دوم قرنتیان 8 - کتاب مقدس به زبان گیلکی - گویش رشت و غرب گیلان

دس و دلبازی ره تشویق کودن

¹ براران، امان خوائیم شمرأ اُ فیض درون کی خُدا مقدونیه کلیسائانَ فدَه، واخبرَ کونیم.

² چونکی اوشان مُصیبت واسی، سخت امتحان بُبوستید، ولی بی‌ حد و حساب شادید و با اَنکی خَیلی ناداری درون ایسائید، ولی دَس و دیل بازید.

³ چره کی من شاهدم کی خوشانِ توان اَندر حتی ویشتر جه اون پا پیش بَنئید.

⁴ خَیلی اَمرا بی ریا منت بُکودید و بخواستید اَ خیدمت درون کی مُقدّسین ره ایسه شریک بیبید.

⁵ اَشان نه فقط اوجور کی امان انتظار دَشتیم بلکی اول خوشانَ خُداوند ره وقف بُکودید و بازین مطابق خُدا اراده خودشانَ وقفِ امان بُکودید.

⁶ جه اَ رو، امان تیتوس جا بخواستیم هُطوکی خودش پیشتر اولتّا قدمانَ اوساده بو، الانم اُ کار خیرَ شیمی میان کامل تمانَ کونه.

⁷ ولی اوجور کی همه چی درون سَرترید، ایمان درون، گب زئن درون، دانایی درون، بی ریایی درون و شیمی محبت نسبت به امان- پس اَ کار خیر درونم همه کَس جا سَرتر بیبید.

⁸ من اَنه شمرأ حُکم نُکونم، بلکی خوائم بواسطه دیگرانِ غیرت ثابت بُکونم کی شیمی محبت ئم بی ریا ایسه.

⁹ چونکی اَمی خُداوند عیسی مسیح فیض جا واخبرید کی هرچن دولتمند بو، شیمی واسی نادار بُبوست تا شُمان اونِ ناداری درون دولتمند بیبید.

¹⁰ من می نظرَ اَ جریان باره گَم: اَن به نفع شُمان ایسه، پارسال، شُمان نه فقط اَ کار خیر انجام دَئن درون، بلکی اونِ انجام دَئن ذوق وشوق درونم پا پیش بنَبید.

¹¹ پس الان اَ کارَ تمانَ کونید، تا ذوق و شوقی کی اَ کار ره دَشتید، اونِ تمان کودن شیمی توان مالی اَمرا جور بِبه.

¹² چونکی اَگه ذوق و شوق بِبه اُ آدم پیشکش، مطابق اوچی کی دَره قُبیل به، نه مطابق اونچی کی ناره.

¹³ چونکی اَمی منظور اَن نیه کی دیگران آسایش درون بأسید و شُمان فشار درون، بلکی خوائیم منصفانه بِبه،

¹⁴ کی الان شیمی فراوانی، اوشانِ احتیاجاتَ برطرف بُکونه تا ایروج اوشانِ فراوانی شیمی احتیاجاتَ برطرف بُکونه تا اَطویی انصاف برقرار بِبه.

¹⁵ هُطوکی تورات درون بینیویشته بُبوسته: «اونکی زیادی جما کوده بو، اضافه ناشتی، و اونکی کم جما کوده بو، کم و کسر ناشتی.»

پولُس، تیتوس سفارشَ کونه

¹⁶ ولی خُدایَ شُکر کونم کی اُ غیرتیَ کی من شمرأ دَرم تیتوس دیل درونم نَئه.

¹⁷ چونکی اون نه فقط اَمی خواسته قُبیل بُکود، بلکی خودش ذوق و شوق زیاد مرا، اَنه واسی کی شیمی ورجه بایه پا پیش بنه.

¹⁸ امان ایتا دیگر برارَ تیتوس مَرا اوسه کونیم کی انجیل موعظه واسی تمان کلیسائان درون سرشناس ایسه.

¹⁹ و نه فقط اَن، بلکی اُ برار کلیسائان جا تعیین بُبوسته تا اَ کار خیر کی اون انجام دَئن و اداره کودن اَمی وظیفه ی، اَمی اَمرا همسفر ببه. اُ کاری کی خُداوند جلال واسی ایسه و اَمی خیر خوائی نیشان دئه.

²⁰ امان خَیلی پائیم اَ خیدمت درون کی پیشکشان جما کودن، کی دیل جا و بواسطه امان اداره به هیکّس اَمی سر عیب نَنه.

²¹ چونکی تقّلا کونیم نه فقط خُداوند نظر درون، بلکی مردوم دید درونَم اونچیَ کی خُبِ انجام بدیم.

²² و اَشانِ مَرا اَمی برارَ اوسه کونیم، کی خَیلی اونَ امتحان بُکودیم و بفهمستیم کی خَیلی چیان درون ذوق و شوق دَره، ولی هسّا اُ برار اُ اطمینان زیادِ خاطری کی شمرأ دَره ویشتر جه قبل ذوق و شوق دَره.

²³ تیتوسِ باره بایستی بگم کی اُ خیدمت درون کی شمرأ کودن دَره می شریک و همکار ایسه. و اَمی براران باره ئم بایستی بگم کی اوشان کلیسائانِ اوسه بُبوسته ئان و مسیح‌ جلال ایسید.

²⁴ پس شیمی محبت و افتخاری کی شمرأ کونیم کلیسائانِ محضر درون اَ آدمان ره ثابت بُکونید.