اوّل قرنتیان 6 - کتاب مقدس به زبان گیلکی - گویش رشت و غرب گیلاندعوا مرافه ایمان دارانِ میان 1 هروقت اینفر جه شُمان اویتا جا شکایت بِدَره، چُطو جرأت کونه اونَ نه مُقدسین ورجه، بلکی گُناکاران محکمه درون ببره؟ 2 مگه نانیدی کی مُقدسین دُنیایَ داوری خوائید کودن؟ پس شُمان کی قرارِ دُنیایَ داوری بُکونید، چُطو نَتانید اَ کوجدانه جریاناتَ داوری بُکونید؟ 3 مگه نانید امان فیرشته ئانَ داوری خوائیم کودن؟ چی برسه به اَ زیندگی جریاناتِ باره داوری کودن. 4 پس چره، اُ زمات کی اَ جریانات شیمی میان ایتفاق دکفِه، اوشانِ ورجه برید کی کلیسا درون به حساب نَیئیدی؟ 5 اَنَه گَم تا شمرأ شرمنده بُکونم. شیمی میان اینفر اَنقدر حکیمِ نُبو کی بتانه اَ جریاناتَ برارانِ میان حل وفصل بُکونه؟ 6 ولی برار، برارِ ضدْ محکمه درون شه، اونم بی ایمانانِ ورجه؟ 7 اصلا اَجور دعوا مرافه شیمی میان، خودش شمرأ سرشکستگیه. چره نخوائید اُ بدیَ قُبیل بُکونید؟ چره حاضیر نیئید ضرر بُکونید؟ 8 ولی، شُمان خودتان بَدی کونیدی و دیگرانَ ضرر فارسانیدی، حتی شیمی برارانَ. 9 مگه نانید اوشانی کی ظالمید، خُدا پادشائیَ به ارث نبریدی؟ گُول نُخورید: بی حیائان، بُت پرستان، زینا کاران، لواط کاران، 10 دوزان، طمع کاران، عرق خوران، بَد دهن ئان و قاب بازان، خُدا پادشائیَ به ارث نبریدی. 11 بعضی جه شُمان پیشتر اَطو بید. ولی عیسی مسیح خُداوند نامِ درون و بواسطه اَمی خُدا روح بُشوسته بُبوستید، تقدیس بُبوستید و صالح بحساب باموئید. بی حیایی جا جیویزید 12 «همه چی مِره روایِ،» ولی همه چی فایده ناره. «همه چی مِره روایِ» ولی وَئنلانم هی چی مَره حریف ببه. 13 گیدی «غذا شکم شینه، و شکم غذا شین و خُدا، هم اَنه و هم اونَ نابودَ کونه.» تن بی حَیائی شین نیه، بلکی خُداوند شینه و خُداوندم تن شین، 14 و خُدا، خُداوندَ مُرده ئانِ جا زنده بُکود و اَمرَم خو قوت اَمرا زنده خوائه کودن. 15 مگه نانیدی شیمی تن مسیحِ اوسم و اعضایه؟ یعنی مسیحِ اوسم واعضایَ اوسانم و ایتا فاحشه اوسم واعضا مانستن چاکونم؟ هرگس! 16 مگه نانیدی اینفر فاحشه اَمرا بِبه، اونِ مرا ایتا تن خوائه بوستن؟ چون تورات درون بینیویشته بُبوسته کی: «اُ دونفر ایتا تن خوائید بوستن.» 17 ولی اونکی خُداوند مَرا ایتا بِبه، اون مَرا ایتا روح ایسه. 18 بی حیائی جا جیویزید. هرتا گُناهِ دیگری کی آدمی بُکونه بیرون جه اونِ تن ایسه، ولی اُ کَس کی بی حیائی بُکونه، به خودشِ تن گُناه کونه. 19 مگه نانیدی کی شیمی تن روح القدّسِ معبدِ کی شیمی درونِ و اونَ خُدا جا فیگیفتید؟ شُمان دِه خودتانِ شین نیئید. 20 چونکی شیمی هِئنِ واسی بها فَده بُبوست، پس خُدایَ شیمی تن درون جلال بَدید. |
@ 2024 Korpu Company