اوّل تیموتائوس 3 - کتاب مقدس به زبان گیلکی - گویش رشت و غرب گیلان

کلیسا ناظران و شماسان

¹ اَ گبَ شه اطمینان کودَن: کی اگه اینفر آرزو دَره کی کلیسا نظارتِ کارَ بدَره، خُبِ کار دُمبال ایسه.

² پس ایتا ناظر بایستی هیچی اونِ زیندگی درون دَنبه کی اونِ واسی سرکوفت بخوره، ایتا زن بدَره، هوشیار بِبه، خو نَفْسِ جلویَ بیگیره، با آبرو بِبه، مهماندوست بِبه، بتانه تعلیم بدِه،

³ نه عرق خور، نه زورگو بلکی آرام بِبه، نه جنگی، نه پولدوست.

⁴ اون، بایستی خو خانواده یَ بِخُبی بگردانه، و خو زاکانَ جوری تربیت بُکونه کی اونِ جا تمانِ احترامِ امرا اطاعت بُکونید،

⁵ چونکی اگه ایکس نَدانه کی چُطو بایستی خو خانواده یَ بگردانه، چُطو تانه خُدا کلیسایَ مراقبت بُکونه؟

⁶ و تازه ایماندار نَبه، نَبه کی غُرور اونَ بیگیره و اِبلیسِ مانستن محکوم بِبه.

⁷ بعلاوه، اون، بایستی کلیسا بیرونِ مردومانِ میانَم خوشنام بِبه تا رُسوا نَبه و اِبلیسِ تله درون دَنکفه.

⁸ هَطو شَماسانَم بایستی باوقار بیبید، دورو نیبید، شرابِ گرفتار نیبید، نادُرستِ سودِ حرصَ نزَنید.

⁹ اوشان بایستی ایمانِ رازَ ایتا پاکِ وجدان امرا بدَرید.

¹⁰ و اوشان بایستی اول امتحان بیبید؛ بازین اگه ثابت بکودید کی بی عیب ایسید، وَئلید شَماسی کارِ درون خیدمت بُکونید.

¹¹ هَطو اوشانِ زناکان بایستی باوقار بیبید، بُهتان زَن نیبید، بلکی هوشیار بیبید و همه چی درون وفادار بیبید.

¹² هرتا جه شَماسان بایستی ایتا زن بدَره، و خو زاکان و خانواده یَ بخُبی بگَردانه.

¹³ چون اوشانی کی شَماسانِ مقامِ درون خُبِ خیدمت بُکوده بید، ایتا خُب مقام گیریدی و اُ ایمانِ درون کی مسیح عیسی درونِ، پیله اطمینانی بدَس آوریدی.

¹⁴ اُمید دَرم کی خَیلی زو تی ورجه بایم، ولی اَشانَ تَره نیویسم تا،

¹⁵ اگه می آمون عقب دَکفته، بدانی کی خُدا خانواده درون کی خُدای زنده کلیسا و ستون و حئیقتِ پِی ایسه، چُطو بایستی رفتار کودَن.

¹⁶ راس راسی کی دینداری راز خَیلی پیله ایسه: اون، جسمِ درون ظاهر بُبوست، بواسطه خُدا روح تصدیق بُبوست، فیریشته ئان اونَ بیده اید، ملتّان میان اعلام بُبوست، دُنیا درون اونَ ایمان باوَردید، جلالِ درون، بُجور بَبرده بُبوست.