دوم تیموتائوس 2 - کتاب مقدس به زبان گیلکی - گویش رشت و غرب گیلانمسیحِ خُبِ سرباز 1 پس تو، می زای، اُ فیضِ امرا کی مسیحْ عیسی درونِ قَوی بُبو، 2 و اُ چیانی کی خَیلی شاهدانِ جُلو می جا بیشتاوستی، اُ وفادار آدمانیَ واسپار کی تانیدی دیگرانَم یاد بدید. 3 هَطو مسیحْ عیسی خُبِ سربازه مانستن، عذاب ئانِ درون شریک بُبو. 4 هی سربازی، خو خیدمت موقع، خورَه خو زیندگی کارانِ ره گرفتارَ نُکونه، چونکی خوائه اُ کسیَ کی اونَ خیدمت سر بَنه، راضی بُکونه. 5 ایتا پهلوانَ تاج فَندید مگه اَنکی، عینِ مسابقه قانونان عمل بُکونه. 6 اُ کشاورز کی سخت کار کونه بایستی اولتّا کسی بِبه کی خو محصولِ جا بهره بَره. 7 اونچی کی گفتن دَرمَ فکر بُکون، چونکی خُداوند تمانِ اَ چیانِ درون تَره فهم دِئه. 8 عیسی مسیحَ به یاد باور کی مُرده ئانِ جا زنده بُبوست، و داوود نسلِ جا بو، هُطوکی اَ انجیل کی من اعلام کونَم اَنه، 9 اَنـه واسی ایسه کی ایتا جنایتکارِ مانستن زنجیل درونم و عذاب کِشئندرم، ولی خُدا کلام، زنجیل درون نیه. 10 جه اَ رو من همه چیَ انتخاب بُبوسته ئانِ واسی تاب آورم، تا اوشانم اُ نجاتیَ کی مسیحْ عیسی درونِ، ابدی جلال امرا بدَس باوَرید. 11 شه اَ گبَ تمان و کمال اطمینان کودن کی: اگه اونِ امرا بَمردیم، اونِ امرا زیندگی ئَم کونیمی، 12 اگر تاب باوَریم، اونِ امرا سلطنتَم کونیم، اگر اونَ حشا بُکونیم، اونم امرا حشا کونه؛ 13 اگر بی وفا بیبیم، اون، وفادار مانه، چونکی نتانه خورَه حشا بُکونه. 14 اَ چیانَ اوشانِ یاد باور، و خُدا جُلو اوشانَ سفارش بُکون کی کلماتِ سر دعوا مرافه نُکونید، کی فایده ناره، بلکی فقط باعث به، اوشانی کی ایشتاویدی جه راه به دَر بیبید. 15 تقلا بُکون کی خُدا ورجه مَقبول بیبی، ایتا کارگرِ کی خجالت نکشه و حئیقَتِ کلامَ دُرس بِکار بَره. 16 ولی دُنیا مفتِ گبانِ جا دوری بُکون، چونکی مردومَ ویشتر و ویشتر بی دینی سمت فاکشه، 17 و اَجور آدمانِ گبان، خورِه مانستن، همه جا پخشَ بِه. هیمنائوس و فیلِتوس، هه دسته جا ایسید، 18 کی حئیقتِ جا واگردستید و گیدی، اُ روج کی مُرده ئان زنده بیدی، هه الانِ و اَطویی بعضیانِ ایمانَ از بین بَریدی. 19 با اَ حال، اُ قُرصِ پِی کی خُدا بَنه دَره، پابرجا ایسه و اَنه امرا مهر بُبوسته کی: «خُداوند خو آدمانَ ایشناسه» و «هر کی خُداوندِ نامَ اقرار بُکونه بایستی نادُرستی جا دوری بُکونه.» 20 ایتا پیله خانه درون، فقط زر و نقره ظرفان نَنَه، بلکی چوبی و گِلی هم نَئه. بعضی جه اوشان مهمِ کارانِ ره بکار شه بعضیانَم دمِ دَس ره. 21 پس اگه اینفر خورَه اَ چیانِ جا پاک بُکونه، ظرفی ایسه مهم کارانِ ره، صابخانه ره مقدّس و مفیدِ ظرفِ و هر خُبِ کارِ ره آماده ایسِه. 22 پس جوانی هوا و هوسِ جا فرار بُکون، و اوشانِ امرا کی پاکِ دیلِ مَرا خُداوندَ دوخانیدی، صالحی و ایمان و محبت و صلح و سلامتی دمبال بُبو. 23 جه اُ بحث ئان کی، نادانی و نَفَهمی جا ایسِه دوری بُکون، چره کی دَنی دعوا مرافه به پا کونه. 24 خُداوندِ نوکر نبایستی دعوا مرافه بُکونه، بلکی بایستی همه کسِ امرا مهربان ببه، بتانه تعلیم بدِه و بَدی ئانِ جُلو صبر امرا تاب باوره. 25 بایستی اوشانیَ کی مخالفید، نرمی امرا تَصیح بُکونه، شاید خُدا اوشانَ توبه عطا بُکود تا حئیقتَ بشناسید، 26 و به خودشان بائید، و اِبلیس دامِ جا جیویزید، چونکی اونِ گرفتار بُبوسته بید تا اونِ خواسته یَ بجا باورید. |
@ 2024 Korpu Company