دوم تیموتائوس 3 - کتاب مقدس به زبان گیلکی - گویش رشت و غرب گیلان

آخرتا روجان

¹ ولی اَنه بدان کی آخرتا روجانِ درون، سختِ روجگاری در پیش دَره.

² چونکی مردوم، خود پَرست، پول پَرست، مغرور، متکبر، فَحاش، پئر و مار جُلو نا فرمان، ناشُکر، ناپاک،

³ بی عاطفه، کینه ای، افترا زَئن، بی بندوبار، واشی، خُبی امرا دُشمند،

⁴ خیانتکار، بی ملاحظه، غرور جا باد بُکوده، کی عیاشیَ خُدا جا ویشتر دوست دَریدی،

⁵ ظاهر درون دیندار ولی اونِ قدرتَ حشا کونیدی. اَجور آدمانِ جا دوری بُکون.

⁶ چونکی اوشانِ میان کسانی ایسائیدی کی مردومِ خانه درون راه پیدا کونیدی، کم عقلِ زناکانَ اسیر کونیدی کی خوشانِ گناهانِ بارِ جیر بچَمَستیدی و جورواجور هوس ئان، اوشانَ هرطرف فاکشه.

⁷ اَ زناکان همیشک تعلیم گیریدی، ولی هرگس نتانیدی حئیقتَ بشناسید.

⁸ هُطوکی یَنّیس و یَمْبْریس موسی امرا مخالفت بکودید، اَ مرداکانم حئیقتِ امرا مخالفت کونیدی، کی اَشانِ فکران خرابِه و اَشانِ ایمان رَّدِ.

⁹ ولی اَشان، بِجایی فانرسیدی چونکی اوشانِ نادانی تمانِ مردومِ ره آشکار خوائه بوستن، هُطوکی اُ دوتا آدم نادانی ئَم آشکار بُبوست.

تمانِ مقدّس بینیویشته ئان خُدا الهام ایسه

¹⁰ ولی تو می تعلیم و می رفتار و می هدف و می ایمان و می صبر و محبت و می طاقتَ جه نزدیک شاهد بی،

¹¹ و اُ رنج و اذیت و آزاری کی انطاکیه، قونیه و لستره شاران درون می سر بامو، اُ رنج و اذیت و آزاریَ کی تاب باوَردَم؛ ولی خُداوند تمانِ اَ چیان جا مَره نجات بِدَه.

¹² راس راسی، اوشان کی خوائیدی مسیحْ عیسی درون دینداری امرا زیندگی بُکونید، عذاب کشیدی؛

¹³ ولی شرورِ آدمان و قاب بازان بَدی درون بَدتر خوائید بوستن؛ گول زنیدی و گول خوریدی.

¹⁴ ولی تو اونچی درون کی یاد بیگیفتی و اونَ ایمان باوَردی پابرجا بُبو، چره کی دَنی چه کسانی جا اَشانَ یاد بیگیفتی،

¹⁵ و چُطو جه اُ وقتی کی زای بی، مقدّسِ بینیویشته ئانَ دَنستی، کی تانه تَره حکمت بدِه و بواسطه ی ایمانی کی مسیحْ عیسی درونِ، به نجات فارسه.

¹⁶ تمانِ مقدّسِ بینیویشته ئان خُدا الهام ایسه و تعلیم و توبیخ و اصلاح و تربیت واسی صالحی درون فایده دَره،

¹⁷ تا مَردِ خُدا کامل بِبه، و هر خُبِ کارِ واسی آماده.