اوّل قرنتیان 14 - کتاب مقدس به زبان گیلکی - گویش رشت و غرب گیلاننبوت کودن و دیگر زوانان مرا گب زئن 1 محبت دُمبال بیبید و غیرتِ مَرا روحانی عطایانَ بخوائید، اَلَلخصوص اَنکی نبوّت بُکونید. 2 چون اونکی دیگر زوانان مرا گب زنه، نه آدمیان اَمرا، بلکی خُدا مرا گب زئن دَره. چونکی هیکّس اونِ گبَ نفهمه؛ ولی اُ آدم بواسطه ی خُدا روح، رازانَ گه. 3 ولی اونکی نبوّت کونه، آدمانِ مرا گب زنه تا اوشانَ بنا بُکونه و تشویق بُکونه و اوشانَ دیلداری بدِه. 4 اونکی دیگر زوانانِ مرا گب زنه خورَه بنا کونه، ولی اونکی نبوّت کونه کلیسایَ بنا کونه. 5 هسّا من خوائم کی شُمان همتان دیگر زوانان مرا گب بزنید، ولی ویشتر خوائم کی نبوّت بُکونید. اُ کَس کی نبوّت کونه اونِ جا کی دیگر زوانان مرا گب زنه پیله تَره، مگه اَنکی اینفر ترجمه بُکونه تا کلیسا بنا بِبه. 6 هسّا ای براران، اَگه من شیمی ورجه بایم و دیگر زوانان مرا گب بزنم، شمرأ چی منفعتی فارسانم، مگه اَنکی مکاشفه یا دانایی یا نبوّت یا ایتا تعلیم شمرأ بدَرَم؟ 7 حتی اَگه سازانی کی جان ناریدی، لَلِه و چنگ مانستن دُرُست بزه نَبه، چُطو شه فهمستن کی چه آهنگی بِزه بوستن دَره؟ 8 اَگه شيپور خُبِ صدا فانده، کی جنگ ره حاضیرَ به؟ 9 شیمی باره هم هَطوئه. اَگه شیمی زوان اَمرا گبی بزنید کی نشِه فهمستن، چُطو اینفر بفهمه کی چی گفتن دَرید؟ چون هو موقع، اَنه مانستنِ کی هوا اَمرا گب بزَنید. 10 بی گُمان، دُنیا درون خَیلی جورواجور زوانان نَئه و هیتّا بی معنی نیئید. 11 ولی اَگه من نَتانم اینفر دیگرِ گبان معنیَ بفهمم، اونِ ره کی می اَمرا گب زئن دَره ایتا غریبه ئم و اونم می اَمرا غریبه یِ. 12 شیمی باره ئم هَطو ایسه. جه اویا کی غیرتِ مرا خُدا روحِ ظاهر بوستنِ دُمبال ایسید، تقّلا بُکونید کی کلیسا بنا کودن واسی ترقّی بُکونید. 13 پس، اُ کَس کی دیگر زوانانِ مرا گب زنه بایستی دُعا بُکونه تا بتانه خو گبانَ ترجمه بُکونه. 14 چونکی اَگه من دیگر زوانانِ اَمرا دُعا بُکونم، می روح دُعا کونه، ولی می عقل بی بهره مانه. 15 پس چی بایستی بُکونم؟ می روح اَمرا دُعا خوائم کونم ولی می عقل مَرَئَم دُعا خوائم کودن؛ می روح اَمرا حمد و ثنا سرودَ خوانم ولی می عقل مَرَئَم حمد و ثنا سرودَ خوائم خواندن. 16 جغیر اَن اَگه تو، روحِ درون شُکر بُکونی، چُطو اینفر کی نفهمه تو چی گفتن دری تی شُکر کودَن ره آمین بگه؟ چره کی نانِه تو چی گفتن دری! 17 چونکی تو دُرُست شُکر کودن دری، ولی تی شُکر کودن باعث نیبه اینفر دیگه بنا بِبه. 18 خُدایَ شُکر کونم کی ویشتر جه تمانِ شُمان دیگر زوانانِ مرا گب زنم؛ 19 با اَ حال اَنه دانم کی کلیسا درون پنج تا کلمه می عقل مرا گب بزنم تا بقیه یَ تعلیم بَدم بخترِ، تا اَنکی هیزاران کلمه ایتا دیگر زوانِ مرا گب بزنم. 20 ای براران، فیکر کودن درون زاکانِ مانستن نیبید، بلکی بَدی کودن درون زاکانِ مانستن بیبید. ولی فیکر کودن درون پیله آدم بیبید. 