دوم یوحنا 1 - کتاب مقدس به زبان گیلکی - گویش رشت و غرب گیلان

¹ ریش سفید جا، به انتخاب بُبوسته بانو و اونِ زاکان کی اوشانَ حئیقت درون دوست دَرم- و نه فقط من بلكی تمان اوشانی كی حیئقتَ بشناختیدی-

² اُ حئیقتِ واسی کی اَمی درون نَئه و تا ابد اَمی امرا مانه.

³ فیض و رحمت و سلامتی جه خُدایِ پئرِ طرف و جه عیسی مسیح، اُ پئرِ پسر، اَمی امرا مانه، حئیقت درون و محبت درون.

محبت و حئیقت درون زیندگی کودن

⁴ من خَيلی ذوق بُکودم کی بفهمستم، بعضی جه تی زاکان بنا به اُ حکمی کی پئرِ جا فیگیفتیم، ’حئیقتِ‘ درون زیندگی کونیدی.

⁵ هسّا، محترمِ بانو، تی جا ایچی خوائم. نه اونکی ایتا تازه حکم تِره بینیویسم، بلكی هونی کی جه بنا دَشتیم، کی همدیگرَ محبت بُکونیم.

⁶ و محبت اَنه کی امان عینِ اونِ حکمان زیندگی بُکونیم. اَ حکم اَنه هُطوکی جه بنا بیشتاوستید، تا محبتِ درون زیندگی بُکونید.

⁷ چونكی دُنیا درون خَیلی دَغلباز آدمان باموئید، كی اوشان اعتراف نُکونیدی عيسی مسيح، انسان جسم درون بامو. اَجور آدمان هو دَغلبازان و ضّدِ مسیح ایسید.

⁸ واخُب بيبيد تا اُ کار ثمره یَ کی اَمان بُکوده بیم به باد نَدید، بلكی ایتا پاداشَ تمان و کمال فیگیرید.

⁹ هركس كی مسيح تعلیم جا پیش دَکفه و اونِ درون ثابت نَمانه، خُدایَ ناره. هركس کی اونِ تعلیمِ درون ثابت بمانه، هم پئرَ دَره و هم پسرَ دَره.

¹⁰ اَگه كسی شيمه ورجه بايه و اَ تعلیمَ ناوره، اونَ شیمی خانه درون راه نَدید و اونَ ایتا سلامَم نیگید؛

¹¹ چون اُ کَس کی اونَ سلام بگه، اونِ شریرِ کارانِ درون شریکَ به.

آخربسَر

¹² هرچن خَيلی چيان دَرم كی شمرأ بينیويسم، ولی نَخوائم كی مُرکب و کاغذ امرا بِبه. بلکی امید دَرم كی شيمه ورجه بايم و رو دَر رو گب بزنيم تا اَمی شادی كامِل بِبه.

¹³ تی انتخاب بُبوسته خاخورِ زاکان، تَره سلام فارسانیدی.