اوّل تیموتائوس 5 - کتاب مقدس به زبان گیلکی - گویش رشت و غرب گیلان

تعلیم ئان کلیسا ره

¹ پیر مرداکَ تشر نَزن، بلکی اونَ تی پئر مانستن تشویق بُکون، و جوانانَم تی برارانِ مانستن،

² و پیر زناکانَ شیمی مارانِ مانستن، وَ جوانِ زناکانَ شیمی خاخورانِ مانستن، تمانِ پاکی درون.

³ بیوه زناکانیَ کی راس راسی بی کَس ایسید، حُرمت بَنه.

⁴ ولی اگر ایتا بیوه زن، زاکان و نَوه ئان دَره، اوشان اول بایستی یاد بیگیرید کی مواظبت کودَنِ امرا خوشانِ خانواده جا، خوشانِ دینداریَ نیشان بدید و اَطویی خوشانِ دِینَ، خوشانِ پئر و مار و خوشانِ اجداد ره بجا باوَریدی، چونکی اَن، خُدایَ خوش آیه.

⁵ اونکی راس راسی بیوه ایسه و بی کسِ، خُدایَ اُمید دَوَسته و شبنده روج دعا درون و کمک گیفتن خُدا جا، مشغول ایسـه.

⁶ ولی اگر ایتا بیوه زن، عیاشی درون زیندگی بُکونه، با اَنکی زنده ایسه، ولی بَمرده یه.

⁷ اَ چیانَم حکم بُکون، تا اوشانِ زیندگی درون هیچی دَنبه کی اونِ واسی سرکوفت بخورید.

⁸ ولی اگه ایکس خو فامیلان، بخُصوص خو خانواده احتیاجاتِ دُمبال نَبه، خو ایمانَ حَشا کونه و ایتا بی ایمانِ جا بَدترِ.

⁹ فقط اُ بیوه زناکانیَ نام نیویسی بُکون کی شصت سال ویشتر بداشته بیبید و ایبار مَردَ بوسته بید،

¹⁰ و خُبِ کارانِ انجام دَئن درون شناس بیبید، یعنی: خو زاکان پیله کوده بی، نسبت به غریبه ئان مهماندوست بُبوسته بی، مقدّسینِ لنگانَ بوشسته بی، دردمندانِ جا مراقبت بُکوده بی، و خورَه هرجور خُبِ کار واسی وقف بُکوده بی.

¹¹ ولی بیوه زناکانیَ کی جوانتر ایسید نام نیویسی نُکون، چون هَطوکی اوشانِ هوا و هوس، اوشانَ مسیحِ جا دورَ کونه، خوائیدی مَردَ بید،

¹² اَنه واسی محکوم بیدی، چونکی خوشانِ اولتّا ایمانَ پا جیر نیئیدی.

¹³ بعلاوه، اوشان تنبلیَ یاد گیریدی، اَ خانه اُ خانه شیدی، نه فقط تَنبلی، بلکی خبربَر و فوضول ئم بیدی و اُ چیانیَ کی نَباستی بیگید، به زوان آوریدی.

¹⁴ پس می نظر اَنه کی بیوه زناکانی کی جوانتر ایسید مَردَ بیبید، زای باوَرید، خانه داری بُکونید، و فرصتِ بهتان زِئن، دُشمندَ فَندید.

¹⁵ چونکی الانَم بعضیان، شیطانِ دُمبال بُشوئید و گمراه بُبوستید.

¹⁶ اگه ایتا ایماندارِ زنای، خو فامیلان درون بیوه بدَره، بایستی خودش اوشانَ کمک بُکونه تا کلیسا ره سَربار نیبید و کلیسا بتانه اُ بیوه زناکانَ کمک بُکونه کی راس راسی بی کَس ایسید.

¹⁷ ریش سفیدانی کی خُبِ رهبری بُکوده بید، دو برابَر حرمتِ لایق ایسید، بخصوص اوشانی کی موعظه و تعلیم واسی زحمت کشیدی.

¹⁸ چونکی توراتِ کتابِ درون گه: «ایتا گابِ دهنَ کی خرمنَ کوبه دَنوَد» و «کارگر بایستی خو دستمزدَ فیگیره.»

¹⁹ هیتا جه کلیسا ریش سفیدانِ ضد هی بهتانیَ قُبیل نُکون، مگه اَنکی دوتا یا سه تا شاهد گواهی امرا.

²⁰ اوشانیَ کی گناهِ درون پافشاری کونیدی، همتانِ جُلو تشر بزن تا الباقی بَترسید.

²¹ خُدا و مسیحْ عیسی و انتخاب بُبوسته فیریشته ئانِ جُلو، تی جا خواهش کونَم کی اَ قانونانَ بی هی غَرَضی رعایت بُکونی و هی کاریَ طرفداری امرا نوا کودَن.

²² جه اَنکی اینفرَ خیدمت ره تعیین بُکونی تَادی نوا کودَن، دیگرانِ گناه ئان درون شریک نُبو، تَره پاک بدار.

²³ دِه فقط آب نخور، بلکی تی مَاده واسی و تی ناخوشیان ره کی همیشک دَری، ایپچه شرابَم بخور.

²⁴ بعضی جه آدمانِ گناه ئان نمایانِ، و جُلوتر داوری بوستَن ره شیدی، ولی بقیه ی آدمانِ گناه ئان دِرتَر نمایان خوائه بوستَن.

²⁵ پس خُبِ کارانَم معلوم ایسید، و حتی اوشانی کی معلوم نیئید، نیشه جیگا بدَه دَاشتَن.