اوّل تسالونیکیان 3 - کتاب مقدس به زبان گیلکی - گویش رشت و غرب گیلان

¹ پس وقتی کی دِه نتانستیم اَنَ تاب باوریم، راضی بُبوستیم کی امرا آتن شار درون تنها بَنَد.

² امان تیموتائوسَ کی اَمی برار و خُدا همکار، مسیحِ انجیلِ کار درون ایسه، شیمی ور اوسه کودیم تا شمرأ شیمی ایمانِ درون تقویت و تشویق بُکونه،

³ تا هیکَّس اَ سختیانِ واسی سُست نَبه، چونکی شُمان خودتان خُب دانیدی کی امان هنه واسی تعیین بُبوستیم.

⁴ چون اُ موقع کی شیمی امرا ایسابیم، پیشتر شمرأ بگفتیم کی بایستی سختی بکشیم، هُطوکی دَنیدی و هُطوکی بُبوست.

⁵ هنه واسی، چونکی دِه نتانستم تاب باورم، تیموتائوسَ روانه کودم تا شیمی ایمان جا واخبر بَبم، چون اَ ترسَ دَشتیم کی اُ وسوسه‌گر یعنی ابلیس، یکجور شمرأ وسوسه بُکوده بی و اَمی زحمت لا بُبوسته بی.

تیموتائوسِ خبر کی دیلگرمی دِئه

⁶ ولی هسّا کی تیموتائوس جه شیمی طرف، اَمی ورجه وَگردسته و شیمی ایمان و محبت جا امرا خُبِ خبر باورده و خبر بدَه کی شُمان همیشک اَمی جا خُبی امرا یاد کونیدی و اَمی دِئن ره ذوق دَریدی، اوجور کی امانَم شیمی دئن ره ذوق دَریمی-

⁷ اَی براران، هنه واسی، تمانِ اَمی سختی ئان و مصیبتانِ درون، شیمی جا بواسطه ی شیمی ایمان تَسلی بیگیفتیم.

⁸ چونکی هسّا، زیندگی کونیمی، اگر شُمان خُداوند درون قائم بأسید.

⁹ چون اَن همه شادی واسی کی شیمی خاطری اَمی خُدا حضور میان اَمی نصیب بُبوسته، چطو تانیم خُدایَ شکر بُکونیم؟

¹⁰ هُطوکی امان شبنده روج دیل و جانِ امرا دُعا کونیم تا رو دَر رو شمرأ بیدینیم و هر کم و کسری کی شیمی ایمان درون دَره، برطرف بُکونیم.

¹¹ هسّا خُدا، اَمی پئر خودش، و اَمی خُداوند عیسی، اَمی رایَ شیمی سو فاکشانه.

¹² و هُطوکی اَمی محبت، شمرأ ویشترَ بوستن دَره، خُداوند شیمی محبتَ همدیگرِ ره و تمان مردوم ره زیاد و لبریز بُکونه.

¹³ و شیمی دیلانَ پایدار بُکونه، تا اَمی خُداوند عیسی آمونِ موقع تمانِ خو مقدّسین امرا، اَمی خُدا و آسمانی پئر جُلو، بی عیب و مقدّس بیبید.