اوّل تیموتائوس 2 - کتاب مقدس به زبان گیلکی - گویش رشت و غرب گیلان

همتان ره دعا بُکونید

¹ پس، قبلِ هرچی، خوائم کی خواسته ئان، دعائان، شفاعت ئان و شُکر کودَن ئان، تمانِ مردوم ره بجا باوَرده بِبه،

² پادشائان و صاحب منصبانِ ره، تا بتانیم آرام و راحتِ زیندگی بدَریم، کی جه هر بابت دینداری و وقار امرا بِبه.

³ اَن، اَمی نجات دهنده خُدا نظر درون خُب و اونِ باب دیلِ،

⁴ کی خوائه تمانِ مردوم نجات بیگیرید و حئیقتَ بشناسید.

⁵ چونکی فقط ایتا خُدا ایسَه، و خُدا و آدمانِ میان فقط ایتا واسطه ایسَه، یعنی اُ انسان کی مسیحْ عیسیِ،

⁶ اونکی خو جانِ فَدَنِ امرا، تمانِ آدمانِ خون بهایَ فدَه. اَ حئیقت مناسب وقت درون شهادت بدَه بُبوسته.

⁷ چونکی من هنه واسی مُعین بُبوستَم تا غیر یهودیانِ ره ایتا تعلیم دَهنده و ایتا رسول و ایتا معلمِ ایمان, حئقیت درون بَبم- حئیقتَ گفتن دَرم و دوروغ نگم.

⁸ پس می آرزو اَنه کی مرداکان همه جا، دعا بُکونید و مقدّس دسانَ بی غیظ و دعوا مرافه دعا ره بُجور بَبرید؛

⁹ هَطوئم خوائم کی زناکان آبرومندِ رختان دکونید، نیجابت و حیا امرا نه ببافته مو، یا زر و مروارید یا گران قیمتِ رختانِ امرا،

¹⁰ بلکی خُبِ کارانِ امرا، هُطوکی لایق اُ زناکانی ایسه کی دینداری ادعایَ دَریدی.

¹¹ زن بایستی تام بزنه و کاملِ اطاعتِ امرا تعلیم بیگیره.

¹² من وَئلانَم کی ایتا زَن تعلیم بِده یا ایتا مَردِ سر تسلط بدَره، بلکی بایستی تام بزنه.

¹³ چونکی آدم، اول خلق بُبوسته، بازون حَوّا؛

¹⁴ و آدم گول نخورد، بلکی زن بو کی گول بخورده و نافرمان بُبوست.

¹⁵ ولی زن زای آوردَن امرا نجات گیره، اگر ایمان و محبت و مقدّس بودَنِ درون نیجابتِ امرا بمانه.