21 تورات درون بینیویشته بُبوسته کی: « خُداوند گه: ”دیگر زوانانِ مرا و غریبه ئانِ لبان مرا اَ مردوم اَمرا گب زنم، با اَن همه حتی اوشان مَره گوش نخوائید دَئن.“» 22 پس دیگر زوانان، نیشانه ای ایسه نه ایمان دارانِ ره بلکی بی ایمانانِ ره؛ ولی نبوّت ایتا نیشانه ايسه ایمان دارانِ ره و نه بی ایمانان. 23 پس، اَگه تمانِ کلیسا آدمان همدیگر اَمرا جَما بید و همتان ایتا دیگر زوانِ اَمرا گب بزنید، و هو موقع اوشانی کی هیچیِ جا خبر نارید و یا اوشانی کی ایمان نارید مجلسَ بدرون بائید، نخوائید گفتن کی شُمان تورید؟ 24 ولی اَگه همه نبوّت بُکونید و اوشانی کی هیچیِ جا خبر نارید و یا اوشانی کی ایمان نارید مجلس بدرون بائید، همتان باعث بیدی کی اُ آدم قانع بِبه کی گُناه کارِ، و اون همتان جُلُو داوری به، 25 اُ آدم دیلِ رازان بَرملا خوائه بوستن، هو موقع خو دیمِ مرا زمینِ سر کَفه و خُدایَ پرستش خوائه کودن و اعلام کونه کی، «حقيقتن خُدا شیمی میان ايسا.» 26 براران پس منظور چیسه؟ هو موقع کی جَما بید، هرکس ایتا حمد و ثنا سرود، یا ایتا تعلیم، ایتا مکاشفه، ایتا زبان و یا ایتا ترجمه دَره. وئالید اَشان همه بنا بوستنِ ره استفاده بِبه. 27 اَگه ایکس ایتا دیگر زوان مرا گب بزنه، وَئالید فقط دو یا نهایت سه نفر، اونَم بِنُوبه گب بزنید و اینفرم ترجمه بُکونه. 28 ولی اَگه اینفر نِئسه کی ترجمه بُکونه، هرتا جه اوشان کلیسا درون ساکت بأسید و خوشان دیل درون و خُدا مرا گب بزنید. 29 وَئالید دو یا سه نفر اوشانِ جا کی نبوّت کونیدی گب بزنید و الباقی اوشانِ گبانَ سُبک سنگین بُکونید. 30 و اَگه اینفر دیگر کی اویا نیشته ایتا مکاشفه فیگیره، اُ اولتّا آدم بایستی تام بزنه. 31 چونکی همتان بِنُوبه تانیدی نبوّت بُکونید تا همه تعلیم بیگیرَد و تشویق ببَد. 32 انبیا روح، انبیا جا فرمان بره. 33 چونکی خُدا، هرج و مرجی خُدا نیه، بلکی صلح و سلامتی خُدایِ. هُطوکی تمانِ مُقدسینِ کلیسائان درون اَطویه. 34 زناکان بایستی کلیسا درون تام بزنید. چونکی اوشانَ اجازه فدَه نُبوسته کی گب بزنید، بلکی بایستی فرمانبر بیبید عین اونچی کی شریعتم گه. 35 اَگه چیزی ایسه کی خوائید یاد بیگیرد، خانه درون خوشانِ مَردکانِ جا واورسِد؛ چونکی گب زئن کلیسا درون زناکِ ره عیبه. 36 مگه خُدا کلام شیمی جا بامو؟ یا فقط شمرأ فارسه؟ 37 اَگه اینفر گُمان کونه کی ایتا پیغمبرِ یا آدمی ایسه کی خُدا روحَ دَره، اون بایستی تصدق بُکونه اونچیَ کی شمرأ نیویسَم ایتا حُکم، خُداوند جا ایسه. 38 اَگه ایکس اَنه تصدق نُکونه، خودشَم تصدق نخوائه بوستن. 39 پس ای می براران، غیرت مَرا اَنِ دُمبال بیبید کی نبوّت بُکونید و دیگر زوانانِ گب زئنِ جُلُویَ نیگیرید. 40 ولی همه چی بایستی دُرُست و به قاعده انجام بِبه. |
@ 2024 Korpu Company