُ روجِ درون مَره فَدِه - نه فقط مَره، بلکی تمانِ اوشانی کی اون ظهورِ شوقَ داشتید.

آخرتا سفارشان

⁹ تقلا بُکون هر چی زودتر می ورجه بایی.

¹⁰ چونکی دیماس اَ دُنیا دوست داشتنِ واسی، مَره ولا کود و تسالونیکی شار بُشو. کْریسکیس، غَلاطیه منطقه بُشو و تیتوس ئم دلماتیه منطقه بُشو دَره.

¹¹ فقط لوقا می امرا ایسا. مَرقُسَ اوسان و تی مَرا باوَر چونکی اون، می خیدمتِ ره خَیلی بکار اَیه.

¹² تیخیکوسَ اَفِسُس شار اوسه کودم.

¹³ وقتی آموندری، می قبایَ کی تْروآس شار درون کارپوسِ ورجه، جا بَنَم تی امرا باوَر، کتابان و بخصوص طومارانم تی مَرا باوَر.

¹⁴ اسکندرِ مِسگر، مَره خَیلی بَدی بُکوده؛ خُداوند اونِ کارانِ سزایَ دِئه.

¹⁵ توئم اونِ جا دوری بُکون، چونکی اَمی پیغامِ امرا سخت مخالف بو.

¹⁶ می اولّتا دفاع درون، هیکَّس می پوشت دَر نامو، بلکی همه مَره ولا کودید. نَبه کی اَن، به اوشانِ حساب بِنَه بِبه.

¹⁷ ولی خُداوند می امرا بو، و مَره قوت بدَه تا اُ پیغام، بواسطه من تمان و کمال اعلام بِبه و غیره یهودیان، همتان اونَ بیشتاوید. اَطویی شیرِ دهنِ جا جیویشتم.

¹⁸ خُداوند مَره هر بَدِ کارِ جا رهائی دِئه و مَره سلامتی امرا به خو آسمانی پادشایی آوره. جلال تا ابد و تا ابد اونِ ره بِبه. آمین!

آخرتا سلام ئان

¹⁹ پْریسکیلا و آكیلا و اونیسیفوروسِ خانواده یَ سلام فاراسان.

²⁰ اِراستوس، قُرِنتُس شار درون بِئسا، و من تْروفیموسَ کی ناخوش بو، میلیتوسِ شار درون بَنَم.

²¹ تقلا بُکون پیش جه زمستان اَیا بیایی. یوبولوس، پودِنْس، لینوس، کْلودیا و تمانِ براران تِره سلام داریدی.

²² خُداوند تی روحِ امرا بِبه. خُدا فیض شیمی امرا بِبه.