दिब्य दरस 9 - गढवली नयो नियमपाँचु तुरै 1 जब पाँचु स्वर्गदूत ल तुरै फूंकी, त मिल आसमान बट्टी धरती पर एक गैणो पुड़द देखि, अर गैणा तैं अथाह कुण्ड की चाबी दिए गै। 2 वेल अथाह कुण्ड तैं खोलि दींनि, अर कुण्ड मा बट्टी बड़ी भट्टी का जन धुंआ उठि, अर कुण्ड सूरज अर सैरो वातावरण वे गड्डा का धुवां ल कालो हवे गै। 3 वे धुवां मा बट्टी धरती पर टिड्डियाँ निकली, अर ऊं तैं लुखुं तैं डंक मरणै की शक्ति दीं छै, जन बिच्छी लुखुं तैं डंक मरदी। 4-5 जन कै तैं बिच्छी का डंक मरण बट्टी दर्द हूंद, उन ही यूं टिड्डियों तैं पाँच मैना तक ऊं लुखुं तैं तड़पांणै की अनुमति दिए गै छै, जैका कपाल पर पिता परमेश्वर की मुहर कु निशान नि छो। पर ऊं बट्टी बुलै गै छो कि ऊं तैं न त धरती की घास तैं, न कै पौधा तैं, अर न ही कै डाला तैं नुकसान पौंछयां। 6 ऊं पाँच मैना मा लोग मुरणो को ढंग खुज्याला, पर उ मोरि नि सकला। 7 यु टिड्डियाँ लड़ै कन वला घोड़ों का जन दिखयोदींनि, जु लड़ै मा जांणु कु तैयार छिनी उ अपड़ा मुंड पर कुछ पैरयां छा जु सोना का मुकुट जन लगणु छो, ऊंको मुक लुखुं का मुक जन छा। 8 ऊंका बाल जननों का बालों का जन लम्बा छा अर ऊंका दांत शेर का दांतों का जन मजबूत छा। 9 अपड़ी छती पर ऊंल लोखर का बणयूं कवच पैरयूं छो। जब उ उड़िनि, त उ इन आवाज करदा छा जन कई घोड़ा लड़ै पर जांणवला रथों तैं खिचदींनि। 10 ऊंका बिच्छुओं का जन पूंछ अर डंक छा, उ अपड़ी पूंछ का डंक का दगड़ी पाँच मैना तक लुखुं तैं दुःख पौछांण मा सक्षम छा। 11 अथाह गड्डा को दूत ऊंकु राजा का जन छो जु ऊं तैं नियंत्रित करदु छो। उ उन ही दुष्टदूत च जैल अथाह कुण्ड तैं खोलि छो। इब्रानी भाषा मा वेको नौं अबद्दोन च, अर यूनानी भाषा मा, अपुल्लयोन च, जौको मतलब च, उ जु नाश करद। 12 पाँच मैना बाद य विपत्ति खत्म हवे जाली। पर यांका बाद भि द्वी और विपत्तियां आंण वली छिनी। छठवीं तुरै 13 यांका बाद, छठवां स्वर्गदूत ल अपड़ी तुरै फूंकी। जब वेल यु तैं फूंकी त मिल पिता परमेश्वर का संमणी धूप जलांण की सोना की वेदी का चौ तरपां कूंणा बट्टी एक आवाज सूंणि जु चौ तरपां बट्टी बुल्णु छो, 14 अर आवाज ल छठवां दुष्टदूतों बट्टी बोलि, जौको तुरही तैं पकड़यूं छो, “अब ऊं चार स्वर्गदूतों तैं खोल दे जु फरात नौं की बड़ी गाड का छाला पर बंधयां छिनी।” 15 इलै तब उ चरी दुष्टदूतों खोले गैनी, उ पैली बट्टी ही तैयार छा अर ऊं तैं बुलै गै छो कि यु बगत, यु दिन, यु मैना अर यु साल इन्तेजार कैरा अर अब यु ऐ गै छो, ऊं तैं दुनिया का एक हिस्सा का लुखुं तैं मरण छो। 16 उख घुड़सवार सैनिकों की एक भौत बड़ी फौज कठ्ठा छै, जौंकी गणती मिल बीस करोड़ सूंणि। 17 उ घोड़ा अर ऊंका सवार जौं तैं मिल दर्शन मा देखि, उ इन दिख्योंदा छा ऊंकी झीलम आग का जन लाल, गहरा नीली अर गन्धक का जन पीला छा। घोड़ों का मुंड शेरों का मुंड का जन लगदा छा, ऊंका गिचा बट्टी आग, धुंआ अर गंधक निकलणी छै। 18 धरती की सैरा लुखुं मा बट्टी एक तिहाई लुखुं तैं यूं तीन भयानक विपत्तियों का द्वारा मरै गै, जु घोड़ों का गिचा बट्टी निकलदी छै मतलब की आग, धुंआ अर गन्धक। 19 पर ऊं घोड़ों मा लुखुं तैं मरणु कु द्वी अलग चीज छै, पैली त उ जु ऊंका मुक बट्टी निकलदी छै, दुसरी ऊंकी पूंछों मा छै। किलैकि ऊंकी पूंछ गुरो का जन छै, ऊंमा लुखुं तैं कटणु कु मुंड छा। 20-21 पर और लोग जु ऊं विपत्तियों बट्टी पैली नि मरै गै छा, ऊंल अभि भि अपड़ा बुरा कामों बट्टी पछतौ नि कैरी छो। ऊंल हत्या कन, टूणा-टुटगा, यौन अनैतिकता या चोरी कन बट्टी पछतौ नि कैरी। ऊंल दुष्टात्माओं अर अपड़ी हथों बट्टी बंणि चीजों की आराधना कन भि नि छोड़ी, जन कि सोना या चाँदी या पितले या ढुंगा अर लखड़ो ल बणईं मूर्तियां, उ मूर्तियां, न त दिखदी छिनी, न सुणदींनि, अर न ही चलदी छिनी। |
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.