۱پطرس 3 - کتاب مقدس به زبان گیلکی - گویش رشت و غرب گیلانزناکان و مرداکان 1 جه اَ رو، شُمان ای زناکان، شیمی مرداکانِ جا اطاعت بُکونید تا حتّی اگر بعضیان خُدا کلامِ جا اطاعت نُکونیدی، بدونِ اَنکی اوشانَ ایچی بیگید، شیمی رفتارِ واسی ایمان باوَرید، 2 وقتی کی اوشان شیمی پاک و محترمانه رفتارَ دینیدی. 3 شیمی قشنگی، ظاهری نَبه، بِبافته مو مانستن و طلا دوکودَن یا گیرانِ رختانِ امرا، 4 بلکی وَئلید شیمی قشنگی، شیمی اُ درونی آدم بِبه کی شیمی دیلِ درونِ و چومِ امرا بیده نیبه، و ایتا آرام و ملایمِ روحِ امرا قشنگ بُبوسته، کی اجور قشنگی خُدا نظر درون خَیلی با ارزش ایسه. 5 چونکی قدیمِ مقدّسِ زناکان کی خُدایَ اُمید دَشتید، خوشانَ اَطویی قشنگَ کودید. اوشان خوشانِ مرداکانِ جا فرمان بَردید، 6 هُطوکی سارا ابراهیمِ فرمانبر بو و اونَ خو آقا دوخوادی. و اگر شُمانم خُبی بُکونید و هر اونچیِ جا کی ترس دَره، نترسید، سارا زاکان ایسید. 7 هُطو، شُمانم ای مرداکان، شیمی زناکانِ امرا اوجور زیندگی بُکونید کی اوشانَ دَرک بُکونید و بشناسید و جه اویا کی شیمی جا ظریفتر ایسید، اوشانِ احترامَ بدَرید، چونکی شیمی مانستن زیندگی فیضِ وارث ایسید، تا نَبه کی شیمی دُعائان بی جواب بمانه. صالح بوستنِ واسی عذاب کِشئن 8 آخرسَر، شُمان همتان، یک فیکر و یکدیل و بَرار دوست و دیلسوج و فروتن بیبید. 9 بَدیَ، بَدی امرا و فاشَ، فاشِ امرا جواب نَدید، بلکی، عَوضِ اون برکت بطلبید، چونکی هنه ره دعوت بُبوستید تا برکت بدَس باوَرید. 10 چونکی، «هر کی بخوائه زیندگیَ دوست بدَره و خُبِ روجانَ بیدنیه، بایستی خو زوانَ بَدی جا بداره و خو لبانَ حُقه جا دَوده. 11 بایستی بَدی جا دوری بُکونه و خُبی بُکونه؛ صلح و سلامتی دُمبال بگرده و اونِ دُمباله رو بِبه. 12 چونکی خُداوندِ چوم صالح آدمانِ رو ایسه و اونِ گوش اوشانِ دُعائان ره وازه، ولی خُداوند بَدکارِ آدمانِ ضد ایسه.» 13 هسّا، اگر خُبِ چیه واسی غیرت دَریدی، کیسه کی شمرأ ضرر فارسانه؟ 14 ولی اگر حتّی صالح بودَن واسی عذاب بکشید، برکت خوائید گیفتن. «جه اونچی کی اوشان تَرسَدِه شُمان نترسید و نیگران نیبید.» 15 بلکی شیمی دیل درون خداونْد مسیحَ، قدوس بشمارید و اونَ احترام بَنید و همیشک آماده بیبید تا هرکی اُ اُمیدِ علتَ کی شیمی درون نَئه واورسه، اونَ جواب بدید، البت احترام و نرمی امرا. 16 شیمی وجدانَ پاک بدارید، تا اوشانیَ کی شمرأ افترا زَنیدی، اوشانیَ کی شیمی خُبِ رفتارَ مسیح درون بَد گیدی، شرمنده بیبید. 17 چونکی اگر خُدا بخوائه، بخترِ کی خُب کارِ واسی عذاب بکشید تا بَده کارِ ره. 18 چونکی مسیح ئَم ایوار گُنائان ره عذاب بکشه، یعنی اُ صالح، اوشانِ ره کی صالح نیئید، تا امرا خُدا ورجه باوره، اون، جسم درون بکوشته بُبوست، ولی روحِ درون زنده بُبوست، 19 و روحِ درون زیندانی ارواحِ ورجه بُشو و اوشانَ واخب بُکود، 20 اُ ارواح کی قدیمِ دوران نافرمانی بُکوده بید، اُ موقع کی خُدا نوحِ دوران درون، کی کشتی چاکوده بوستن دوبو، صبر امرا رافا بو. اُ کشتی درون فقط چن تا آدم، یعنی هشت نفر بید، کی بواسطۀ آب نجات بیگیفتید. 21 و اَ آبْ اُ غسلِ تعمیدِ نمونه ایسه کی الان شمرأ نجات دِئه. ایتا تعمید کی تنِ کثیفی ره نیئه، بلکی ایتا پاکِ وجدانِ ناجی ایسه کی خوائه خُدایَ بیدینه. اَ تعمید بواسطۀ عیسی مسیحِ زنده بوستن، شمرأ نجات دِئه. 22 اُ عیسی مسیح کی به آسمان بُشو و هَسا خُدا راستِ دَسِ وَر ایسا، و فیریشته ئان، قدرتان و قوت ئان اونِ فرمانبر بُبوستید. |
@ 2024 Korpu Company